Housing, Community Development and Resettlement Department - Quezon City

13/09/2026

PROGRAMANG PABAHAY SA POOK MALANTIK, BARANGAY UP CAMPUS

Ang layunin ng proyektong ito ay hindi negosyo. Ito ay isang programa ng pamahalaan na naglalayong magbigay ng maayos, disente, ligtas, at abot-kayang pabahay para sa mga informal settler families na naninirahan sa mga lupain ng University of the Philippines.

Sa patuloy na paghahanap ng pangmatagalang solusyon sa suliranin ng pabahay, aktibong nakikipag-ugnayan ang Lungsod Quezon sa Department of Human Settlements and Urban Development (DHSUD) at sa University of the Philippines upang maisakatuparan ang isang inklusibo, makatao, at makatarungang programa sa pabahay.

Nais din naming ipabatid na ang itatayong proyekto ay isang Public Rental Housing Program, na idinisenyo upang matugunan ang isyu ng affordability at mabigyan ng pagkakataon ang mga kwalipikadong benepisyaryo na magkaroon ng ligtas at disenteng matitirhan sa abot-kayang halaga.

Nauunawaan namin na may mga sektor na nagpahayag ng pagtutol sa proyekto. Gayunman, may mga ulat din na may ilang indibidwal na gumagamit ng malalaking bahagi ng lupang pampubliko nang walang anumang bayad at, sa ilang pagkakataon, ay ipinapaupa pa ang mga ito sa iba para sa pansariling pakinabang. Ang ganitong mga gawain ay taliwas sa layunin ng socialized housing at sa prinsipyong patas na paggamit ng pampublikong lupain.

Ang hangarin ng Lungsod Quezon ay malinaw: mabigyan ng makatao at pangmatagalang solusyon ang usapin ng informal settlements sa mga lupain ng University of the Philippines, habang isinusulong ang karapatan ng mga kwalipikadong pamilya sa disente, ligtas, at abot-kayang pabahay.

12/09/2026

31/08/2026

26/08/2026

09/08/2026

29/04/2026

PAHAYAG NG PAMAHALAANG LUNGSOD QUEZON

Ikinalulungkot ng pamahalaang lungsod na muling nagkasunog sa bahagi ng NIA Road mahigit isang buwan mula nang unang tupukin ng apoy ang daan-daang bahay doon.

Base sa paunang imbestigasyon ng Bureau of Fire Protection-QC, ang sunog ay sanhi ng pagsusunog ng tanso sa isang abandonadong bahay.

Kaya naman hinihiling ng lokal na pamahalaan sa lahat na huwag magpakalat ng maling impormasyon dahil walang batayan na sinadya ang sunog.

Kaugnay nito, nananatiling nakatuon ang ating lungsod sa agarang pagtulong sa mga apektadong pamilya at sa pagtiyak na ang lahat ng hakbang ay naaayon sa batas at may malasakit sa kapakanan ng mamamayan.

Bago pa sumiklab ang sunog kaninang hatinggabi, nakipagpulong na ang ating lungsod sa mga pamilya at ipinaalam sa kanila ang mga tulong na kanilang matatanggap, kabilang na ang pinansyal na tulong at pagiging benepisyaryo ng pabahay sa NIA o sa iba pang lugar na maaari nilang pagpilian.

Noong Abril 28, nagsagawa na ng site visit o “tripping” ang mga pamilya sa Harmony Hills Resettlement Site sa Barangay Batasan Hills at sa QCitizen Homes – Urban Deca Homes.

Tuloy-tuloy ang pakikipag-ugnayan ng HCDRD sa mga pamilya sa NIA at anumang plano o hakbang na gagawin sa lugar ay sinisigurong dumaan sa konsultasyon.