What are the opening hours?

Monday 8am - 5pm Tuesday 8am - 5pm Wednesday 8am - 5pm Thursday 8am - 5pm Friday 8am - 5pm

Land Transportation Office - Philippines, LTO Central Office Compound, Brgy. Pinyahan, East Avenue, Quezon City (2026)

09/10/2026

𝐓𝐈𝐍𝐆𝐍𝐀𝐍: DALAWANG EMPLEYADO NG LTO, ARESTADO MATAPOS MAGSAGAWA ANG AHENSYA NG JOINT ENTRAPMENT OPERATION KONTRA FIXING SA PASAY, KATUWANG ANG PNP-CIDG AT ARTA

Bilang bahagi ng 7-Point Reform Agenda ni Land Transportation Office (LTO) Chief Assistant Secretary Markus V. Lacanilao, na paigtingin ang pagsugpo sa fixing at iba pang katiwalian sa loob at labas ng mga tanggapan ng ahensya, dalawang empleyado ng LTO ang naaresto sa isang joint entrapment operation ng Intelligence and Investigation Division (IID) ng LTO Central Office, Criminal Investigation and Detection Group - Anti-Organized Crime Unit (CIDG-AOCU) ng Philippine National Police (PNP), at Anti-Red Tape Authority (ARTA) sa LTO Pasay noong Huwebes, Oktubre 8, 2026.

Naisagawa ang operation matapos makatanggap at mag-endorso ang ARTA ng mga reklamo hinggil sa fixing activities sa pagproseso ng mga transaksyon sa LTO kapalit ng karagdagang bayad. Sa isinagawang beripikasyon at pagkakalap ng impormasyon at ebidensya, natukoy ang dalawang empleyado ng LTO na sangkot sa magkahiwalay na transaksyon at isinailalim sa isang joint entrapment operation.

Ang nasabing operation ay matagumpay na naisagawa sa pangunguna ni Ericson C. Roc, Chief Investigator ng CIDG-AOCU, kasama ang mga kawani ng ARTA sa ilalim ng pamumuno ni Assistant Division Chief, Pyriander Labayo, at mga tauhan ng LTO-IID na pinamumunuan ni Chief Renante G. Melitante, katuwang si Atty. Richard Perez, Regional Director ng LTO-National Capital Region (NCR).

Sa unang transaksyon, isang empleyado ng LTO na nakatalaga bilang “Receiving Officer” ang nahuling tumanggap ng marked money mula sa nagpanggap na kliyente kapalit ng pagpapabilis sa renewal ng rehistro ng isang sasakyan. Inalok nito ang mas mabilis na pagproseso ng renewal ng rehistro nang hindi na kailangang personal na humarap ang may-ari ng sasakyan at kumpletuhin ang mga kinakailangang proseso, gaya ng emission testing at pagkuha ng Motor Vehicle Inspection Report (MVIR), sa halagang mas mataas sa karaniwang bayarin.

Samantala, isa pang empleyado na nakatalaga bilang “Motor Vehicle Inspector” ay isinailalim din sa entrapment matapos matukoy na nag-aalok online ng pagpapabilis sa pagproseso ng lisensya at iba pang transaksyon sa LTO, sa pagsasabing may koneksyon ito sa loob ng ahensya, kapalit ng karagdagang bayad. Nahuli rin ito matapos tanggapin ang marked money mula sa nagpanggap na kliyente.

Dinala ang dalawang naarestong empleyado, kasama ang mga nakuhang ebidensya, sa CIDG-AOCU para sa kaukulang dokumentasyon at pagsasagawa ng naaangkop na legal na proseso. Kapwa sila isinailalim sa medical examination at ipinaalam ang kanilang mga karapatang konstitusyonal.

Nahaharap ang dalawang empleyado sa posibleng paglabag sa Section 21(h) ng Republic Act No. 11032, o Ease of Doing Business and Efficient Government Service Delivery Act of 2018, at Article 210 ng Revised Penal Code o Direct Bribery, bukod sa iba pang maaaring maging pananagutan batay sa resulta ng imbestigasyon.

“Kahit empleyado pa ng LTO ang sangkot, kung mapatunayang gumagawa ng fixing, hindi kami magdadalawang-isip na tanggalin siya sa serbisyo. Hindi namin kailangan ng fixer sa loob ng LTO na sa halip na tumulong sa publiko, ay ginagamit ang kanilang posisyon para pagkakitaan ang mga transaksyon ng ahensya,” pahayag ni Asec. Lacanilao.

Binigyang-diin ng LTO na hindi nito palalampasin ang anumang pagtatangkang pagkakitaan ang mga transaksyon ng publiko o pag-iwas sa mga itinakdang proseso kapalit ng karagdagang bayad. Patuloy na paiigtingin ng ahensya, katuwang ang CIDG at ARTA, ang mga hakbang laban sa fixing at iba pang katiwalian sa loob ng ahensya.

