18/03/2023
Sa Mga Minamahal Kong Ka-Barangay:
Kaming mga sumusunod na mga lehitimong residente ng Barangay Muzon, ay nagsasalaysay ng aming saloobin tungkol sa mangyayaring paghahati ng Barangay Muzon upang maging apat na Barangay ayon na rin sa ipinanukalang Batas ng Igg. Florida P. Robes sa mababang Kapulungan.
Kami rin ay nagpapahayag ng aming damdamin, upang ipakita ang aming lubos na pagsuporta sa panukalang Batas Blg. 2379 (HB 2379) na maghahati sa Muzon upang maging apat na independente at magkakaibang Barangay na kikilalanin bilang Barangay Muzon Proper, Barangay Muzon East, Barangay Muzon West, at Barangay Muzon South.
Dahil dito kaming mga lehitimong residente ng Barangay Muzon ay nagbibigay ng mga sumusunod na pahayag upang ipabatid sa kaalaman ng lahat ang aming nakikitang kadahilanan ng aming pagsang-ayon sa panukalang Batas na ito:
1. Dahil sa ang Barangay Muzon ay ang pinakamatao o pinakamaraming populasyon sa lahat ng Barangay sa Lungsod ng San Jose Del Monte, Kaya naman isang mabisang hakbang ang paghahati nito sa apat na Barangay upang may lalo pang maging epektibo, mabilis at Angkop ang mga serbisyo na magbibigay sa mas maraming Mamamayan;
2. Kung maghahati Ito sa apat na Barangay Muzon, mas magkakaroon ng tuon at pokus ang mga pinuno ng Barangay sa mas maliit na bilang ng populasyon na kanilang nasasakupan daan upang matugunan ang mas maraming pangangailangan ng mga Mamamayan;
3. Kung magiging apat na Barangay ang Muzon, magbibigay din ito ng pagkakataon na mas mapansin ang mas maliit na Mamamayan upang magkaroon ng mas maraming programa na magpapaunlad sa kanilang kakayahan at kabuhayan;
4. Mas magiging mabilis ang pagresponde at pag-aksyon ng Barangay sa Suliranin ng mga Mamamayan Dahil apat na Pamahalaang Barangay na ang gagalaw para sa kanilang Mamamayan;
5. Mas magiging mabunga at produktibo ang mga Mamamayan Kung magiging apat na Barangay na ang Muzon, Dahil hihikayat Ito ng mas aktibong partisipasyon ng mga Mamamayan at mga Samahan upang abutin ang mas maunlad na pamayanan;
6. Magkakaroon ng mas maraming Angkop at napapanahong polisiya ang apat na Pamahalaang Barangay para sa Mamamayan.
7. Mapapaigting ang kapayapaan, kaayusan at disiplina Kung mahahati sa apat na Barangay ang Muzon.
8. Mas maraming proyektong pang-imprastraktura at pangkaunlaran ang mailalagay Kung apat na Barangay ang mayroon.
9. Isang mas malinaw na tukoy hangganan o boundary ang makikilala ng Mamamayan Kung mangyayari ang paghahati ng Barangay Muzon.
10. Sa aming pananaw, wala namang lalabaging Batas o sasagasaang karapatan ang paghahati ng Barangay Muzon Dahil ayon sa Section 385 at 386 ng Local Government Code, ang isang Barangay ay maaaring hating hanggat Hindi Ito makaaapekto sa bilang ng populasyon na itinakda ng Batas at wala itong sinasagasaang karapatan at kapangyarihan.
11. Ang Manipesto na Ito ay kumikilala sa karapatan ng bawat indibidwal na magpapahayag ng mga saloobin hinggil sa mga isyung Panlipunan Tulad na lamang ng paghahati ng Barangay Muzon sa apat na Barangay.
12. Huwag sanang isipin na ang Manipesto na ito ay para lamang sa kapakanan ng Ilan bagkus Ito ay nagpapakita ng matapat at patas na saloobin batay na rin sa masusing obserbasyon at nagkakaisang adhikain ng mga Mamamayan.
MARAMING SALAMAT PO!
!
