06/09/2026
Opisyal na Pahayag ng Barangay 819 Zone 88 District V
PAKSA: PUBLIC OBSTRUCTION
Sa simula pa lamang ng reklamo na inihain ng isa sa ating mga mamamayan sa 8888 Citizen’s Complaint Center, malinaw na nakasaad na ang Barangay 819 ay ilang ulit nang nagbibigay ng abiso tuwing may operasyon ang Manila Traffic and Parking Bureau, kahit pa ito ay tinatawag na “surprise check” ng nasabing ahensiya.
Nais naming ipaalala na may umiiral na Manila Ordinance on Public Obstructions na nagsasabing bawal ang anumang tindahan, paradahan, o harang sa pangunahing pampublikong kalsada. Ito ay batas na dapat alam na ng lahat mula pa sa simula, at tungkulin ng bawat isa na sumunod dito.
Bagamat ang Barangay 819 ay hindi naniningil ng anumang bayarin o nagbibigay ng pahintulot sa mga nagtitinda o nagpaparada sa pangunahing lansangan, malinaw na ito ay ipinagbabawal. Hindi dapat ibinabato sa barangay ang sisi sa tuwing may operasyon ang MTPB, sapagkat ang tama ay dapat manatiling tama, at ang mali ay dapat itama.
Nakakalungkot isipin na may mga indibidwal na iresponsable sa kanilang mga pahayag at nagpapakita ng kawalan ng kaalaman sa pagpapatupad ng tama. Ang Barangay 819 ay patuloy na gumaganap ng tungkulin upang ipaalam at ipaalala sa lahat ang tamang alituntunin, ngunit ang pinakamahalaga ay ang disiplina ng bawat mamamayan sa pagsunod sa batas.
CHAIRMAN JAY & COUNCIL
