LTO San Agustin

03/09/2026

𝐃𝐀𝐋𝐀𝐖𝐀𝐍𝐆 𝐒𝐔𝐕, 𝐍𝐀𝐒𝐀𝐁𝐀𝐓 𝐍𝐆 𝐋𝐓𝐎 𝐃𝐀𝐇𝐈𝐋 𝐒𝐀 𝐏𝐀𝐆𝐆𝐀𝐌𝐈𝐓 𝐍𝐆 𝐏𝐄𝐊𝐄𝐍𝐆 𝐀𝐅𝐏 𝐀𝐓 𝐋𝐓𝐎 𝐏𝐋𝐀𝐓𝐄, 𝐁𝐋𝐈𝐍𝐊𝐄𝐑 𝐀𝐓 𝐖𝐀𝐍𝐆-𝐖𝐀𝐍𝐆; 𝐌𝐆𝐀 𝐃𝐑𝐀𝐘𝐁𝐄𝐑 𝐊𝐀𝐊𝐀𝐒𝐔𝐇𝐀𝐍

Dalawang sasakyan ang unang nasabat ng Land Transportation Office (LTO) ngayong buwan ng Setyembre matapos maaktuhang gumagamit umano ng mga pekeng plaka ng Armed Forces of the Philippines (AFP) at LTO, bilang bahagi ng pinaigting na enforcement operations ng ahensya laban sa paggamit ng mga hindi awtorisadong plaka sa ilalim ng pamumuno ni Assistant Secretary Markus V. Lacanilao.

Sa isinagawang operasyon, natuklasang nakatago sa loob ng mga sasakyan ang kanilang mga orihinal na plaka habang ang mga hindi awtorisadong plaka ang nakakabit at ginagamit sa kalsada, na umano’y nagbibigay ng impresyong may espesyal na awtoridad o pagkakakilanlan ang mga ito.

Bukod dito, nakumpiska rin sa mga nasabing sasakyan ang pekeng conduction sticker, mga blinker at “wang-wang,” na pawang isinailalim sa kaukulang beripikasyon at dokumentasyon ng mga operatiba.

Nakita rin sa mga sasakyan ang ilang sticker na may pangalan o nagpapahiwatig ng kaugnayan sa isang miyembro ng Kongreso. Kasama rin itong sinusuri upang matukoy ang pinagmulan at layunin ng paggamit ng naturang mga pagkakakilanlan.

Kaugnay nito, pansamantalang inilagay sa kustodiya ng LTO ang dalawang sasakyan at isasailalim sa kaukulang proseso, kabilang ang masusing beripikasyon ng kanilang mga dokumento, plaka, at iba pang nakumpiskang kagamitan at identification markings, habang nagpapatuloy ang imbestigasyon upang matukoy ang mga responsable at ang kaugnay na mga paglabag.

Ani Asec. Lacanilao, “Hindi porke may kakilala ka sa gobyerno ay pwede ka nang gumamit ng pekeng plaka o pagkakakilanlan upang makaiwas sa batas-trapiko o magkaroon ng espesyal na pagtrato sa lansangan, maling-mali po iyon, kahit sinuman ang koneksyon mo sa gobyerno pantay po ang aming pagtrato sa lahat ng motorista.”

Mananatiling mahigpit ang LTO sa pagsasagawa ng malawakang enforcement operations at beripikasyon laban sa paggamit ng pekeng plaka at iba pang ilegal na kagamitan. Hinihikayat naman ng ahensya ang lahat ng motorista na gumamit ng wasto, lehitimo, at awtorisadong plaka at kagamitan, sumunod sa umiiral na batas-trapiko, at agad na ireport sa LTO ang mga kahina-hinalang sasakyan upang makatulong sa pagpapanatili ng ligtas, maayos, at pantay na kalsada para sa lahat.

