DMW 8 Migrant Workers Protection Division

22/10/2025

News Alert
Migrant Workers Protection Bureau

𝗣𝗶𝗻𝗼𝘆 𝗛𝗥 𝘀𝗮 𝗟𝗮𝗼𝘀 𝗦𝗰𝗮𝗺 𝗛𝘂𝗯, 𝗔𝗿𝗲𝘀𝘁𝗮𝗱𝗼 𝘀𝗮 𝗸𝗮𝘀𝗼𝗻𝗴 𝗜𝗹𝗹𝗲𝗴𝗮𝗹 𝗥𝗲𝗰𝗿𝘂𝗶𝘁𝗺𝗲𝗻𝘁 𝗮𝘁 𝗧𝗿𝗮𝗳𝗳𝗶𝗰𝗸𝗶𝗻𝗴 𝗶𝗻 𝗣𝗲𝗿𝘀𝗼𝗻𝘀

𝘗𝘩𝘪𝘭𝘪𝘱𝘱𝘪𝘯𝘦𝘴 — Arestado ang isang Pilipinong illegal recruiter at human trafficker na si Jarwin De Leon Santinitigan matapos siyang marepatriate kasama ang tatlo niyang nabiktima mula sa scam hub sa Vientiane, Laos noong Oktubre 17, 2025.

Batay sa salaysay ng mga biktima, sila ay pinangakuan ni Santinitigan, na umano’y isang human resource manager sa Laos, ng trabaho bilang customer service representative. Pagdating nila sa Maynila upang magproseso ng mga kinakailangang dokumento, ipinakilala sila ni Santinitigan sa isang taong nagngangalang “Ayie,” na konektado umano sa isang recruitment agency. Si “Ayie” rin ang nag-ayos ng kanilang mga papeles para maiproseso bilang mga Overseas Filipino Worker (OFW).

Gayunman, nang umalis sila ng bansa, ang kanilang mga dokumento na mula sa Rapid Manpower Consultants Inc. ay para sa trabaho bilang electrician sa Brunei, ngunit ang kanilang airline ticket ay patungong Thailand. Pagdating sa Thailand, dinala sila sa Laos at doon pinagtatrabaho bilang online scammers gamit ang platform na TikTok.

Ayon sa mga biktima, hindi nila kinaya ang trabahong panloloko sa kapwa, kaya sila ay humingi ng tulong at sumuko sa Embahada ng Pilipinas sa Laos, na agad namang nagpatupad ng kanilang repatriation.

Nadakip si Santinitigan matapos makumpirmang siya ang nagrecruit at nagpadala sa tatlong biktima. Siya ay kasalukuyang nasa kustodiya ng mga awtoridad at mahaharap sa mga kasong paglabag sa Republic Act No. 8042 o Migrant Workers and Overseas Filipinos Act of 1995, at Republic Act No. 9208 o Anti-Trafficking in Persons Act of 2003, na may kaukulang parusa sa mga sangkot sa illegal recruitment at human trafficking. Iniimbestigahan din ng DMW ang pagkakasangkot ng Rapid sa nangyari sa mga biktima.

22/10/2025

𝗕𝗔𝗕𝗔𝗟𝗔 𝗦𝗔 𝗣𝗨𝗕𝗟𝗜𝗞𝗢

Ang direct hiring ay isinasagawa direkta ng aplikante online sa pamamagitan ng DMW e-registration account. Walang sinumang fixer, ahente, o indibidwal na konektado sa foreign employer o principal ang pinahihintulutang mamagitan o maningil ng bayad para sa pagproseso ng Overseas Employment Certificate (OEC) o work permit.

24/09/2025

𝗕𝗔𝗕𝗔𝗟𝗔 𝗦𝗔 𝗣𝗨𝗕𝗟𝗜𝗞𝗢

Check muna bago mag-loan online!

Nagbababala ang Department of Migrant Workers (DMW) laban sa mga pages na nag-aalok ng pautang tulad ng:

Tiwala Lending Prime
Pautang OFW sa Norway
PinoyPay Prime
CredXpress Lending

Siguraduhin munang rehistrado sa SEC at awtorisado ng BSP ang kumpanya.

Para sa listahan ng mga legit na lending company, i-download ang SEC Check App!

10/09/2025

News Release
Department of Migrant Workers
Setyembre 08, 2025

𝗞𝘂𝗺𝘂𝘀𝘁𝗮 𝗞𝗮𝗯𝗮𝘆𝗮𝗻?
𝗔𝗻𝗴 𝗱𝗶𝗴𝗶𝘁𝗮𝗹 𝘄𝗲𝗹𝗳𝗮𝗿𝗲 𝗺𝗼𝗻𝗶𝘁𝗼𝗿𝗶𝗻𝗴 𝘀𝘆𝘀𝘁𝗲𝗺 𝗽𝗮𝗿𝗮 𝘀𝗮 𝗢𝗙𝗪𝘀

Direkta at mas mabilis na ang pangungumusta sa mga overseas Filipino workers (OFWs) sa pamamagitan ng Kumusta Kabayan App— isang digital welfare monitoring system na nanglalayong tiyakin ang kaligtasan at kapakanan ng mga OFWs saan mang panig ng mundo.

