Congressman Lord Allan Jay Velasco

31/07/2025

July 31, 2025

PagbaBAGo : A Million Trees Campaign

Ngayong araw, ang Pangalawang Pangulo Sara Z . Duterte, kasama si Former Speaker Lord Allan Jay Velasco ay nagtungo sa Pulang Lupa Shrine sa bayan ng Torrijos para sa PagbaBAGo : A Million Trees Campaign.

Kasama ang Tanggapan ng DENR at PENRO Imelda Diaz, ang lokal na pamahalaan ng Munisipyo ng Torrijos sa pangunguna ni Mayor Joey Peñaflor, mga kinatawan ng Barangay Bolo sa pamumuno ni Brgy. Chairman Recto V. Rioveros at mga Sangguniang Kabataan mula sa iba’t ibang bayan ng Marinduque ay nagtanim ng mga puno ng Narra, Fire tree at Golden Shower ngayong umaga.

Layunin ng programang ito na makapagtanim ng isang libong mga puno sa Isla ng Marinduque alinsunod sa National Greening Program sa ilalim ng Executive Order 23 at 26 Series of 2011. Ang gawaing ito ay nagsusulong ng pagkakaisa para sa kalikasan at paanyaya sa mga mamamayan na makibahagi sa mas luntiang kinabukasan.

30/07/2025

July 30, 2025
PanSarap Project at PagbaBAGo Campaign

Personal na bumisita ang ating Pangalawang Pangulo, Sara Duterte, kasama si Dating Speaker Lord Allan Velasco, sa mga Paaralang Elementarya ng Talawan at Argao sa isla ng Marinduque.

Sa kanilang pagbisita, mainit silang sinalubong ng mga g**o at mag-aaral ng Talawan Elementary School sa pangunguna ni Marites R. Pelobello (Head Teacher II), kasama rin ang mga opisyal ng Barangay Talawan sa pamumuno ni Kapitan Ruel F. Macdon. Samantala, sa Argao Elementary School, pinangunahan ni Alerma M. Ola (Principal I) at Kapitan Ma. Cielo J. Solis ng Barangay Argao ang pagtanggap sa kanila.

Layunin ng PanSarap Project na tugunan ang karagdagang pangangailangang pangnutrisyon ng mga batang may edad 4–12 taong gulang na itinuturing na wasted at severely wasted. Isinasagawa ito sa pamamagitan ng pamamahagi ng masustansyang PanSarap sa loob ng 90–120 araw.

Kasabay nito, namahagi rin sila ng mga gamit sa paaralan at bag para sa mga mag-aaral bilang bahagi ng programang PagbaBAGo ng Tanggapan ng Pangalawang Pangulo.

27/07/2025

Mahal na Ka Eduardo Manalo,

Ang kapayapaan po ay sumainyo. Nawa’y umabot sa inyo ng maluwalhati ang aking pagbati.

Una sa lahat ay isang malugod na pagbati ang aking nais ipaabot sa inyo at sa buong kapatiran ngayong ika-111 Anibersaryo ng Iglesia ni Cristo. Aking dalangin, sampu ng aking pamilya, ang
ibayong lakas at pagpapala sa inyo ng Iglesia ni Cristo upang inyong màipagpatuloy ang mabuting gawain para sa ating kapwa Pilipino, dito sa bansa at sa buong mundo.

Maraming salamat po sa lahat ng inyong tulong at sa suportang patuloy na iginagawad ng Kapatiran sa inyong abang lingkod at sa minamahal naming Lalawigan ng Marinduque.

Muli, binabati ko po kayo ng isang maligayang anibersaryo. Mabuhay po kayo Ka Eduardo! Mabuhay ang Iglesia ni Cristo!

Lubos na gumagalang,

Atty. Lord Allan Jay Q. Velasco

30/06/2025

Tayong lahat ang nagbago sa Marinduque.
Tayong lahat ang lumaban, nangarap, at kumilos.
Sa bawat kalsadang naitayo, karagdagang pasilidad ng ospital, kuryenteng dumating sa mga isla, at kabataang nabigyan ng mas magandang kinabukasan, nandoon kayo. Tayong lahat ang dahilan.

Hindi ko po ito nagawa mag-isa.
Kayo ang lakas sa likod ng bawat hakbang.
Sa loob ng labing-apat na taon, kayo ang inspirasyon ng bawat desisyon, ng bawat serbisyong may puso.

At ngayon, habang tinatapos ko ang kabanatang ito ng aking buhay bilang inyong Congressman, baon ko ang pasasalamat na hindi kayang sukatin ng salita.