02/09/2026

𝐋𝐄𝐀𝐃𝐈𝐍𝐆 𝐄𝐃𝐆𝐄 𝐀𝐔𝐓𝐎𝐌𝐎𝐁𝐈𝐋𝐄𝐒 𝐏𝐇𝐈𝐋𝐈𝐏𝐏𝐈𝐍𝐄𝐒, 𝐈𝐍𝐂. – 𝐁𝐆𝐂 𝐁𝐑𝐀𝐍𝐂𝐇 (𝐋𝐄𝐀𝐏-𝐁𝐆𝐂), 𝐒𝐔𝐒𝐏𝐄𝐍𝐃𝐈𝐃𝐎 𝐀𝐓 𝐏𝐈𝐍𝐀𝐆𝐌𝐔𝐋𝐓𝐀; 𝐌𝐆𝐀 𝐍𝐈𝐋𝐀𝐁𝐀𝐆 𝐀𝐓 𝐊𝐀𝐔𝐊𝐔𝐋𝐀𝐍𝐆 𝐏𝐀𝐑𝐔𝐒𝐀, 𝐓𝐈𝐍𝐔𝐊𝐎𝐘

Lumabas sa imbestigasyon ng Land Transportation Office (LTO) na ang Leading Edge Automobiles Philippines, Inc. – BGC Branch (“LEAP-BGC”), isang LTO-accredited motor vehicle dealer, ay nagpahintulot sa LEAP Mandaluyong Branch, na walang sariling LTO accreditation, na magbenta ng 19 na sasakyan gamit ang accreditation ng LEAP-BGC.

Ang LEAP-BGC mismo ang nag-isyu ng sales invoices at nagproseso ng sales reports at registration ng nasabing 19 na sasakyan. Dahil dito, makikita sa records ng LTO na ang mga transaksyon ay ginawa sa ilalim ng accreditation ng LEAP-BGC.

Natuklasan din ng LTO ang mga pagkakaiba sa petsa ng bentahan ng 13 sa 19 na sasakyan. Ang mga petsang ini-report sa LTO ay hindi tumutugma sa aktwal na petsa ng bentahan na nakasaad sa kaukulang sales invoices.

Malaki ang inabot ng administrative fine na ipinataw ng LTO sa LEAP-BGC, batay sa graduated penalty schedule na nagtatakda ng P500,000.00 bawat transaksyon para sa serious offense at P100,000.00 bawat transaksyon para sa less serious offense. Kabilang sa mga paglabag ang pagpapahintulot sa unaccredited LEAP Mandaluyong Branch na magbenta ng 19 na sasakyan gamit ang accreditation ng LEAP-BGC; ang pag-isyu ng sales invoices at pagproseso ng sales reports at registration ng nasabing 19 na sasakyan; at ang maling pag-uulat ng petsa ng bentahan ng 13 sasakyan.

“Hindi natin papayagan na gamitin ang mga accredited dealer bilang front para sa mga unauthorized transactions. Pare-pareho ang ating mga patakaran para sa lahat, at mananagot ang sinumang magtatangkang umiwas o lumusot sa mga ito,” pahayag ni Asec. Lacanilao.

Pinaalalahanan din ng LTO Chief ang lahat ng accredited dealers na sila ang may pananagutan sa pagiging tama at makatotohanan ng lahat ng sales reports, invoices, registration documents at iba pang records na kanilang isinusumite sa ahensya.

“Nakasalalay sa tama at makatotohanang records ang integridad ng ating motor vehicle registration system. Patuloy nating paiigtingin ang monitoring at enforcement upang maprotektahan ang publiko at matiyak na sumusunod ang lahat ng accredited dealers sa mga patakaran at regulasyon ng LTO,” dagdag niya.

02/09/2026

01/09/2026

01/09/2026

𝐋𝐓𝐎, 𝐔𝐌𝐀𝐊𝐒𝐘𝐎𝐍 𝐒𝐀 𝐑𝐎𝐀𝐃 𝐑𝐀𝐆𝐄 𝐍𝐀 𝐊𝐈𝐍𝐀𝐒𝐀𝐍𝐆𝐊𝐔𝐓𝐀𝐍 𝐍𝐆 𝐌𝐆𝐀 𝐃𝐑𝐈𝐕𝐄𝐑 𝐍𝐆 𝐓𝐀𝐗𝐈 𝐀𝐓 𝐓𝐑𝐔𝐂𝐊; 𝐒𝐂𝐎 𝐈𝐍𝐈𝐋𝐀𝐁𝐀𝐒, 𝐌𝐆𝐀 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀

