18/03/2026
Malampusong gipahigayon ang Training of Trainers (TOT) on Farm Business School (FBS) alang sa Rice-Based Enterprises alang sa mga farmer leaders sa tibuok Caraga Region niadtong Marso 2–11, 2026 sa Golden Tara Hall, ATI-RTC XIII, Los Angeles, Butuan City.
Ang maong pagbansay nagtigom sa mga farmer leaders gikan sa nagkalain-laing probinsya sa rehiyon nga adunay dakong papel sa pag-giya ug pag-suporta sa kapwa nilang mga mag-uuma sa ilang komunidad. Ang kalihokan nagtumong sa pagpalig-on sa ilang kahibalo ug kahanas sa farm business management, ilabi na sa pagpalambo ug pagdumala sa rice-based enterprises.
Sa panahon sa pagbansay, gipaila sa mga partisipante ang mga konsepto sa Farm Business School approach lakip na ang enterprise planning, financial management, marketing strategies, ug mga praktikal nga pamaagi sa pagpahigayon og mga sesyon sa pagkat-on alang sa mga mag-uuma. Ang mga leksyon gipahigayon pinaagi sa mga lecture, workshop, ug interaktibong grupo nga kalihokan aron mas mapalawom ang pagsabot sa mga partisipante sa farm entrepreneurship. Pinaagi sa maong pagbansay, ang mga partisipante makahimo na sa pag-aplikar sa ilang kahibalo ug kahanas sa pagdumala sa farm business, ilabi na sa rice-based enterprises.
Ang malampusong pagpahigayon sa maong pagbansay nagpakita sa padayon nga paningkamot sa pagpalig-on sa kapasidad sa mga farmer leaders sa Caraga Region aron mahimong epektibong mga magtutudlo ug lider sa ilang komunidad, ug makatabang sa pagpalambo sa produksyon, kita, ug kalig-on sa panginabuhian sa mga mag-uuma sa rice-based farming.
