20/08/2026
Mahigit 100 katutubo nakiisa sa DA Bicol sa pagdiriwang ng Araw ng mga Katutubo
SAN AGUSTIN, PILI, CAMARINES SUR – “Ako po ay natutuwa dahil nabigyan ng pansin 'yong mga katutubong Agta-Tabangnon dito sa Camarines Sur, patungkol sa pagsasaka.”
Ito ang pahayag ni Ernesto A. Banzales, Municipal Indigenous People Mandatory Representative mula sa Sagñay, Camarines Sur.
Isa si Ernesto sa 102 katutubo na nakiisa sa paggunita ng International Day of the World’s Indigenous Peoples nitong Agosto 12, 2026, na isinagawa ng Kabuhayan at Kaunlaran ng Kababayang Katutubo (4K) Program sa Regional Rice Training and Convention Center, DA Bicol compound.
Layunin ng aktibidad na kilalanin at bigyang-halaga ang kultura, karapatan, at mahalagang ambag ng mga katutubo sa agrikultura at lipunan. Mga IP communities mula sa l Buhi, Sagñay, Baao, at Iriga City, Camarines Sur ang dumalo.
Sa kanyang mensahe, binigyang-diin ni Regional Executive Director Redel P. Tornilla ang patuloy na pagpapahalaga ng pamahalaan sa mga katutubo. Aniya, anuman ang ahensyang kanilang lapitan para sa pangangailangan at suporta, dapat silang mabigyan ng nararapat na atensyon at prayoridad, lalo na sa Kagawaran ng Pagsasaka na nagpapatupad ng 4K Program para sa mga katutubong pamayanan.
Bilang bahagi ng programa, tinalakay ni Engr. Rosyl F. Tabla, pinuno ng National Commission on Indigenous Peoples (NCIP) Camarines Sur Provincial Office (CSPO) ang mga karapatan ng mga katutubo sa ilalim ng Indigenous Peoples’ Rights Act (IPRA), gayundin ang Free, Prior and Informed Consent (FPIC) Process. Layunin nitong maipaliwanag sa mga kalahok ang kanilang mga karapatan at ang wastong proseso hinggil sa paggamit at pangangalaga ng kanilang ancestral domain.
Tinalakay sa aktibidad ang mga programa at serbisyo ng pamahalaan para sa mga katutubong magsasaka, kabilang ang RSBSA at kahalagahan ng pagpaparehistro, mga programa ng GAD, Corn Program, Rice Program, at High Value Crops Development Program (HVCDP), na naglalayong mapalawak ang kanilang access sa suporta, oportunidad, at mga serbisyong pang-agrikultura.
Sa pamamagitan ng pagdiriwang, hindi lamang kinilala ang kultura, karapatan, at identidad ng mga katutubo, kundi binigyang-diin din ang kahalagahan ng kanilang aktibong pakikilahok sa pagpapaunlad ng agrikultura. Patuloy na isusulong ng Kagawaran ng Pagsasaka ang mga programang naglalayong magbigay ng mas inklusibo, makabuluhan, at angkop na suporta sa mga katutubong pamayanan sa Bicol.
Ulat ni: Vincent Emil Pasumbal
Mga kuhang larawan ni: Z.Abogado
