28/09/2026
Umabot sa 76 bags ng dugo ang nakolekta sa isinagawang mass blood donation activity ng Lokal na Pamahalaan ng San Teodoro noong Setyembre 25, 2026, bilang bahagi ng patuloy na pagsusulong ng serbisyong pangkalusugan at kahandaan ng komunidad.
Isinagawa ang bloodletting activity sa Municipal Disaster Risk Reduction and Management Office (MDRRMO) Building mula alas-8 ng umaga hanggang alas-12 ng tanghali, kung saan nakiisa ang mga kawani ng munisipyo at iba't ibang sektor ng bayan.
Kabilang sa mga lumahok ang mga tauhan ng Philippine National Police (PNP), Bureau of Jail Management and Penology (BJMP), Bureau of Fire Protection (BFP), mga barangay officials, barangay tanod at barangay health workers.
Nagpaabot din ng suporta ang ilang non-government organizations, kabilang ang Treslelion Fraternity, na nakiisa rin sa blood donation drive.
Ayon sa lokal na pamahalaan, mahalaga ang ganitong mga aktibidad upang mapalakas ang suplay ng dugo na maaaring magamit ng mga pasyenteng nangangailangan ng agarang blood transfusion, partikular sa panahon ng mga emergency at iba pang sitwasyong medikal.
Ikinatuwa ni Mayor Karen Ponce-Miranda ang naging resulta ng aktibidad at pinasalamatan ang mga indibidwal, tanggapan, organisasyon at iba pang sektor na naglaan ng oras upang makibahagi sa programa.
Samantala, sinabi ni Dr. Nadine Miranda, Municipal Health Officer ng San Teodoro, na mas malinaw na naipakita ng mga Teodoreรฑo ang kanilang kahandaang makibahagi sa blood donation kumpara sa mga nakaraang pagsasagawa ng katulad na aktibidad.
Aniya, ang mataas na bilang ng nakolektang dugo ay nagpapakita ng patuloy na pag-unawa ng komunidad sa kahalagahan ng boluntaryong pagbibigay ng dugo.
Ibinahagi naman ni Dr. Vasille Leif Jose, Doctor to the Barrio (DTTB), ang mga naging hamon, sakripisyo at tagumpay ng bayan sa pagpapatupad ng mga programang pangkalusugan, partikular ang immunization program sa mga liblib na lugar at mga pamayanang katutubo.
Ayon kay Dr. Jose, mahalaga ang tuloy-tuloy na pagdadala ng serbisyong medikal sa mga komunidad na malayo sa sentrong bayan upang matiyak na hindi maiiwan ang mga residenteng may limitadong access sa health services.
Kabilang sa mga binigyang-pansin ang pagpapatupad ng immunization activities sa mga katutubong pamayanan, na nangangailangan ng koordinasyon at patuloy na pakikipag-ugnayan sa mga komunidad upang mahikayat ang mga residente na makinabang sa mga serbisyong pangkalusugan. | via Junard Acapulco