09/10/2026

𝐋𝐓𝐎, 𝐍𝐀𝐆-𝐈𝐒𝐘𝐔 𝐍𝐆 𝐒𝐂𝐎 𝐋𝐀𝐁𝐀𝐍 𝐒𝐀 𝐑𝐈𝐃𝐄𝐑 𝐃𝐀𝐇𝐈𝐋 𝐒𝐀 𝐌𝐀𝐏𝐀𝐍𝐆𝐀𝐍𝐈𝐁 𝐍𝐀 𝐏𝐀𝐆𝐌𝐀𝐌𝐀𝐍𝐄𝐇𝐎 𝐊𝐀𝐒𝐀𝐌𝐀 𝐀𝐍𝐆 𝐁𝐀𝐓𝐀𝐍𝐆 𝐀𝐍𝐆𝐊𝐀𝐒 𝐍𝐀 𝐖𝐀𝐋𝐀𝐍𝐆 𝐇𝐄𝐋𝐌𝐄𝐓 𝐀𝐓 𝐍𝐀𝐇𝐈𝐇𝐈𝐑𝐀𝐏𝐀𝐍𝐆 𝐌𝐀𝐀𝐁𝐎𝐓 𝐀𝐍𝐆 𝐅𝐎𝐎𝐓 𝐏𝐄𝐆; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐌𝐎𝐓𝐎𝐑𝐒𝐈𝐊𝐋𝐎 𝐈𝐍𝐀𝐋𝐀𝐑𝐌𝐀

Sa direktiba ni Land Transportation Office (LTO) Chief, Assistant Secretary Markus V. Lacanilao, inisyuhan ng Show Cause Order (SCO) ang rehistradong may-ari at itinalagang rider ng isang motorsiklo kaugnay ng nakuhang video na nagpapakita ng mapanganib na pagbibiyahe nito kasama ang batang angkas na walang suot na helmet at nahihirapang maabot ang foot peg.

Batay sa video na nakalap ng ahensya, makikita ang naturang motorsiklo na bumibiyahe sa pampublikong kalsada kasama ang isang batang babae na walang suot na helmet at nahihirapang maabot ang foot peg ng motorsiklo, na maaaring maglagay sa panganib sa angkas at makompromiso ang kaligtasan nito habang bumibiyahe.

Dahil dito, inatasan ang rehistradong may-ari at itinalagang rider na humarap sa tanggapan ng Intelligence and Investigation Division (IID) ng LTO Central Office, East Avenue, Quezon City, sa Oktubre 13, 2026, upang magsumite ng sinumpaang salaysay at mga kaukulang orihinal na dokumento bilang tugon sa mga alegasyon kaugnay ng insidente.

Kabilang sa mga paglabag na tinukoy sa SCO ang Safety of Children Aboard Motorcycles, Mandatory Use of Motorcycle Helmets, Reckless Driving, at Improper Person to Operate a Motor Vehicle. Maaari ring matukoy ang iba pang pananagutan habang nagpapatuloy ang imbestigasyon ng ahensya.

Samantala, isasailalim sa 90-araw na preventive suspension ang driver’s license ng naturang rider at inatasan siyang agad itong isuko sa IID para sa kaukulang proseso.

Inilagay na rin sa alarm ang naturang motorsiklo habang nagpapatuloy ang imbestigasyon at kaukulang proseso ng ahensya.

“Hindi dapat isinasantabi ang kaligtasan ng bata para lamang maipagpatuloy ang biyahe. Responsibilidad ng bawat rider na tiyaking ligtas ang kanilang angkas, lalo na kung bata ang sakay. Kung hindi kayang maabot ng bata ang foot peg at wala pa itong helmet, malinaw na nalalagay sa panganib ang kaligtasan nito. Kailangang maging responsable ang bawat rider at tiyaking nasusunod ang mga alituntunin bago bumiyahe,” ayon kay Asec. Lacanilao.

Muling pinaalalahanan ng LTO ang lahat ng rider na tiyaking may suot na helmet ang kanilang mga angkas at ligtas ang kanilang posisyon sa motorsiklo, lalo na ang mga bata. Ang responsableng pagmamaneho at mahigpit na pagsunod sa mga alituntunin ay mahalaga upang maprotektahan ang buhay at kaligtasan ng bawat sakay sa kalsada.

09/10/2026

𝐋𝐓𝐎, 𝐍𝐀𝐆𝐋𝐀𝐁𝐀𝐒 𝐍𝐆 𝐒𝐂𝐎 𝐋𝐀𝐁𝐀𝐍 𝐒𝐀 𝐃𝐑𝐀𝐘𝐁𝐄𝐑 𝐀𝐓 𝐑𝐄𝐇𝐈𝐒𝐓𝐑𝐀𝐃𝐎𝐍𝐆 𝐌𝐀𝐘-𝐀𝐑𝐈 𝐍𝐈𝐓𝐎 𝐊𝐀𝐔𝐆𝐍𝐀𝐘 𝐍𝐆 𝐈𝐋𝐄𝐆𝐀𝐋 𝐍𝐀 𝐏𝐀𝐆 𝐔-𝐓𝐔𝐑𝐍 𝐍𝐀 𝐍𝐀𝐆𝐃𝐔𝐋𝐎𝐓 𝐍𝐆 𝐏𝐀𝐆𝐊𝐀𝐀𝐍𝐓𝐀𝐋𝐀 𝐒𝐀 𝐃𝐀𝐋𝐎𝐘 𝐍𝐆 𝐓𝐑𝐀𝐏𝐈𝐊𝐎; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀

Naglabas ang Land Transportation Office (LTO), sa direktiba ni Assistant Secretary Markus V. Lacanilao, ng Show Cause Order (SCO) laban sa isang drayber na sangkot sa isang insidenteng nag-viral sa social media.

