09/04/2026
KAGITINGAN NG BAYAN, HUSTISYA SA KRISIS: PANAGUTIN ANG PAMAMALAKAD NA NAGPAPAHIRAP SA GITNA NG KRISIS SA LANGIS!
Sa paggunita ng Araw ng Kagitingan, muli nating pinapaalala ang mga sakripisyo ng ating mga bayani sa dugoโt pawis na kanilang inialay sa pakikidigma upang maipagtanggol ang bayan mula sa pananakop at karahasan. Ngunit sa araw na ito, higit nating nauunawaan na ang diwa ng kagitingan ay hindi lamang nakaukit sa nakaraan. Atin ring kinikilala ang araw-araw na pakikibaka ng sambayanang Pilipino laban sa gutom, kahirapan, at kapabayaan ng pamahalaan.
Sa harap ng lumalalang krisis sa langis, kung saan ang presyo ay pumapalo sa mahigit kumulang P166 - P170 kada litro ang diesel[1], bawat sentimo ng pamasahe, presyo ng pagkain, at gastos sa kabuhayan ay nagiging mabigat na pasanin ng ordinaryong Pilipino. Sa mga palengke, sa kalsada, sa pabrika, at maging sa tahanan, dama ng mamamayan ang matinding hirap na dulot ng walang humpay na pagtaas ng presyo. Ngunit sa kabila ng lahat ng ito, tila walang kongkretong tugon ang mga nasa kapangyarihan. Nananatiling tahimik at mabagal ang mga nasa pwesto, tila bulag sa tunay na kalagayan ng bansa at bingi sa panawagan ng taumbayan. Habang naghihigpit ang sikmura ng mamamayan, namamayani ang kawalan ng pananagutan mula sa mga opisyal na dapat sanaโy nangunguna sa paghahanap ng solusyon.
Kaya sa araw na ito, dapat nating kilalanin na ang tunay na kagitingan ay nasa mga ordinaryong Pilipinong hindi sumusuko sa gitna ng krisis. Nasa mga jeepney driver, mga manggagawang patuloy na naghahanapbuhay kahit pataas nang pataas ang presyo ng langis at ng mga bilihin, mga estudyante, at mga magulang na araw-araw gumagawa ng paraan para may makain ang kanilang mga anak ang tunay na diwa ng kagitingan. Nasa mga mamamayang naglalakas-loob humingi ng hustisya, tapat na pamamahala, at tunay na serbisyong publiko mula sa mga awtoridad.
Ang panawagang ito ay hindi lamang pagsigaw ng hinaing kundi pag-giit ng ating karapatan. Sapagkat habang patuloy na inuuna ng ilang nasa posisyon ang kanilang pansariling interes, pinapaalala ng kasaysayan na ang lakas at kapangyarihan ay nagmumula sa taumbayan. At sa harap ng krisis at kawalan ng malinaw na direksyon para sa kinabukasan, higit kailanman kailangan ang sama-samang pagkilos ng sambayanan. Kailangan nating tayuan ang tama, ipaglaban ang karapatan, at kumilos bilang iisang lakas para sa kinabukasan.
Sapagkat ang kagitingan ay hindi lamang nasa mga monumento. Ang tunay na bayani ay ang mamamayang araw-araw na lumalaban para mabuhay, para sa kinabukasan ng kanilang mga anak, at ang taumbayan na patuloy na nanawagan para sa isang lipunang mas ligtas, mas patas, at tunay na makatarungan.
At sa harap ng lahat ng pagsubok na ito, isang katotohanan ang hindi mabubura: Habang patuloy na lumalaban ang taumbayan, hindi kailanman magwawagi ang krisis na dulot ng patong-patong na presyo sa petrolyo at bilihin. Sa huli, mula sa sama-samang paglaban, unti-unting nahahawakan ang landas tungo sa mas makatarungang bukas.
Reference
Galang, Gabriell Christel. โBig-time Fuel Hike: Diesel to Spike โฑ19, Gasoline โฑ5 Next Week.โ Manila Bulletin, April 3, 2026. https://mb.com.ph/2026/04/03/big-time-fuel-hike-diesel-to-spike-19-gasoline-5-next-week #:~:text=Manila%20Bulletin%20Business%20The%20Economy,around%20%E2%82%B1120%20per%20liter.
