09/11/2025
Tinaas na sa alert status ang mga probinsya sa buong rehiyon sa harap ng pagpasok ng Bagyong Uwan. Inaasahang tatama ang malakas na hangin, pagbaha, at landslide ngayong Linggo hanggang bukas.
Sa kabila nito, maraming mga manggagawa sa mayor na mga empresa sa Bataan, Pampanga, Bulacan, Tarlac, at Zambales ang inoobliga pang pumasok ngayong Linggo para makamit ang hinahabol na kita ng kapitalista. Marami ring mga pabrika na nagpapataw ng iskemang compressed work week at Sunday work ang maramihan pang nagpapasok sa mga manggagawa ngayong araw sa kabila ng mas maagang naiuulat na banta ng bagyo. Sa bisa ng anti-manggagawang pakanang no work no pay, marami sa mga manggagawa ang sinusuong ang bagyo at baha upang hindi mapag-initan at hindi ‘masayang’ ang isang araw na sahod. Wala ring katiting na simpatya ang mga management sa mga manggagawang nale-late ng pasok dulot ng kalamidad at walang pag-iimbot na pinapagalitan at pinapahiya pa ang mga manggagawa.
Walang pakundangan at walang pinipiling araw ang mga ganid na kapitalista para humuthot ng tubo kapalit ang buhay at kaligtasan ng mga manggagawa. Higit lalo sa panahon ng kalamidad, litaw ang makauring pagsasamantala sa mga aliping kanilang paghuhugutan ng tubo.
Sa kabila naman ng mga sinasabing proteksyon sa karapatan at kaligtasan ng manggagawa, bigo ang DOLE at buong gobyerno na itaguyod ito. Kasabwat sila ng mga kapitalista sa sistematikong pagtrato sa mga manggagawa bilang makinang walang buhay, aliping sinasahuran, inaapit’t pinagsasamantalahan. Kaparis ng kaprasong awa sa baryang taas-sahod ng rehimeng Marcos at kawalan ng hakbang para tuldukan ang laganap na labor-only contracting ng mga manpower agency at hindi makataong kundisyong paggawa ang ginagawang pagpapabayang ito sa mga manggagawa lalong-lalo na sa ating rehiyon.
Samantala, lugmok din sa dusa’t pagsasamantala ang mga manggagawa at mga maralitang lunsod na pinababayaan sa awa ng evacuation at relief operation. Ang mahaba at sistematikong katiwalian sa mga huwad na flood control projects, disaster response, at maging pamamahagi ng ayuda ay naglulugmok sa maraming mga komunidad sa pamalagiang pagkawala ng naipundar na gamit at maging buhay. Libo-libong buhay ang taon-taong nasasawi at milyon-milyon ang nawawaldas sa ari-arian ng mamamayan, na karamihan ay pamily ang mga manggagawa.
Mula sa loob ng pabrika hanggang kanilang komunidad at buong sistema ng lipunan, api at pinagsasamantalahan ang mga manggagawa at maralita. Samantala, ang mga magsasaka, mangingisda, at katutubo naman ay pamalagiang pinuperwisyo sa pagkawasak at pagkaantala ng lokal na produksyon na nagdudulot ng pagsirit pang lalo ng preyo ng mga bilihin. Kasabay ito ng malawakang pangangamkam ng lupa at pagpapalayas sa tirahan para bigyang-daan ang mga huwad na proyektong pangkaunlaran sa rehiyon.
Higit lalo sa panahong ito ng matinding kalamidad, lantad na lantad ang malaking agwat sa buhay at kaligtasan ng mga mayayaman na sya ring humahawak ng kontrol sa ating pagawaan at maging sa pamahalaan. Habang tayong anakpawis naman ang syang binubusabos at syang napeperwisyo’t kinikitil ng sistematikong kapabayaan at katiwaliang ito.
Nananawagan ang Workers’ Alliance in Region 3 – Kilusang Mayo Uno sa mga manggagawa, maralita, at buong uring anakpawis na palitan ang pagtitiis at pagtitimpi ng makauring tapang at paglaban. Panahon na upang tuldukan ang sistemang hindi para sa ating kapakinabangan at kaligtasan! Buuin ang ating pagkakaisa at bigwasan ang mga mapagsamantala!
Tama na, sobra na, wakasan na!
Mga manggagawa at maralita, magkaisa laban sa katiwalian at kapabayaan!
Kumilos at kamtin ang tunay na pagbabagong panlipunan!
Makibaka, huwag matakot!
Sumama sa pagkilos laban sa katiwalian at kapabayaan sa Nobyembre 23 sa Pampanga at Nobyembre 30 sa Luneta!