Batay sa viral post at video na ibinahagi ng page na “Visor” at kalaunan ay nakarating sa LTO, makikita na ang drayber ng isang sasakyan ay nag-U-turn matapos ang road closure. Matapos nito, umabante ang sasakyan at lumapit nang husto sa isa pang sasakyan, na higit pang nakaapekto sa daloy ng trapiko. Makikita rin sa video na bumaba ang drayber, lumapit sa passenger side ng kabilang sasakyan, at nakipagtalo sa drayber nito habang umano’y nagbibitaw ng masasamang salita.

Makikita rin sa video na ang sasakyan ng sangkot na drayber ay nakapuwesto sa lane na nakalaan para sa kasalubong na trapiko, dahilan upang maharangan ang normal na daloy ng trapiko. Bago tuluyang umalis, nakita rin na bumaba muli ang drayber upang kunan ng video ang paligid at kalaunan ay nagpakita ng offensive hand gesture at nagsambit ng mapanlait o nakakainsultong salita laban sa isa pang motorista.

Dahil dito, agad na ipinag-utos ni Asec. Lacanilao ang pagsasagawa ng imbestigasyon upang matukoy ang pagkakakilanlan ng drayber at ng rehistradong may-ari ng sasakyan, na nagbigay-daan sa pormal na pag-isyu ng kaukulang SCO.

Ayon sa inilabas na SCO, inaatasang humarap ang mga sangkot sa tanggapan ng Intelligence and Investigation Division (IID) ng LTO Central Office sa Oktubre 14 upang magsumite ng kani-kanilang sinumpaang salaysay, kasama ang iba pang kaukulang dokumento at ebidensyang maaaring magpaliwanag o sumuporta sa kanilang panig. Nahaharap ang drayber sa mga alegasyon ng paglabag sa Reckless Driving, Obstruction of Traffic, at iba pang posibleng paglabag na maaaring matukoy sa nagpapatuloy na imbestigasyon.

Maaari ring tuluyang bawiin ng LTO ang lisensya ng drayber kung mapatutunayang siya ay Improper Person to Operate a Motor Vehicle, alinsunod sa umiiral na mga batas, tuntunin, at regulasyon.

Inaasahang isusuko ng drayber ang kanyang lisensya sa IID at isasailalim ito sa 90-araw na preventive suspension habang nagpapatuloy ang kaukulang proseso. Kasabay nito, isinailalim na rin sa alarm status ang naturang sasakyan bilang bahagi ng patuloy na imbestigasyon ng LTO.

Ayon kay Asec. Lacanilao, “Ang kalsada ay hindi lugar para sa init ng ulo o sariling interpretasyon ng batas-trapiko. Kapag ang isang motorista ay nakahahadlang sa daloy ng trapiko at nauuwi pa sa pakikipagtalo sa kapwa motorista, kailangang maipaliwanag niya ang kanyang ginawa. Susuriin ng LTO ang insidente batay sa ebidensya at pananagutin ang sinumang mapatutunayang lumabag sa batas.”

Patuloy na tutugon ang LTO sa mga insidenteng nakaaapekto sa maayos na daloy ng trapiko at magsasagawa ng kaukulang aksyon batay sa mga ebidensya at resulta ng imbestigasyon. Sa ganitong paraan, nananatiling pananagutan ng bawat motorista ang kanilang kilos sa kalsada. Hinihikayat naman ng ahensya ang publiko na patuloy na i-report ang mga insidente ng mapanganib na pagmamaneho, lalo na kung may larawan, video, o iba pang impormasyong makatutulong sa imbestigasyon.

09/10/2026

𝐏𝐑𝐈𝐁𝐀𝐃𝐎𝐍𝐆 𝐒𝐀𝐒𝐀𝐊𝐘𝐀𝐍 𝐍𝐀 𝐍𝐀𝐌𝐀𝐓𝐀𝐀𝐍𝐆 𝐆𝐔𝐌𝐀𝐆𝐀𝐌𝐈𝐓 𝐍𝐆 𝐈𝐋𝐄𝐆𝐀𝐋 𝐍𝐀 𝐁𝐋𝐈𝐍𝐊𝐄𝐑, 𝐏𝐀𝐏𝐀𝐍𝐀𝐆𝐔𝐓𝐈𝐍 𝐍𝐆 𝐋𝐓𝐎; 𝐋𝐈𝐒𝐄𝐍𝐒𝐘𝐀 𝐍𝐆 𝐃𝐑𝐀𝐘𝐁𝐄𝐑 𝐒𝐔𝐒𝐏𝐄𝐍𝐃𝐈𝐃𝐎, 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀

Hindi pinalampas ng Land Transportation Office (LTO), sa ilalim ng pamumuno ni LTO Chief Assistant Secretary Markus V. Lacanilao, ang isang video na nakarating sa ahensya na nagpapakita ng isang pribadong sasakyan na gumagamit ng p**a at asul na blinkers, na agad naging batayan upang magsagawa ng imbestigasyon at tukuyin ang mga sangkot.

