08/08/2026
Nakikiisa po ako sa naging pahayag ni Punong Barangay Ernesto “Papa Jun” Rafael, Jr. tungkol sa usapin ng DMAC Court at Multipurpose Building.
Naiintindihan po natin kung bakit marami sa ating mga kabataan at residente ang excited at sabik na muling magamit ang DMAC Court. Matagal na rin po itong hinihintay ng marami, lalo na ng ating mga kabataan na naghahanap ng lugar para makapaglaro, makapag-ensayo, at makapagsagawa ng mga aktibidad.
Pare-pareho naman po tayo ng hangarin—ang makita nating muli na mapakinabangan ng ating mga kabataan ang DMAC Court. Kaya naiintindihan natin ang mga nagtatanong, naghihintay, at umaasang mangyayari na ito sa lalong madaling panahon.
Kasabay nito, sana po ay maging maingat din tayo sa mga impormasyong ating ibinabahagi. Kung may mga bagay man tayong hindi pa malinaw o may mga katanungan tayo, mas mabuti pong alamin muna ang tamang impormasyon bago ito ipasa sa iba.
Hindi po natin sinasabing huwag magtanong o huwag magsalita. May karapatan po tayong malaman ang mga bagay na may kinalaman sa ating komunidad. Ang pakiusap lamang po ay huwag sana tayong magpakalat ng impormasyong hindi pa kumpirmado, dahil maaaring magdulot ito ng kalituhan, maling akala, at hindi pagkakaunawaan sa ating mga kabarangay.
Hindi naman po magkakaiba ang ating hinihintay. Lahat tayo ay gusto nating muling makita ang DMAC Court na napapakinabangan ng ating kabataan. Kaya sana, imbes na magkaroon ng sisihan o pagtuturuan, piliin nating maging mahinahon, mapag-unawa, at responsable sa mga impormasyong ating ibinabahagi.
Ang DMAC Court ay isang espasyong matagal nang hinihintay ng ating komunidad. Sana ay dumating ang panahon na muli natin itong makita na puno ng kabataan, sports, activities, at masasayang alaala.
Iisa ang hangarin natin. Para sa kabataan, para sa komunidad, at para sa New Lower Bicutan. 🩷
𝗣𝗔𝗛𝗔𝗬𝗔𝗚 𝗠𝗨𝗟𝗔 𝗦𝗔 𝗣𝗨𝗡𝗢𝗡𝗚 𝗕𝗔𝗥𝗔𝗡𝗚𝗔𝗬 𝗞𝗔𝗣𝗜𝗧𝗔𝗡 𝗘𝗥𝗡𝗘𝗦𝗧𝗢 "𝗣𝗔𝗣𝗔 𝗝𝗨𝗡" 𝗥𝗔𝗙𝗔𝗘𝗟, 𝗝𝗥.
Nakarating sa aking kaalaman ang kumakalat na pahayag sa social media patungkol sa DMAC Court na bubuksan at magpapaliga di umano ng malakihan sa pagbubukas nito. Gayundin ang inuugnay na job fair na di umano ay hindi ko pinayagan ganapin sa loob ng Bagong Barangay Hall.
Nais kong ipabatid sa lahat na hindi pa opisyal na natuturn over sa pangangalaga ng barangay ang MPB o Multipurpose Building o mas kilala sa tawag na Bagong Barangay Hall na kung saan nakatalaga sa ikalimang palapag ang DMAC Court na kanilang tawagin. Kung kaya't ang desisyon ipagamit ito ay hindi pa saklaw ng aking tungkulin bilang Punong Barangay ng New Lower Bicutan. Hinihintay natin itong pormal na ipagkaloob ang pangangalaga sa ating barangay. Dagdag pa rito, ang Sangguniang Kabataan ng New Lower Bicutan ay may kasalukuyang liga na hindi pa natatapos at nakapagpahayag lamang ng ideya na kung sakaling maipagkakaloob ito sa lalong madaling panahon na may natitira pang liga, ito ay ipagpapatuloy sa MPB DMAC Court. HINDI po bagong liga na ikinakabit sa aking pamunuan.
Ang video rin na pinakakalat ng tungkol sa job fair ay hindi nangyari sa panahong kasalukuyan. At nang panahong iyan ay hindi parin saklaw ng desisyon ko ang pagpapagamit sa hindi pa tapos na MPB.
Ang Multipurpose Building ay sinimulang gawin ng taong 2020 na hindi pa ako ang Punong Barangay. Naihalal ako ng 2023 at sa panahong iyon ay hindi parin ito tapos ngunit patuloy akong nakikipag-ugnayan sa ating Pamahalaang Lokal patungkol sa sitwasyon nito at sa kasalukuyan naman ay patuloy na tinatapos.
Nauunawaan ko ang inyong hinaing dangan nga lamang ay humihiling din ako ng pang-unawa na wala pa sa pamahalaang barangay ang pangangalaga at desisyon tungkol dito.
Panawagan ko rin sa ating mga residente na maging masuri sa mga ipinakakalat na mga pahayag sa social media sapagkat malinaw na ginagamit ang mga ito laban sa akin upang ang aking pamumuno ay yurakan at sirain.
