04/09/2026
๐ข๐ช๐ช๐, ๐ฆ๐๐ก๐๐ฆ๐๐๐จ๐ฅ๐๐๐ข ๐๐ก๐ ๐ง๐จ๐๐ข๐ก๐ ๐ฃ๐๐ฅ๐ ๐ฆ๐ ๐ ๐๐ ๐ฃ๐๐ ๐๐๐ฌ๐ ๐ก๐ ๐ ๐๐ ๐ ๐๐ฅ๐๐ก๐ข๐ก๐ ๐ก๐๐ฆ๐๐ช๐ ๐ฆ๐ ๐๐ก๐ฆ๐๐๐๐ก๐ง๐ ๐ก๐ ๐ง๐๐ก๐๐๐ฅ ๐ฆ๐๐๐ฅ: ๐ฃ๐ฎ๐ด-๐๐๐ถ ๐ป๐ด ๐ญ๐ฐ ๐ป๐ฎ ๐ก๐ฎ๐ธ๐ฎ๐น๐ถ๐ด๐๐ฎ๐ ๐ป๐ฎ ๐ง๐ฟ๐ถ๐ฝ๐๐น๐ฎ๐ป๐๐ฒ ๐ฎ๐ ๐ ๐ฎ๐ฟ๐ฎ๐ป๐ด๐ฎ๐น ๐ป๐ฎ ๐ฃ๐ฎ๐ด๐ฝ๐ฎ๐ฝ๐ฎ๐๐๐ถ ๐ป๐ด ๐บ๐ด๐ฎ ๐๐ฎ๐ฏ๐ถ, ๐๐๐ถ๐ป๐ฎ๐๐ฎ๐ฎ๐๐ผ๐
Agad na pinakilos ng Overseas Workers Welfare Administration (OWWA) ang welfare and repatriation assistance nito para sa mga pamilya ng dalawang Pilipinong marinong nasawi at para sa 14 na nakaligtas na tripulante ng tanker na SIDR, kasunod ng direktiba ni Pangulong Ferdinand R. Marcos Jr. sa Department of Migrant Workers (DMW) at sa iba pang kinauukulang ahensya na ibigay ang lahat ng kinakailangang tulong sa mga apektadong marino at kanilang mga pamilya.
Labing-anim na Pilipinong marino ang sakay ng SIDR nang maganap ang insidente sa Strait of Hormuz noong gabi ng 31 Agosto 2026. Dalawa sa kanila ang nasawi. Ligtas ang 14 na iba pang tripulante at kasalukuyang nasa Oman, kung saan isinasaayos na ang kanilang maagap na pag-uwi sa Pilipinas.
"Lubos na nakikiramay ang OWWA sa mga pamilya ng ating dalawang marinong nasawi. Nakipag-ugnayan na nang direkta ang ating mga Regional Welfare Office sa kanilang mga pamilya upang malaman ang agarang pangangailangan ng bawat isa at maibigay ang kaukulang tulong nang walang pagkaantala," pahayag ni OWWA Administrator Patricia Yvonne M. Caunan.
"Mahigpit ang ating koordinasyon sa DMW, sa Department of Foreign Affairs, at sa ating Welfare Officers sa Oman at Dubai, gayundin sa manning agency at sa may-ari ng barko, upang matiyak ang tuloy-tuloy na suporta sa mga naulilang pamilya at sa 14 na nakaligtas na tripulante," dagdag niya.
Kabilang sa mga tulong at serbisyong ibinibigay ng OWWA ang mga sumusunod:
โข Direktang pakikipag-ugnayan ng Regional Welfare Offices sa bawat pamilya at regular na pagbibigay ng napapanahong impormasyon
โข Psychosocial first aid, counseling, at patuloy na suporta para sa mga pamilya at sa mga nakaligtas na tripulante
โข Tulong sa repatriation, pagsalubong sa paliparan, transportasyon pauwi sa kanilang mga tahanan, at iba pang agarang pangangailangan
โข Pagproseso ng nararapat na OWWA benefits, kasama ang death at burial benefits para sa mga aktibong miyembro, at pakikipag-ugnayan sa mga kinauukulang panig para sa contractual entitlements, insurance claims, at iba pang kabayarang nararapat sa ilalim ng kanilang employment contract
โข Reintegration at livelihood support para sa mga nakaligtas na marino sa kanilang pagbabalik sa bansa
"Ang pangunahing prayoridad natin ngayon ay ang ligtas at maagap na pag-uwi ng 14 na nakaligtas na marino at ang marangal na pagpapauwi ng labi ng ating dalawang kababayan. Kasabay nito, tinitiyak nating may direktang umaalalay sa bawat pamilya, mula sa psychosocial support hanggang sa pagproseso ng kanilang mga benepisyo at claims," ani Administrator Caunan.
Patuloy na makikipag-ugnayan ang OWWA sa DMW, DFA, at iba pang kinauukulang ahensya at katuwang upang mabigyan ang mga apektadong pamilya ng malinaw at napapanahong impormasyon, at matulungan silang makuha ang lahat ng serbisyo, benepisyo, at claims na nararapat sa kanila.
"Hinihiling namin sa publiko at sa media na igalang ang privacy ng mga naulilang pamilya at ng mga nakaligtas na tripulante. Hinihikayat din namin ang lahat na umasa lamang sa beripikadong impormasyon mula sa pamahalaan habang nagpapatuloy ang koordinasyon at ang mga paghahanda para sa repatriation," pahayag ni Administrator Caunan.
Maaaring tumawag ang mga pamilya ng OFW na apektado ng insidente sa OWWA Hotline 1348, makipag-ugnayan sa pinakamalapit na OWWA Regional Welfare Office, o mag-email sa [email protected].
Ipatutupad ng OWWA ang direktiba ng Pangulo hanggang sa matiyak na ang bawat apektadong marino at pamilya ay nabigyan ng agarang, maayos, at tuloy-tuloy na tulong sa panahong higit nila itong kailangan.