Mabilis na natukoy ng LTO ang rehistradong may-ari at itinalagang drayber ng naturang sasakyan at pinadalhan sila ng Show Cause Order (SCO) upang pagpaliwanagin kaugnay ng paggamit ng hindi awtorisadong blinkers. Batay rin sa records ng ahensya, huling nairehistro ang nasabing sasakyan noong Setyembre 9, 2020.

Inaatasan ang rehistradong may-ari at drayber na humarap sa tanggapan ng Intelligence and Investigation Division (IID) ng LTO Central Office sa Oktubre 19, 2026 at magsumite ng kani-kanilang sinumpaang salaysay o paliwanag, kalakip ang mga kaukulang dokumentong maaaring sumuporta sa kanilang panig at magpaliwanag kung bakit hindi sila dapat managot sa mga alegasyong nakasaad sa SCO. Pinagpapaliwanag ang rehistradong may-ari kaugnay ng posibleng pananagutan sa Unauthorized/Unlawful Use of Blinkers at Compulsory Registration of Motor Vehicle, habang maaaring ideklara ang itinalagang drayber bilang Improper Person to Operate a Motor Vehicle, na maaaring magresulta sa pagsuspinde o pagbawi ng kanyang lisensya sa pagmamaneho, alinsunod sa resulta ng imbestigasyon.

Bilang pansamantalang hakbang habang nagpapatuloy ang imbestigasyon, inatasan ang drayber na isuko ang kanyang lisensya sa IID at isasailalim ito sa 90-day preventive suspension. Inilagay din sa alarm status ang pribadong sasakyan upang matiyak na walang magaganap na transaksyon nito habang isinasagawa ang kaukulang proseso ng LTO.

Ayon kay Asec. Lacanilao, hindi dapat ginagamit ng mga pribadong sasakyan ang mga kagamitang maaaring magbigay ng impresyon na ang mga ito ay kabilang sa mga sasakyang awtorisadong gumamit ng naturang mga ilaw.

“Hindi laruan ang mga kagamitang ginagamit sa sasakyan. Ang mga blinker ay hindi basta maaaring ikabit at gamitin ng pribadong motorista. May mga sasakyang awtorisadong gumamit nito, at may malinaw na dahilan kung bakit limitado ang paggamit nito. Hindi natin hahayaang gamitin ito sa paraang maaaring makalito o makapanlinlang sa ibang motorista,” pahayag ni Asec. Lacanilao.

Binigyang-diin ng LTO na ang paggamit ng hindi awtorisadong blinkers ay may kaukulang pananagutan, hindi lamang para sa rehistradong may-ari kundi maging sa drayber na aktuwal na gumagamit nito, alinsunod sa batas at sa resulta ng imbestigasyon. Patuloy na paiigtingin ng ahensya ang pagpapatupad ng mga umiiral na regulasyon upang matiyak na ang mga kagamitang may partikular na gamit at awtoridad ay hindi gagamitin ng mga hindi saklaw nito, bilang bahagi ng pagpapanatili ng kaayusan at kaligtasan sa kalsada.

08/10/2026

𝐋𝐓𝐎, 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐂𝐎 𝐀𝐍𝐆 𝐔𝐌𝐀𝐍𝐎'𝐘 𝐋𝐀𝐒𝐈𝐍𝐆 𝐍𝐀 𝐏𝐈𝐂𝐊𝐔𝐏 𝐓𝐑𝐔𝐂𝐊 𝐃𝐑𝐈𝐕𝐄𝐑 𝐍𝐀 𝐍𝐀𝐊𝐀𝐁𝐀𝐍𝐆𝐆𝐀 𝐍𝐆 𝐈𝐋𝐀𝐍𝐆 𝐌𝐎𝐓𝐎𝐑𝐒𝐈𝐊𝐋𝐎 𝐒𝐀 𝐊𝐀𝐋𝐒𝐀𝐃𝐀; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀

Isang aksidente sa kalsada ang agad isinailalim sa imbestigasyon ng Land Transportation Office (LTO), sa direktiba ni Assistant Secretary Markus V. Lacanilao, matapos makarating sa ahensya ang video kung saan naiulat na nakabangga ng ilang motorsiklo sa J.P. Rizal Extension at Kalayaan Avenue ang isang pickup truck driver na umano'y nasa impluwensiya ng alak.

Matapos ang isinagawang imbestigasyon ng ahensya, natukoy ang rehistradong may-ari ng pickup truck na siya ring nagmamaneho nito nang mangyari ang insidente. Agad siyang pinadalhan ng ahensya ng Show Cause Order (SCO) upang magbigay ng paliwanag kaugnay ng insidenteng kinasangkutan niya.

