05/09/2025
LATHALAIN | Sa Bawat Lente: Sandekadang Serbisyo, Libong Buhay ang Nabago
Sa katahimikan ng umagang binabalutan ng hamog, tila isang hudyat ang bumubungad—ang pulang sasakyan na marahang humihimpil sa silangang bahagi ng paaralan, wari’y nag-iiwan ng bakas ng apoy na muling magpapaalab sa araw ng bawat g**o at mag-aaral.
Sa loob ng sampung taon, ang bawat pagdating ni G. Danilo C. Quitoriano, 59 taong gulang at punong-g**o ng Teodoro Hernaez National High School, ay nagsilbing hudyat ng panibagong umaga lalo na’t ang pulang sasakyan nito ay waring salamin ng apoy sa kanyang puso—matatag, maalab, at laging handang umagapay.
Sa isang dekadang serbisyo at pamumuno sa THNHS, ilang lente na ang humusga’t pumuri sa kakayahan niya bilang isang pinunong walang ibang hinangad kundi ang makitang mamayagpag ang kaniyang paaralan sa iba’t ibang aspeto at larangan.
Karangalan at Pagsubok: Sa Perspektibo ng Kapwa G**o
“Si Sir Danny ay visionary, demanding but humble at isang transformative na leader.” Ganito ilarawan ni Gng. Maria Novena H. Sarmiento, Head Teacher III ng THNHS, si Sir Danny sa loob ng sampung taon nilang pagsasama bilang mga g**o.
Enero taong 2015, nang muling magtagpo ang kanilang mga landas sa parehong paaralan kung saan sila nanunungkulan ngayon.
Salaysay ni Gng. Sarmiento, bago pa man sila maging magkatrabaho ay magkakilala na sila lalo’t magkaibigan at parehong kasapi ng organisayong Guardians of Luzon ang kaniyang ama at si Sir Danny. Dahilan kung bakit mabilis din silang nagpalagayan ng loob.
“Isang pagsubok at karangalan na makasama ko siya sa trabaho,” saad niya nang tanungin siya kung anong uri ng katrabaho si Sir Danny.
Dalawang beses nang naihalal si Sir Danny bilang pangulo ng School Heads and School Administrators Association of Schools Division of Ilocos Sur at pinarangalan bilang “Outstanding School Head” noong 2018.
Bagaman malayo na ang narating ni Sir Danny, ayon kay Gng. Sarmiento, hindi mahalaga para sa kaniya ang pagsulong ng kaniyang posisyon, higit na mahalaga rito ang pagtanggap ng mga g**o at mga naninilbihan ng mga bagay na nararapat para sa kanila.
Sa kabila ng ilang hindi pagkakaintindihan bunga ng pagkakaiba-iba ng paniniwala, nahahanapan pa rin nila ng paraan upang maisantabi ang kanilang hindi pagkakatulad sa ngalan ng kanilang katungkulan bilang mga g**o.
Saan man, Kailan man: Sa Paningin ng Bawat Mag-aaral
Mag-aaral → Praktikanteng G**o → Lisensyadong Tagapagturo — real quick!
Saksi si Bb. Lhea Gorospe, 26 taong gulang, ngayo’y g**o na sa THNHS, sa namumukod-tanging pamamahala ni Sir Danny bilang isang punong-g**o.
"Si Sir Danny ay isang punong-g**o na madaling lapitan, matulungin, at tunay na namumukod-tangi. Hanggang ngayon na isa na akong g**o, hindi siya kailanman nagbago," salaysay ni Bb. Gorospe habang minumutawi ang mga panahong ginugol niya sa ilalim ng pamumuno ni Sir Danny.
Unang nagkakilala si Bb. Gorospe at Sir Danny noong siya ay isa pa lamang mag-aaral ng ika-10 baitang at unang taon noon ng panunungkulan ni Sir Danny bilang punong-g**o. Sampung taon na ang nakalilipas ngunit nananatili pa rin ang mga aral at inspirasyong tila naging marka na ng kanilang mala-roller coaster na samahan.
"Noong 2019, isa pa lamang akong practice teacher sa THNHS at siya pa rin noon ang punong-g**o. Sa panahong iyon, nagduda ako kung kakayanin ko ba ang mga hamon sa pagiging lisensyadong g**o, ngunit binigyan kami ng inspirasyon ni Sir Danny," dagdag ni Bb. Gorospe bilang pasasalamat sa suportang kaniyang natanggap.
Saan man, kailan man, hindi matatawaran ang papel na ginampanan ni Sir Danny sa pagkamit ng mga pangarap ni Bb. Gorospe—mula noong iniwan niya ang THNHS hanggang sa muli niya itong binalikan at pagsilbihan bilang isang ganap na lisensyadong g**o.
Haligi’t Sandigan ng Tahanan: Sa Imahen ng Pamilya
“Hindi lang siya pinuno ng paaralan, siya rin ang haligi ng aming pamilya,” pagbabahagi ng kaniyang anak na si Gng. Jesusa Lynn Q. Reyes, isang ganap na nars. Para sa kaniya, higit na nakikita ang ama hindi sa kaniyang posisyon kundi sa paraan ng paggabay at pagbibigay-lakas sa kaniyang mga minamahal.
Sa tahanan, si Sir Danny ay hindi lamang tagapayo kundi kaagapay. Mula sa mga simpleng pag-uusap hanggang sa malalaking desisyon, pinapakita niya na ang tunay na ama ay nakikinig, umuunawa, at laging inuuna ang kaniyang pamilya.
“Si Danilo ay hindi lamang asawa; siya ang aking kaagapay at sandigan,” ani ng kanyang kabiyak. Sa kabila ng mga pagsubok ng kanilang buhay mag-asawa, nananatili siyang tapat at matatag na katuwang at kaagapay nito sa buhay.
Sa kanilang tahanan, malinaw kung sino siya: isang huwarang ama at mapagmahal na asawa ngunit higit sa lahat, si Sir Danny ang nagsisilbing haligi ng pamilya—ang ilaw at gabay na patuloy na nagbibigay ng lakas at pag-asa.
Bagaman umuunlad at patuloy na namamayagpag ang THNHS, mananatiling hitik ang bawat sulok nito sa bunga ng lahat ng aral at inspirasyong ipinupunla ni Sir Danny. Lagi’t laging hudyat ang bumubungad niyang pulang sasakyan na siyang nag-iiwan at patuloy na mag-iiwan ng bakas—tanda ng kaniyang pagiging matatag bilang pinuno, g**o, at ama sa lahat ng gustong matuto.
**o
🎨Camill Ruth Suyat
✍🏻Szean Justine Abarquez, Dyhen Hemerald Ramilo, Jhoana Lharisse Palencia, & Prince Darell Quitoriano
