05/05/2026
IN PHOTOS
Personal na inihain ni Mayor Florida "Ate Rida" Robes ang Notice of Takeover ng City Government of San Jose del Monte, Bulacan sa operasyon at serbisyo ng tubig sa lungsod nitong Martes, May 5, sa mismong tanggapan ng San Jose del Monte Water District sa Brgy. Minuyan Proper.
Kasama ng Punong Lungsod sa paghain ng dokumento sina Congressman Arthur Robes at City Administrator Atty. Rizaldy Mendoza sa pamunuan ng Water District na ka-joint venture partner ng Primewater Infrastructure Corp. Pormal at buong puso namang tinanggap ito ng pamunuan ng SJDM Water District na sina Chairman Aurelio Jose Jr., General Manager Engr. Loreto Limcolioc, at Spokesperson Atty. Leah Javier.
Sinaksihan ito ng mga miyembro ng Sangguniang Panlungsod, Department Heads ng Pamahalaang Lungsod, mga punong barangay, empleyado ng Water District at iba pang sektor.
Ang desisyong ito ay kasunod ng paglalabas ng notice of termination ng Water District sa joint venture agreement nito sa Primewater noong nakaraang taon, gayundin ng hindi pag-renew ng business permit ng kumpanya ngayong taon bunsod ng hindi sapat at hindi maaasahang suplay ng tubig.
Sa bisa ng City Ordinance No. 2026-03-012, pangangasiwaan na ng Pamahalaang Lungsod ang operational control ng mga asset at pasilidad ng San Jose Water District at Primewater na may kaugnayan sa water supply at wastewater systems, gayundin ang pagsasagawa ng masusing pag-aaral para makapili ng interim o bagong water utility operator.
Nagkaroon din ng Press Conference kung saan nabigyan ng pagkakataon ang iba't ibang mga media na makapagtanong at malinawan sa pinaigting na hakbang ng pamahalaan upang tugunan ang lumalalang krisis sa distribusyon ng tubig sa lungsod.
Ang buong detalye, abangan sa Balitang San Jose N'yo.
📍San Jose del Monte Water District Office, Barangay Minuyan Proper
📸Arnold Rosas | Ken Resurreccion | Mags Oliva | Jonathan Dasal