Batay sa salaysay ng mga rider na nakuhanan sa video, ilang motorsiklo ang tinamaan ng pickup truck habang nakahinto sa traffic light sa bahagi ng J.P. Rizal Extension at Kalayaan Avenue. Sa halip na huminto, nagpatuloy sa pagmamaneho ang driver hanggang sa sundan siya ng mga rider mula Guadalupe patungong C-5 Road.

Sa pagpapatuloy ng insidente, makikitang pilit na pinatitigil ng mga rider ang pickup truck. Isa sa mga rider ang gumamit ng helmet upang hampasin ang sasakyan habang patuloy itong umaandar. Kalaunan, bigla itong lumiko pakanan nang walang ibinigay na wastong signal bago tuluyang huminto sa gilid ng kalsada.

Nang bumaba ang driver, sinabi nitong binaril ng mga rider ang gulong ng kanyang sasakyan na naging sanhi ng pag-flat nito. Makikita rin sa video na ilang ulit niyang inilantad ang pribadong bahagi ng kanyang katawan at kalaunan ay umihi sa harap ng sasakyan. Nang dumating ang isang traffic enforcer, humingi siya ng paumanhin at umamin na nakatulog habang nagmamaneho.

Sa beripikasyon ng LTO, natuklasan na huling nairehistro ang pickup truck noong Hulyo 28, 2020 at wala nang naitalang renewal ng rehistro sa database ng ahensya.

Dahil sa mga paglabag na natukoy ng ahensya, inaatasan ang driver na humarap sa tanggapan ng Intelligence and Investigation Division (IID) ng LTO Central Office para sa pagdinig sa Oktubre 13, 2026. Kinakailangan din niyang magsumite ng sinumpaang salaysay o paliwanag kung bakit hindi siya dapat managot sa mga paglabag na nakasaad sa SCO, kabilang ang Reckless Driving, Signals on Starting, Stopping or Turning dahil sa hindi pagbibigay ng wastong signal sa pagliko, Compulsory Registration of Motor Vehicles, dahil sa pagmamaneho ng hindi rehistradong sasakyan, at Driving While Under the Influence of Alcohol or Narcotic Drug.

Kailangan din niyang ipaliwanag kung bakit hindi siya dapat ideklarang Improper Person to Operate a Motor Vehicle, na maaaring maging batayan sa pagsususpinde o pagbawi ng kanyang driver’s license.

Bilang bahagi ng agarang aksyon ng LTO, iniutos ang pagsuko ng driver’s license ng driver at isasailalim sa 90-araw na preventive suspension. Inilagay na rin sa alarma ang pickup truck habang nagpapatuloy ang kaukulang proseso.

“Ang kalsada ay para sa lahat, kaya walang sinuman ang may karapatang gawing peligroso ito para sa iba. Ang pagmamaneho nang lasing, pagiging iresponsable at bastos ay hindi katanggap-tanggap sa kalsada. Sisiguraduhin namin na may pananagutan ang driver sa mga paglabag niya," saad ni Asec. Lacanilao.

Muling ipinapaalala ng LTO sa lahat ng motorista na maging responsable sa pagmamaneho, pairalin ang disiplina, at tiyaking nasa maayos na kondisyon bago bumiyahe. Iwasang magmaneho kapag nasa impluwensiya ng alak o anumang maaaring makaapekto sa kakayahang magmaneho nang ligtas. Nagpapasalamat ang LTO sa publiko sa patuloy na pag-uulat at pagdodokumento ng mga paglabag, na nakatutulong sa ahensya upang agad na maaksyunan ang mga insidenteng maaaring maglagay sa panganib sa kapwa motorista.

08/10/2026

𝐑𝐈𝐃𝐄𝐑 𝐍𝐆 𝐌𝐎𝐓𝐎𝐑𝐒𝐈𝐊𝐋𝐎, 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐂𝐎 𝐍𝐆 𝐋𝐓𝐎 𝐌𝐀𝐓𝐀𝐏𝐎𝐒 𝐍𝐀𝐌𝐀𝐓𝐀𝐀𝐍𝐆 𝐒𝐔𝐌𝐀𝐒𝐀𝐘𝐀𝐖 𝐇𝐀𝐁𝐀𝐍𝐆 𝐍𝐀𝐆𝐌𝐀𝐌𝐀𝐍𝐄𝐇𝐎 𝐀𝐓 𝐍𝐀𝐆𝐏𝐀𝐏𝐀𝐈𝐍𝐆𝐀𝐘 𝐆𝐀𝐌𝐈𝐓 𝐀𝐍𝐆 𝐈𝐋𝐋𝐄𝐆𝐀𝐋 𝐌𝐎𝐃𝐈𝐅𝐈𝐄𝐃 𝐌𝐔𝐅𝐅𝐋𝐄𝐑; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐌𝐎𝐓𝐎𝐑𝐒𝐈𝐊𝐋𝐎 𝐈𝐍𝐀𝐋𝐀𝐑𝐌𝐀

Agad na umaksyon ang Land Transportation Office (LTO), sa direktiba ni LTO Chief, Assistant Secretary Markus V. Lacanilao, sa pamamagitan ng pag-isyu ng Show Cause Order (SCO) laban sa rehistradong may-ari at itinalagang rider ng isang motorsiklo kaugnay ng isang post sa Facebook na nagpapakita ng mapanganib na asal sa kalsada at paggamit ng motorsiklong may illegal modified muffler.