Salamat, Marinduque.
Ang lahat ng ito ay kwento nating lahat, at ito ay hindi matatapos dito.

Dahil hangga’t may puso tayong nagmamahal sa bayan, magpapatuloy ang ating laban para sa isang Marinduqueng dama ng bawat isa.

28/06/2025

Sa gitna ng katahimikan matapos ang halalan, patuloy pa rin ang ingay ng paninira. Hindi lang laban sa akin, kundi pati sa aking pamilya. Pero sa halip na sumagot ng galit, pinili kong manindigan sa katotohanan.

Hindi perpekto ang ating pamumuno, pero bawat proyekto, bawat reporma, bawat kalsada, ospital, kuryente, at tulong ay bunga ng malasakit at pagmamahal.

Hindi kami nangako ng lahat. Pero ipinakita namin ang kayang gawin kapag puso ang namumuno.

Maraming salamat, Marinduque. Patuloy ang kwento natin - Hindi sa ingay ng paninira, kundi sa panatag na paninindigan para sa tama.

26/05/2025

Nais po naming ipabatid sa publiko na nakarating sa aming tanggapan ang mga ulat hinggil sa paglilipat ng ballot boxes sa Bayan ng Santa Cruz noong Mayo 23, 2025, at sa Bayan ng Gasan ngayong Mayo 26, 2025.

Para sa kaalaman ng lahat, wala pong kinalaman ang aming tanggapan sa mga aksyong ito at kami ay hindi rin naabisuhan o nabigyan ng anumang pormal na komunikasyon mula sa Commission on Elections (COMELEC) ukol sa nasabing mga aktibidad.

Sa harap ng mga ulat na ito, kami po ay kaisa ng ating mga kalalawigan sa panawagan na maprotektahan ang mga balota at lahat ng dokumentong may kaugnayan sa nakaraang halalan noong Mayo 13, 2025. Kami na rin po mismo ang sumulat sa COMELEC upang humiling ng paliwanag at katiyakan kaugnay sa mga usaping ito.

Mariin naming kinokondena ang pagpapakalat ng maling impormasyon (fake news) na tila layong sirain ang aming pangalan. Hindi po makatwiran na bawat kilos o desisyon ng COMELEC ay basta-basta na lamang isisi sa aming panig. Hinihiling po namin sa lahat na maging responsable sa pagbabahagi ng impormasyon at huwag maging kasangkapan sa pagkalat ng paninira at kasinungalingan.

Nananawagan po kami sa COMELEC na tiyakin ang transparency, maayos na proseso, at patas na pagtrato sa lahat ng partido at kandidato. Anumang hakbang na may kinalaman sa mga balota o dokumento ng halalan ay nararapat na may sapat na abiso at konsultasyon sa mga kinauukulan.

Patuloy po ang aming paninindigan para sa malinis na pagtutuos, ganap na transparency, at pananagutan sa proseso—hindi lamang para sa Marinduque, kundi para sa integridad ng halalan at ng ating demokrasya.

Ipaglaban natin ang katotohanan. Itigil ang paninira. Magsimula tayo sa tama.

24/05/2025

Ang halalan ay hindi lamang isang kaganapang pampulitika, ito ay salamin ng ating pagkatao bilang isang demokratikong bansa. Ang bawat boto ay hindi dapat ituring na simpleng numero. Ito ay tinig, ito ay dangal, at higit sa lahat, ito ay sagradong karapatan na dapat igalang ng lahat ng institusyon ng ating bayan.

Dahil dito, ako po ay pormal na naghain ng apela para sa isang manual recount, hindi lamang para sa kapakanan ng lalawigan ng Marinduque, kundi para sa mas malawak na layunin para sa buong sambayanang Pilipino.

Totoong may isinasagawang random manual audit pagkatapos ng halalan. Ngunit sa kasalukuyang sistema, hindi natin matitiyak na ito ay tunay na random. Ilan lang ba ang presinto? Paano ito pinili? Sapat ba ang dami upang magsilbing representasyon ng integridad ng buong automated election system?

Kung nais nating tunay na masubok ang katapatan at pagiging maaasahan ng sistemang ito na ipinatupad ng COMELEC, ang nararapat ay isang mas malawak na saklaw ng manual recount, hindi lamang ilang piling presinto, kundi buong lalawigan. At kung kailangan ng isang pilot area para rito, bukas ang Lalawigan ng Marinduque.

Ito ay panawagan hindi lamang para sa akin, kundi para sa lahat ng Pilipinong nagnanais ng isang halalan na totoo, malinis, at mapagkakatiwalaan. Dahil kung ang sistema ay pilit nating tinatanggap, dapat ito ay dumaan sa masusing pagsubok. Dapat itong magpakita ng 100% accuracy o isang mataas na antas ng katiyakan na karapat-dapat sa tiwala ng mamamayan.