Alinsunod sa direktiba ni Pangulong Ferdinand R. Marcos Jr. na seguraduhin ang maayos na kondisyon at kapakanan ng mga OFWs, inilunsad ng Department of Migrant Workers (DMW) at ng Overseas Workers Welfare Administration (OWWA) ang Kumusta Kabayan App na maaaring mai-download ng mga OFWs sa kanilang mga mobile phones para sa mas mabilis at agarang tulong sa kanilang pangangailangan o anumang emergency.

"Ang Kumusta Kabayan App ay magkatuwang na binuo ng DMW at OWWA para sa direktang pagsubaybay sa kalagayan ng ating mga OFWs. Higit sa lahat, gusto nating maipadama sa bawat OFW ang kanilang kahalagahan bilang Bagong Bayani ng ating bansa dahil tayo mismo ang direktang tatawag sa kanila upang mangamusta, at seguraduhin ang agarang tulong sa kanilang pangangailanagan,” pahayag ni Secretary Hans Leo J. Cacdac.

Ang Kumusta Kabayan App ay konektado sa DMW-OWWA electronic system at database ng OFW registration at membership, case management, at welfare reporting.

Ilan sa mga features ng app ay ang “Kumusta Kabayan” Survey kung saan maaaring sagutin ng OFW ang kanyang kalagayan sa kanyang employer, ang kalidad ng kanyang working at living condition, at kung tama at nasa takdang panahon ang kanyang sahod.

Kasama din sa app ang kumpletong hotline numbers ng DMW-OWWA, and 1348 na maaaring tawagan ng mga OFWs 24/7 para sa anumang emergency. Makikita din ang hotline numbers ng mga Migrant Workers Offices at DMW Regional Offices.

Sa pamamagitan ng app, ang mga OFW ay mabilis na ring makakatawag sa DMW para sa anumang tulong mula sa DMW AKSYON Fund, gaya ng repatriation, legal, pinansyal, at reintegration assistance. # # #

09/09/2025

19/08/2025

News Alert
Migrant Workers Protection Bureau

𝟮 𝗝𝗮𝗽𝗮𝗻𝗲𝘀𝗲 𝗟𝗮𝗻𝗴𝘂𝗮𝗴𝗲 𝗖𝗲𝗻𝘁𝗲𝗿𝘀 𝘀𝗮 𝗖𝗲𝗯𝘂 𝗻𝗮 𝗦𝗮𝗻𝗴𝗸𝗼𝘁 𝘀𝗮 𝗜𝗹𝗹𝗲𝗴𝗮𝗹 𝗥𝗲𝗰𝗿𝘂𝗶𝘁𝗺𝗲𝗻𝘁, 𝗶𝗽𝗶𝗻𝗮𝘁𝗶𝗴𝗶𝗹 𝗻𝗴 𝗗𝗠𝗪 𝗮𝗻𝗴 𝗼𝗽𝗲𝗿𝗮𝘀𝘆𝗼𝗻

𝘊𝘦𝘣𝘶, 𝘗𝘩𝘪𝘭𝘪𝘱𝘱𝘪𝘯𝘦𝘴 — Sa bisa ng Closure Order Nos. 28 at 29, Series of 2025 ay ipinasara ng Department of Migrant Workers (DMW) ang dalawang Japanese language centers na parehong matatagpuan sa Cebu matapos mapatunayang sangkot ang mga ito sa illegal recruitment dahil ng pag-aalok ng trabaho sa Japan nang walang lisensya o awtoridad mula sa DMW.

Unang isinagawa ang operasyon sa Basalo Japanese Language School, Inc. (Basalo) sa Minglanilla, Cebu. Ayon sa imbestigasyon, modus ng Basalo ang pag-aalok ng anim na buwang Japanese language training kapalit ng halagang ₱72,000 bilang training fee. Pagkatapos umano ng training, ire-refer ang mga aplikante sa umano’y partner employers sa Japan para magtrabaho bilang caregiver, housekeeper, butcher, o food processor sa ilalim ng Specified Skilled Worker Program.

Sumunod na ipinasara ang Nalacebu Language Training Center (Nalacebu) sa Cebu City. Nag-aalok ito ng N4 at N5 level Japanese language training na nagkakahalaga ng ₱22,500. Matapos ang training, kailangang pumasa ang mga aplikante sa pagsusulit upang sila ay umano’y maipadala sa Japan bilang housekeeper, caregiver, o factory worker sa pamamagitan ng umano’y partner agency na may lisensya ng DMW. Ayon sa Nalacebu, walang babayarang placement fee ang mga aplikante dahil dadaan din ito sa Specified Skilled Worker Program ng Japan.