Batay sa video na nakarating sa ahensya, makikita ang naturang rider na paulit-ulit na nagbibirit ng makina ng motorsiklong may illegal modified muffler habang bumibiyahe sa kalsada. Makikita rin sa video ang naturang rider at ilan sa mga kasama nito na sumasayaw habang nagmamaneho ng kani-kanilang motorsiklo.

Kaugnay nito, inatasan ang rehistradong may-ari at itinalagang rider na humarap sa tanggapan ng Intelligence and Investigation Division (IID) ng LTO Central Office, East Avenue, Quezon City, sa Oktubre 14, 2026, upang magsumite ng sinumpaang salaysay o komento at mga kaukulang orihinal na dokumento kaugnay ng mga alegasyon.

Kabilang sa mga paglabag na tinukoy sa SCO ang Illegal Muffler Modification, Reckless Driving, at Improper Person to Operate a Motor Vehicle. Maaari ring matukoy ang iba pang pananagutan habang nagpapatuloy ang imbestigasyon ng ahensya.

Samantala, isasailalim sa 90-araw na preventive suspension ang driver’s license ng naturang rider at inatasan siyang agad itong isuko sa IID para sa kaukulang proseso.

Inilagay na rin sa alarm ang naturang motorsiklo at inatasan ang rider na dalhin ito sa North Motor Vehicle Inspection Center (NMVIC) para sa inspeksyon sa itinakdang araw ng pagdinig.

“Ang kalsada ay hindi lugar para sa mga gawaing maaaring makaabala o maglagay sa panganib sa ibang motorista. Dapat pairalin ng bawat rider ang disiplina at tiyaking sumusunod sa mga itinakdang pamantayan ang kanilang motorsiklo. Hindi natin dapat balewalain ang mga paglabag na maaaring makaapekto sa kaligtasan at kaayusan sa kalsada,” ayon kay Asec. Lacanilao.

Paalala ng LTO sa lahat ng motorista at rider na pairalin ang disiplina at pananagutan sa bawat pagbiyahe. Ang pagsunod sa mga alituntunin at responsableng paggamit ng sasakyan ay mahalaga upang mapanatili ang kaligtasan at kaayusan sa kalsada.

07/10/2026

𝐋𝐓𝐎 𝐂𝐇𝐈𝐄𝐅, 𝐀𝐆𝐀𝐃 𝐍𝐀 𝐈𝐏𝐈𝐍𝐀𝐆-𝐔𝐓𝐎𝐒 𝐀𝐍𝐆 𝐏𝐀𝐆𝐒𝐔𝐒𝐏𝐈𝐍𝐃𝐄 𝐀𝐓 𝐈𝐌𝐁𝐄𝐒𝐓𝐈𝐆𝐀𝐒𝐘𝐎𝐍 𝐒𝐀 𝐌𝐆𝐀 𝐋𝐓𝐎 𝐄𝐍𝐅𝐎𝐑𝐂𝐄𝐑𝐒 𝐍𝐀 𝐒𝐀𝐍𝐆𝐊𝐎𝐓 𝐒𝐀 𝐏𝐀𝐍𝐆𝐆𝐈𝐆𝐈𝐏𝐈𝐓 𝐒𝐀 𝐈𝐒𝐀𝐍𝐆 𝐃𝐑𝐀𝐘𝐁𝐄𝐑 𝐒𝐀 𝐆𝐔𝐌𝐀𝐂𝐀, 𝐐𝐔𝐄𝐙𝐎𝐍

Agarang ipinag-utos ni LTO Chief Assistant Secretary Markus V. Lacanilao ang imbestigasyon at pagsuspinde sa LTO enforcers na nanggipit sa isang motorista sa Gumaca, Quezon.

Base sa isang viral video na nakarating sa ahensya, makikitang hinarang ng nasabing LTO enforcers ang motorista at angkas nito dahil sa di umano’y “expired” na Official Receipt (OR) at Certificate of Registration (CR). Patuloy ang pagsasagawa ng LTO ng masusing imbestigasyon sa nasabing insidente upang makalap pa ang ibang mahahalagang impormasyon na maaaring magamit laban sa mga sangkot.

Titiyakin ng LTO na mapapanagot ang mga enforcers kung mapapatunayang nagkaroon ng mga paglabag. Hinihikayat ng ahensya ang publiko na patuloy na i-report ang mga katulad na insidente upang agad na mabigyang ng agaran at karampatang aksyon at solusyon.