Hindi tayo lumalaban para sa posisyon, lumalaban tayo para sa katotohanan. Dahil kung ang integridad ng ating halalan ay kaduda-duda, ang demokrasya mismo ang nakataya. Ang laban na ito ay laban ng bawat Pilipino. Ang panawagan para sa maningning at tapat na kinabukasan ay dapat magsimula sa pagkilala sa tunay na mandato ng taongbayan.

Panatilihin nating banal ang proseso ng halalan. Panatilihin nating buhay ang tiwala ng taumbayan.
Maraming salamat sa inyong panalangin, suporta, at paninindigan. Sama-sama tayong magbantay, magsuri, at manindigan para sa isang halalang may puso, dangal, at katotohanan.

13/05/2025

Sa bawat kamay na kumaway, sa bawat tinig na sumigaw ng suporta, at sa bawat pusong naniwala sa ating panawagan—maraming salamat po.

Sa mga tumaya, tumulong, at tumindig para sa ating layunin—sa bawat pamilya, kabataan, nakatatanda, manggagawa, magsasaka, at mangingisda—kayo po ang dahilan kung bakit ako nagpatuloy, lumaban, at naglingkod.

Hindi matutumbasan ng salita ang aking pasasalamat sa inyong mga tumindig at nakiisa para sa isang gobyernong may puso, para sa isang Marinduqueng tunay na dama ng bawat isa.

Maraming salamat, Marinduque.

11/05/2025

Happy Mother's Day!

Ngayong espesyal na araw, taus-puso po akong nagpupugay sa lahat ng mga ilaw ng tahanan -- mga ina na walang kapagurang nagmamahal, nagsasakripisyo, at nagbibigay ng lakas sa kanilang pamilya. Kayo po ang tunay na bayani ng ating lipunan.

Sa lahat ng ina sa Marinduque at sa buong bansa -- maraming salamat po sa inyong walang kapantay na pagmamahal at malasakit.

Mabuhay po kayo, mga Nanay!

04/05/2025

Mula sa niyugan patungong pag-unlad—isang LAV Story mula sa Barangay Santol, Boac.

Ayon kay Kapitan Larry Livelo at sa mga residente ng Barangay Santol, dati-rati’y puro niyugan at makikitid na daan lamang ang kanilang tinatahak. Maraming kabarangay ang hirap abutin, at ang paghahatid ng produkto at kalakal ay tila laging may kasamang pagsubok. Ngunit sa tulong ng inyong lingkod, naisakatuparan natin ang Bypass Road ng Barangay Santol.

Ngayon, mas mabilis nang nadadala ang kanilang mga ani at produkto sa karatig-barangay at bayan. Hindi na kailangang dumaan pa sa masikip na kalsada ng poblacion, kaya’t malaking ginhawa rin ito sa daloy ng trapiko sa Boac.

Ito ang uri ng Serbisyong May Puso at Dama ng Bawat Marinduqueño, mga proyektong hindi lang konkretong kalsada, kundi konkretong tugon sa pang-araw-araw na pangangailangan ng ating mga kababayan.

Tuloy ang kwento ng pag-unlad. Tuloy ang LAV Story.

03/05/2025

Isa na namang kwento ng buhay, pag-asa, at malasakit—isang tunay na LAV Story.

Bilang bahagi ng ating “Serbisyong May Puso at Dama ng Bawat Marinduqueño,” inilunsad natin ang Dialysis Center sa Marinduque Provincial Hospital, isang proyekto na may layuning madugtungan ang buhay ng ating mga kababayang may karamdaman sa bato, at maibsan ang kanilang pasan sa araw-araw.

Dati-rati, kailangan pa nilang lumuwas ng Lucena o manirahan sa Maynila para lamang makapagpa-dialysis. Malaking gastos, pagod, at panganib ang kanilang kailangang pagdaanan. Pero ngayon, nariyan na ang serbisyong kailangan nila, malapit, abot-kaya, at maaasahan.

Hindi na kailangang mamroblema sa pamasahe o matitirhan. Mas kaunti na ang gastos, mas malapit na ang tulong, at higit sa lahat, mas mahaba ang oras na kapiling ang kanilang mga mahal sa buhay.

Ito ang uri ng serbisyong ating isinusulong. Hindi lang proyekto, kundi paglingap sa buhay ng bawat Marinduqueño.

Tuloy ang kwento ng pag-asa. Tuloy ang Serbisyong May Puso. Tuloy ang LAV Story.

27/04/2025