05/06/2026
Nalambat sa Buy-Bust Operation sa Ilagan City, Nahulihan ng Pinaniniwalaang Shabu
Camp Rosauro D Toda, Jr., Cit of Ilagan, Isabela – Sa patuloy na pagsisikap na pigilan ang paglaganap ng ilegal na droga sa lalawigan ng Isabela, arestado ang isang 38-anyos na lalaki matapos mahulihan ng pinaniniwalaang shabu sa isinagawang buy-bust operation ng mga operatiba ng City Drug Enforcement Unit ng Ilagan City Component Police Station noong gabi ng Hunyo 4, 2026 sa Brgy. Aggassian, Ilagan City.
Kinilala ang suspek na si alyas “Allong”, isang pintor at residente ng nasabing barangay.
Batay sa ulat, nagsagawa ng anti-illegal drug operation ang CDEU operatives sa koordinasyon ng Philippine Drug Enforcement Agency Regional Office 2 na nagresulta ang operasyon sa pagkakaaresto ng suspek matapos umano nitong makipagtransaksyon sa poseur-buyer.
Nakumpiska mula sa suspek ang isang heat-sealed plastic sachet na naglalaman ng hinihinalang shabu na may timbang na humigit-kumulang 0.2 gramo at may Standard Drug Price na Php 1,360.00. Narekober din ang buy-bust money, isang motorsiklo, cash na nagkakahalaga ng Php 2,156.00, at isang Android cellular phone.
Mahaharap ang suspek sa kasong Paglabag sa Section 5, Article II ng Republic Act 9165 o Comprehensive Dangerous Drugs Act of 2002 at kasalukuyang nasa kustodiya ng Ilagam CCPS para sa dokumentasyon at tamang disposisyon.
Samantala, pinuri ni PCOL MANUEL B BRINGAS, Provincial Director ng Isabela Police Provincial Office, ang mga operatibang nagsagawa ng matagumpay na operasyon.
"Nananatiling nakatuon ang Isabela PPO sa pagpapatupad ng batas at sa pagpapanatili ng ligtas at mapayapang kapaligiran para sa bawat Isabelino. Hinihikayat din namin ang publiko na patuloy na makipagtulungan sa kapulisan sa laban kontra ilegal na droga,” ani PCOL Bringas.
Patuloy ang kampanya kontra ilegal na gamot ang Isabela PPO upang tuluyan ng mapuksa ang mga gumagamit o tumatangkilik nito.
# # #
