17/08/2020
DA-RFO 02 MULING INABISUHAN ANG PUBLIKO TUNGKOL SA ASF
Muling inaabisuhan ng Department of Agriculture - Regional Field Office No. 02 (DA-RFO 02) ang publiko na mag-ingat sa African Swine Fever (ASF).
Ito ay pagkatapos na nakapagtala ng bagong kaso ng ASF sa apat na bayan ng Isabela tulad ng Quezon, Roxas, Aurora at Luna.
Ipinahayag ni Regional Executive Director Narciso A. Edillo sa kanyang radio program, Director’s Hour, sa DZDA ngayong araw, na ang ASF ay naitala noong huling yugto ng Hulyo sa Quezon at sumunod na rin ang iba pang mga bayan.
“Sa tulong ng mga lokal na pamahalaan, nagsagawa tayo kaagad ng blood sampling at culling ng mga apektadong baboy,” ani Edillo. “Sa ngayon ay umaabot na sa 432 heads ang culled.”
Sinabi nito na sa apat na bayan, walong barangays ang apektado at kinabibilangan ng pitumpot siyam na magsasaka.
Ayon naman kay Dr. Manuel Galang Jr., Veterinarian III, ang mga kaso ng ASF ay posibleng nag-ugat sa hindi pagpapatupad ng farm bio-security measures ng mga nag-aalaga ng baboy.
“Ibig sabihin nito na mayroon pa ring virus sa ating lugar kung kaya’t patuloy sana ang epektibong pagpapatupad ng mga checkpoint protocols sa buong rehiyon,” aniya.
Ipinapayo din nito sa mga nag-aalaga ng baboy na hindi magpakain ng tira-tira o swill feeding at siguraduhing malinis ang pag-aalagaan sa lahat ng pagkakataon.
Idinagdag pa ni Galang na ipinagbabawal ang pagbenta ng karne mula sa may sakit na baboy at paggamit nito sa paggawa ng processed meat tulad ng tocino, longganisa at iba pa.
Sinabi pa nito na kanila ring minamanmanan ang mga bayan ng Mallig, Ramon at Echague na posibleng apektado ng ASF dahil sa mga ulat na natatanggap sa tulong ng Provincial Government ng Isabela.
Sa ngayon ay patuloy ang maigting na pakikipag-ugnayan ng DA-RFO 02 sa mga lokal na pamahalaan at livestock raisers para sa pagsasagawa ng blood sampling at surveillance.
Samantala, ipinaalam ni Edillo na tapos na ang distribusyon ng unang batch ng indemnification fund sa mga apektadong magsasaka na nagkakalahalaga ng P5.7 milyon.
Aniya, umaabot na sa 1,156 ang nabigyan ng indemnification sa kabuuang 2,758 na depopulated hogs at kinabibilangan ng 189 sa 430 na magsasaka.
Nakikiusap din siya sa mga nakasama sa second batch na antayin lamang ang release ng pondo mula sa DA Central Office na nagkakahalaga ng mahigit walong milyong piso.
Ayon pa kay Edillo, nakipag-ugnayan na rin ang DA-RFO 02 sa Central Office at Bureau of Animal Industry (BAI) para maalis na ang mga lugar na apektado ng ASF sa infected o red zone tungo sa buffer o pink zone.
Ayon sa polisiya, ang mga lugar na mapatunayang wala ng kaso pagkatapos ng sunud-sunod na tatlong blood sampling na magnegatibo ay maaari ng ideklarang ASF free.