Kasunod ng pagsasara, isasama sa DMW List of Persons with Derogatory Record ang mga opisyal ng Basalo at Nalacebu. Inirekomenda rin ng DMW sa Pamahalaang Bayan ng Minglanilla at Pamahalaang Panlungsod ng Cebu ang kanselasyon ng kanilang business permits. Nadiskubre kalaunan na ang Basalo ay walang business permit sa Minglanilla, Cebu. Bukod dito, inirekomenda rin ang pagkansela ng rehistrasyon ng Basalo sa Securities and Exchange Commission (SEC) at ng Nalacebu sa Department of Trade and Industry (DTI).

Nanawagan ang DMW sa mga naging biktima ng Basalo at Nalacebu na makipag-ugnayan sa DMW Regional Office VII sa Ground Floor, DOLE Building, Gorordo Avenue, Cebu City o sa pamamagitan ng kanilang page: https://www.facebook.com/dmwrovii.

31/07/2025

News Alert
Migrant Workers Protection Bureau
09 July 2025

𝗢𝗽𝗲𝗿𝗮𝘀𝘆𝗼𝗻 𝗻𝗴 𝗯𝗲𝗮𝘂𝘁𝘆 𝘀𝗮𝗹𝗼𝗻 𝗮𝘁 𝗹𝗲𝗮𝗿𝗻𝗶𝗻𝗴 𝗰𝗲𝗻𝘁𝗲𝗿, 𝗶𝗽𝗶𝗻𝗮𝗵𝗶𝗻𝘁𝗼 𝗻𝗴 𝗗𝗠𝗪 𝗱𝗮𝗵𝗶𝗹 𝘀𝗮 𝗶𝗹𝗹𝗲𝗴𝗮𝗹 𝗿𝗲𝗰𝗿𝘂𝗶𝘁𝗺𝗲𝗻𝘁

𝘊𝘢𝘷𝘪𝘵𝘦, 𝘗𝘩𝘪𝘭𝘪𝘱𝘱𝘪𝘯𝘦𝘴 — Isinagawa ng Department of Migrant Workers (DMW) ang sabayang pagsasara ng VMJ Beauty Salon and Spa (VMJ) at JEF & EDS Learning Center (JEF & EDS) sa Imus, Cavite matapos matukoy na ginagamit ang mga ito sa operasyon ng illegal recruitment.

Batay sa imbestigasyon ng DMW, nag-aalok ang VMJ ng mga trabahong hairdresser, manikurista, at nail technician patungong Saudi Arabia kapalit ng inaasahang buwanang sahod na humigit-kumulang Php 35,000. Gayunman, kinakailangan umanong sumailalim muna sa training ang mga aplikante at magbayad ng Php 15,000 bilang training fee, na maaaring bayaran ng hulugan.

Samantala, ang JEF & EDS ay nagsisilbing pansamantalang tinutuluyan ng mga aplikante ng VMJ. Dati rin umano itong ginagamit bilang training center ng salon.
Ang pagpapasara ng DMW ay isinagawa alinsunod sa Closure Order Nos. 17 at 18, Series of 2025. Napatunayang walang kaukulang lisensya o akreditasyon mula sa DMW ang nasabing salon at learning center, paglabag sa itinakda ng Republic Act No. 8042, as amended by RA 10022.

Dahil dito, mahaharap sa kasong illegal recruitment ang mga may-ari at opisyal ng VMJ at JEF & EDS. Isasama rin sila sa DMW List of Persons and Entities with Derogatory Record. Irerekomenda rin ng DMW ang pagkansela ng kanilang business permits sa Pamahalaang Lungsod ng Imus.

Nanawagan ang DMW sa lahat ng posibleng biktima ng VMJ at JEF & EDS na makipag-ugnayan sa Migrant Workers Protection Bureau sa pamamagitan ng https://www.facebook.com/dmwairtip para sa libreng tulong legal.

31/07/2025

𝗕𝗔𝗕𝗔𝗟𝗔 𝗦𝗔 𝗣𝗨𝗕𝗟𝗜𝗞𝗢

Government-to-Government placement? Kung wala sa DMW website, hindi totoo!

Mag-ingat sa mga nangangako ng trabaho sa abroad sa ilalim ng Government-to-Government(G2G) na proseso kapalit ng bayad.

✓ Ang tunay na G2G placement ay tanging sa DMW Pre-employment and Government Placement Bureau (PEGPB) lamang pinoproseso ang mga dokumento at binabayaran ang mga nararapat na fees.

✓ Bisitahin ang DMW Website para sa lehitimong anunsyo ng G2G VACANCIES.

✓ Bisitahin ang DMW Pre Employment and Government Placement Bureau In Action, ang legitimate Facebook account ng G2G Activities.

Maging matalino, huwag magpaloko! Kung may kahina-hinalang transaksyon, i-report agad sa DMW!