07/10/2026

𝐉𝐄𝐄𝐏𝐍𝐄𝐘 𝐃𝐑𝐈𝐕𝐄𝐑 𝐀𝐓 𝐎𝐏𝐄𝐑𝐀𝐓𝐎𝐑 𝐍𝐈𝐓𝐎, 𝐀𝐆𝐀𝐃 𝐍𝐀 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐂𝐎 𝐍𝐆 𝐋𝐓𝐎 𝐌𝐀𝐓𝐀𝐏𝐎𝐒 𝐌𝐔𝐍𝐓𝐈𝐊𝐀𝐍𝐆 𝐌𝐀𝐒𝐀𝐆𝐀𝐒𝐀𝐀𝐍 𝐀𝐍𝐆 𝐈𝐒𝐀𝐍𝐆 𝐏𝐄𝐃𝐄𝐒𝐓𝐑𝐈𝐀𝐍 𝐍𝐀 𝐓𝐔𝐌𝐀𝐓𝐀𝐖𝐈𝐃 𝐒𝐀 𝐓𝐀𝐌𝐀𝐍𝐆 𝐓𝐀𝐖𝐈𝐑𝐀𝐍; 𝐋𝐈𝐒𝐄𝐍𝐒𝐘𝐀, 𝐒𝐈𝐍𝐔𝐒𝐏𝐈𝐍𝐃𝐄, 𝐉𝐄𝐄𝐏𝐍𝐄𝐘 𝐈𝐍𝐀𝐋𝐀𝐑𝐌𝐀

Sa patuloy na pagsusulong ng Land Transportation Office (LTO) sa kaligtasan at proteksyon ng mga pedestrian, inisyuhan ng Show Cause Order (SCO) sa direktiba ni Assistant Secretary Markus V. Lacanilao ang isang jeepney driver at operator nito matapos muntikang masagasaan ang isang lalaki na tumatawid sa pedestrian lane.

Batay sa video footage na nakarating sa ahensya, makikitang tumatawid ang isang lalaki sa pedestrian lane habang kakaunti lamang ang mga sasakyang dumaraan. Sa halip na magbigay-daan, binilisan ng isang pampasaherong jeepney ang takbo nito at muntikang mabangga ang lalaking tumatawid. Matapos bahagyang huminto, sinabihan pa umano ng driver ng mga lapastangang salita ang pedestrian at nagpakita ng hindi wastong asal.

Agad namang ipinag-utos ni Asec. Lacanilao ang pagsasagawa ng imbestigasyon upang matukoy ang pagkakakilanlan ng driver at operator ng jeepney at maiharap sila sa kaukulang proseso ng LTO.

Matapos matukoy ng ahensya ang mga sangkot, inatasan silang humarap sa Intelligence and Investigation Division (IID) ng LTO Central Office sa Oktubre 13 upang magsumite ng kanilang mga sinumpaang salaysay at iba pang kaukulang dokumento bilang tugon sa mga alegasyon laban sa kanila. Nahaharap ang driver sa mga paglabag na Reckless Driving at Right of Way of Pedestrians.

Maaari namang masuspinde o tuluyang mabawi ang lisensya ng jeepney driver kung ito ay mapatunayang Improper Person to Operate a Motor Vehicle.

Inaasahang isusuko ng driver ang kanyang lisensya sa IID, na isasailalim sa 90-araw na suspensyon, habang ang naturang jeepney ay isinailalim na sa alarm status.

Samantala, nahaharap naman ang operator sa mga paglabag na Employing Reckless, Insolent, Discourteous or Arrogant Driver at Breach of Contract.

“Malinaw ang ating batas, ang pedestrian na nasa tamang tawiran ay dapat bigyan ng daan at proteksyon. Hindi maituturing na simpleng pagkakamali ang pagmamanehong naglalagay sa panganib sa buhay ng iba, lalo na kung sinasamahan pa ito ng hindi magadang asal sa kapwa,” ani Asec. Lacanilao.

Patuloy na bibigyan ng proteksyon ng LTO ang lahat ng pedestrian at paiigtingin ang pagpapatupad ng mga batas at regulasyon upang matiyak ang kanilang kaligtasan sa kalsada. Hinihikayat din ng ahensya ang publiko na maging mapagmatyag at agad na ireport sa LTO ang anumang insidente ng paglabag sa batas-trapiko, lalo na ang mga gawaing naglalagay sa panganib sa buhay at kaligtasan ng mga pedestrian.

07/10/2026

🚨 𝐒𝐇𝐎𝐖 𝐂𝐀𝐔𝐒𝐄 𝐎𝐑𝐃𝐄𝐑 𝐔𝐏𝐃𝐀𝐓𝐄 🚨

Ipinataw na ng Land Transportation Office (LTO), sa direktiba ni LTO Chief Assistant Secretary Markus V. Lacanilao, ang revocation o pagbawi sa driver’s license at dalawang taong diskwalipikasyon sa pagkuha ng bagong lisensya ng isang Grab Taxi driver na nasangkot sa pakikipagtalo at tangkang pananakit sa isang pasahero sa Makati City, matapos ang pagdinig noong Oktubre 2, 2026, sa Intelligence and Investigation Division (IID).