Agad na kumilos ang Land Transportation Office (LTO), sa ilalim ng pamumuno ni Assistant Secretary Markus V. Lacanilao, matapos makarating sa ahensya ang viral video ng isang road rage incident na kinasangkutan ng isang taxi at isang truck. Dahil dito, naglabas ang LTO ng Show Cause Order (SCO) laban sa dalawang driver at kanilang mga rehistradong may-ari.

Batay sa video na inilabas ng page na “The Visor,” makikita ang tatlong indibidwal na sakay ng truck na sabay-sabay na umaatake at nananakit sa isang taxi driver sa gitna ng kalsada. Sa naturang pangyayari, nakapuwesto rin ang truck sa paraang nakahahadlang sa maayos na daloy ng trapiko.

Samantala, sa hiwalay na video na nakarating sa ahensya, makikitang naghagis ng isang bagay ang taxi driver at ilang ulit na hinampas ng tubo ang windshield ng truck. Matapos nito, hinabol niya ang mga sakay ng truck habang dala pa rin ang tubo at nakipagtalo sa driver nito. Nagpatuloy ang komprontasyon hanggang sa hampasin niya ang pintuan sa bahagi ng driver, na nagresulta sa pagkabasag ng salamin nito.

Dahil sa ipinakitang pag-uugali ng mga sangkot na driver sa kalsada, agad na nagsagawa ng kaukulang aksyon ang LTO. Kinakailangan nilang humarap sa tanggapan ng Intelligence and Investigation Division (IID) ng LTO Central Office para sa pagdinig sa Setyembre 7, 2026 at magsumite ng kanilang sinumpaang salaysay o paliwanag, kalakip ang mga dokumentong maaaring sumuporta sa kanilang panig kaugnay ng insidente.

Kabilang sa mga dapat nilang ipaliwanag ay kung bakit hindi sila dapat managot sa mga paglabag na nakasaad sa SCO. Kailangang ipaliwanag ng truck driver kung bakit hindi siya dapat managot sa paglabag na Obstruction of Traffic, gayundin kung bakit hindi dapat ideklarang Improper Person to Operate a Motor Vehicle ang dalawang driver, na maaaring humantong sa pagsuspinde o pagbawi ng kanilang mga lisensya sa pagmamaneho.

Samantala, kinakailangan ding ipaliwanag ng rehistradong may-ari o operator ng taxi kung bakit hindi siya dapat managot sa paglabag na Employing Reckless, Insolent, Discourteous or Arrogant Drivers kaugnay ng pag-uugali ng kanyang driver.

Kasabay ng pagpapalabas ng SCO, kinakailangang isuko ng mga sangkot na driver ang kanilang mga lisensya sa IID at ipatutupad ang 90-araw na preventive suspension. Inilagay din sa alarm status ang truck at pampasaherong taxi habang nagpapatuloy ang imbestigasyon.

“Ang lisensya sa pagmamaneho ay hindi pribilehiyong dapat napupunta sa mga taong walang kontrol sa sarili at ginagawang lugar ng karahasan ang kalsada. Hindi ito katanggap-tanggap. Hindi namin kukunsintihin ang ganitong marahas na pag-uugali at sisiguraduhin naming mananagot ang mga sangkot,” pahayag ni Asec. Lacanilao.

Muling ipinapaalala ng LTO na mahigpit nitong ipatutupad ang mga patakaran laban sa road rage at anumang uri ng karahasan sa kalsada. Hinihikayat ang lahat ng motorista na pairalin ang disiplina, pagpipigil sa sarili at paggalang sa kapwa. Sa halip na makipagtalo o gumanti, manatiling kalmado at unahin ang kaligtasan ng lahat. Ang motoristang pinagkalooban ng lisensya ay inaasahang may disiplina.

