05/05/2026
Pagpupugay at Pasasalamat sa Isang Natatanging Lider
Sa ngalan ng Pambansang Mataas na Paaralan ng Abucay, isang taos-pusong pasasalamat sa iyo, Sir Almar M. Alvarado, Head Teacher III, School Head sa iyong makabuluhan at mahusay na pamumuno sa loob ng halos dalawang taon.
Sa iyong panunungkulan bilang School Head, ipinamalas mo ang mataas na antas ng dedikasyon, integridad, at malasakit sa kapakanan ng buong paaralan. Sa maikling panahong iyon, naging kapansin-pansin ang pag-unlad ng ating institusyon—hindi lamang sa mga programa at inisyatiba, kundi higit sa lahat, sa pagpapahusay ng pagkatuto ng mga mag-aaral at sa patuloy na paghubog sa kakayahan ng mga g**o.
Sa bawat hamon na ating hinarap, ikaw ay naging matatag na gabay at huwarang lider. Ang iyong pamumuno ay nagbigay-linaw sa ating direksyon at nagpatibay sa ating layunin bilang isang komunidad ng mga tagapagtaguyod ng kalidad na edukasyon.
Bagamat hindi man naging mahaba ang panahon ng iyong pananatili, ang iyong mga ambag at serbisyong inialay ay nag-iwan ng makabuluhang marka na patuloy naming dadalhin at pagbubukluran.
Kami man ay nalulungkot sa iyong pag-alis, ngunit kami rin ay nasisiyahan para sa panibagong yugto at mga oportunidad na darating sa iyo, na lalo pang huhubog sa iyo bilang isang mas mahusay at inspiradong lider. Kami ay naniniwala na mas marami ka pang komunidad na matutulungan at mga buhay na mababago.
Kami ay taos-pusong nagpapasalamat at ipinagmamalaki ang lahat ng iyong nagawa. Nawa’y patuloy kang pagpalain at gabayan sa iyong bagong yugto ng pamumuno.
Sa muli, mula sa buong pamilya ng Pambansang Mataas na Paaralan ng Abucay, kami ay lubos na nagpapasalamat, Sir Almar M. Alvarado.
Hanggang sa ating muling pagsasama-sama.