Batay sa pagsusuri sa mga salaysay ng sangkot na drayber at mga isinumiteng ebidensya, natukoy na may sapat na batayan upang ideklara siyang Improper Person to Operate a Motor Vehicle, bukod pa sa paglabag sa Disregarding Traffic Signs. Samantala, nasa kustodiya ng ahensya ang driver’s license ng drayber at nananatili sa alarm status ang sasakyan.

“Hindi kami nagbibigay ng lisensya sa mga drayber na hindi kayang gampanan ang responsibilidad at tamang asal na inaasahan sa isang pampublikong drayber. Kaya ipinataw namin ang kaukulang parusa sa kasong ito,” saad ni Asec. Lacanilao.

Patuloy na paiigtingin ng LTO ang pagpapatupad ng mga batas at regulasyon upang matiyak na ang mga driver ay responsable, maayos makitungo, at hindi nagdudulot ng panganib sa kanilang mga pasahero.

Para sa karagdagang detalye, i-click ang link sa ibaba para sa naunang pahayag ng ahensya hinggil sa insidente.
https://www.facebook.com/share/p/1C2K3Y4L7L/

07/10/2026

𝐋𝐓𝐎, 𝐍𝐀𝐆-𝐈𝐒𝐘𝐔 𝐍𝐆 𝐒𝐂𝐎 𝐋𝐀𝐁𝐀𝐍 𝐒𝐀 𝐑𝐈𝐃𝐄𝐑 𝐍𝐆 𝐌𝐎𝐓𝐎𝐑𝐒𝐈𝐊𝐋𝐎 𝐍𝐀 𝐍𝐀𝐆-𝐇𝐈𝐓-𝐀𝐍𝐃-𝐑𝐔𝐍 𝐒𝐀 𝐒𝐀𝐒𝐀𝐊𝐘𝐀𝐍 𝐍𝐆 𝐈𝐒𝐀𝐍𝐆 𝐓𝐕 𝐇𝐎𝐒𝐓 𝐒𝐀 𝐀𝐍𝐓𝐈𝐏𝐎𝐋𝐎 𝐂𝐈𝐓𝐘; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐌𝐎𝐓𝐎𝐑𝐒𝐈𝐊𝐋𝐎 𝐈𝐍𝐀𝐋𝐀𝐑𝐌𝐀

Agad na umaksyon ang Land Transportation Office (LTO) matapos makarating sa ahensya ang insidenteng kinasangkutan ng isang rider na nag-hit-and-run sa sasakyan ng isang TV host sa Antipolo City.

Kaugnay nito, humingi ng tulong ang TV host upang matukoy ang rider na sangkot sa insidente at maaksyunan ito alinsunod sa umiiral na batas at mga regulasyon.

Kaya naman, nag-isyu ng Show Cause Order (SCO) ang ahensya at inaatasan ang rehistradong may-ari at itinalagang rider na humarap sa Intelligence and Investigation Division (IID) sa Oktubre 9, 2026, upang magsumite ng sinumpaang salaysay o paliwanag at mga kaukulang dokumento kaugnay ng insidente.

Kabilang sa mga paglabag na tinukoy sa SCO ang Reckless Driving at Duty of the Driver in Case of Accident, habang maaari ring managot ang rider sa Improper Person to Operate a Motor Vehicle. Maaari ring matukoy ang iba pang pananagutan habang nagpapatuloy ang imbestigasyon ng ahensya.

Naglabas din ang ahensya ng imbitasyon sa TV host na sangkot sa insidente upang humarap sa IID at magbigay ng kanyang pahayag na makatutulong sa masusi at patas na pagresolba ng kaso.

Samantala, inatasan ang naturang rider na agad na isuko ang kanyang driver’s license sa IID at isasailalim ito sa 90-araw na preventive suspension habang nagpapatuloy ang kaukulang proseso.

Inilagay na rin sa alarm ang naturang motorsiklo habang isinasagawa ang imbestigasyon at kaukulang proseso ng ahensya.

“May responsibilidad ang bawat motorista na harapin ang anumang insidente na kanilang kinasasangkutan sa kalsada. Hindi dapat basta umalis sa lugar ng insidente dahil may kaukulang proseso na kailangang sundin at pananagutang dapat harapin. Ang bawat motorista ay dapat handang managot sa kanilang mga kilos at desisyon sa kalsada,” ayon kay Asec. Markus V. Lacanilao.

Muling pinaalalahanan ng LTO ang lahat ng motorista na pairalin ang pag-iingat, disiplina, at pananagutan sa bawat pagmamaneho. Ang pagsunod sa batas at pagiging responsable sa kalsada ay mahalaga upang mapangalagaan ang kaligtasan ng bawat motorista at iba pang gumagamit ng kalsada at maiwasan ang mga insidenteng maaaring magdulot ng pinsala.

Land Transportation Office - Philippines

09/10/2026

09/10/2026

09/10/2026

09/10/2026

08/10/2026

08/10/2026

07/10/2026

07/10/2026

07/10/2026

07/10/2026

Address

Opening Hours

Website

Alerts

Contact The Organization

Shortcuts

Share

Listing takedown request

Monday	8am - 5pm
Tuesday	8am - 5pm
Wednesday	8am - 5pm
Thursday	8am - 5pm
Friday	8am - 5pm