01/09/2026

𝐌𝐀𝐏𝐀𝐍𝐆𝐀𝐍𝐈𝐁 𝐍𝐀 𝐏𝐀𝐆-𝐎𝐎𝐕𝐄𝐑𝐓𝐀𝐊𝐄 𝐍𝐆 𝐏𝐀𝐌𝐏𝐀𝐒𝐀𝐇𝐄𝐑𝐎𝐍𝐆 𝐁𝐔𝐒, 𝐈𝐍𝐀𝐊𝐒𝐘𝐔𝐍𝐀𝐍 𝐍𝐆 𝐋𝐓𝐎; 𝐒𝐂𝐎 𝐈𝐍𝐈𝐋𝐀𝐁𝐀𝐒, 𝐋𝐈𝐒𝐄𝐍𝐘𝐀 𝐍𝐆 𝐃𝐑𝐀𝐘𝐁𝐄𝐑 𝐒𝐔𝐒𝐏𝐄𝐍𝐃𝐈𝐃𝐎 𝐀𝐓 𝐁𝐔𝐒 𝐈𝐍𝐀𝐋𝐀𝐑𝐌𝐀

Sa ilalim ng pamumuno ni Land Transportation Office (LTO) Chief, Assistant Secretary Markus V. Lacanilao, agad na umaksyon ang ahensya at nagpalabas ng Show Cause Order (SCO) laban sa rehistradong may-ari at itinalagang drayber ng isang pampasaherong bus kaugnay ng isang insidenteng namataang mapanganib ang pagmamaneho.

Batay sa video na nakarating sa ahensya at nagsilbing batayan ng imbestigasyon, makikitang mapanganib na nag-overtake ang naturang bus at tumawid sa solid yellow lane na nagsisilbing traffic sign na nagbabawal sa pag-overtake at pagdaan sa kabilang linya.

Dahil sa malinaw na paglabag ng drayber, inaatasan ito na humarap sa tanggapan ng Intelligence and Investigation Division (IID) ng LTO Central Office para sa pagdinig sa Setyembre 4, 2026, at magsumite ng sinumpaang salaysay o paliwanag, kalakip ang mga dokumento na maaaring sumuporta sa kanilang paliwanag hinggil sa insidente.

Inaatasan ang drayber na magpaliwanag kung bakit hindi siya dapat maharap sa mga kaukulang paglabag sa ilalim ng R.A. 4136 na nakasaad sa SCO, kabilang ang Reckless Driving, Disregarding Traffic Sign, at Driving Against Traffic, gayundin kung bakit hindi dapat suspindihin o tuluyang bawiin ang kanyang lisensya dahil sa pagiging Improper Person to Operate a Motor Vehicle.

Samantala, kinakailangan din ipaliwanag ng rehistradong may-ari kung bakit hindi siya dapat managot sa mga paglabag na Employing Reckless, Insolent, and Arrogant Driver, at Breach of Franchise Conditions.

Isinailalim na rin sa alarm status ang naturang bus habang nagpapatuloy ang imbestigasyon. Kinakailangan namang isuko ng driver ang kanyang lisensya sa pagmamaneho sa IID, na isasailalim sa 90-araw na preventive suspension.

"Hindi namin palalampasin ang ganitong mapanganib na pagmamaneho, lalo na sa pampasaherong bus. Kung hindi kayang sumunod sa batas-trapiko, haharap sa pananagutan, ipatutupad namin ang nararapat na parusa,” saad ni Asec. Lacanilao.

Muling nagpapaalala ang LTO sa lahat ng motorista na mahigpit na sumunod sa batas-trapiko at iwasan ang anumang uri ng mapanganib na pagmamaneho. Patuloy na magsasagawa ng kaukulang aksyon ang ahensya laban sa mga lalabag upang matiyak ang kaligtasan ng lahat ng gumagamit ng kalsada.

Samantala, patuloy hinihikayat ng LTO ang publiko na iulat ang mga nasasaksihang paglabag sa opisyal na page na I-report mo kay LTO Chief o sa website na https://ireportmokayltochief.ph/ para sa maagap na imbestigasyon ng ahensya. Dahil sa LTO, bawat ulat ng paglabag, may aksyon.