31/08/2026
Sa ating mga Junior City Officials, ang inyong paglilingkod ay simula pa lamang. 🇵🇭
Ngayong National Heroes Day, kasabay ng paggunita natin sa mga bayaning nag-alay ng kanilang buhay para sa bayan, nais kong ipaalala sa ating mga kabataan na ang kabayanihan ay hindi lamang bahagi ng nakaraan.
May kabayanihang hinihintay ang bawat henerasyon.
Sa pagtatapos ng inyong panunungkulan bilang Junior City Officials ngayong Linggo ng Kabataan, dala ninyo ang isang mahalagang karanasan, ang matutong makinig, makibahagi, magdesisyon at maglingkod.
Hindi namin alam kung sino sa inyo ang magiging susunod na lider ng San Pedro, ng Laguna, o ng buong Pilipinas. Pero naniniwala ako na ang bawat isa sa inyo ay may kakayahang maging bayani ng sarili ninyong panahon.
Hindi kailangang maging sikat o makapangyarihan para makapaglingkod. Minsan, nagsisimula ang kabayanihan sa simpleng pagkilos para sa kapwa, sa paninindigan sa tama, at sa pagkakaroon ng malasakit sa komunidad.
Kayo ang susunod na henerasyon. Kayo ang susunod na mga lider. At kayo rin ang mga bayani na huhubog sa kinabukasan ng ating bayan.
Maraming salamat sa inyong serbisyo. Dalhin ninyo ang mga natutunan ninyo at patuloy kayong mangarap, kumilos, at maglingkod.
Happy National Heroes Day, San Pedronians! 🇵🇭
