28/07/2025
Ngayong araw ng lunes sa aming session sa Sangguniang Panlungsod ay nagbigay tayo ng privilege speech para maging boses ng lahat ukol sa ating nararanasan na pagbaha.
BASAHIN | Isang mapagpalang araw po sa ating lahat, aking mga kasama sa larangan ng paglilingkod at pagtulong. Nandito po ako ngayon bilang isang konsehal mula sa Tanza upang magpahayag ng aking saloobin at panawagan ukol sa kalamidad na ating kinaharap kamakailan.
Sa mga nakaraang araw, naranasan natin ang isang malawakang pagbaha na nagdulot ng matinding paghihirap sa ating mga kababayan. Ito ay nagresulta sa pagkasira ng ari-arian, paghihirap sa hanapbuhay, at higit sa lahat, takot at pangamba sa kaligtasan ng bawat isa.
Ang inyong lingkod ay kabilang sa mga lubhang naapektuhan. Nakita at nadama ko mismo ang hirap na pinagdaanan ng ating mga kababayan sa bawat araw na pagsalba ng kanilang mga gamit, paglilimas, paglilinis, at gabi gabing pagpupuyat upang makahanap lamang ng ligtas na matutulugan.
Sabay sa lakas ng ulan at pagbaha, bumuhos ang iba’t ibang emosyon, hinaing at sigaw ng pagtulong, mga panawagan para sa isang tunay na solusyon.
Sa panahong ito ng pagsubok, hindi kailangang magturuan tayo ng sisi. Ang mahalaga ay magkaisa tayo, magtulungan, at kumilos tungo sa isang konkreto at malinaw na solusyon na hindi lamang natatapos sa bawat ayuda.
Ngayon po, higit kailan pa man, panahon na upang ipakita ang tunay na diwa ng bayanihan. Hindi tayo nagkakanya-kanya sa panahon ng kagipitan.
Ramdam ko ang ating mga kababayan mula sa Celest, San Jose, sa buong Tanza Uno at Dos, at sa lahat pang mga lugar na lubhang naapektuhan.
Ang inyong lingkod ay hindi na rin po mag-aatubiling pasalamatan ang lahat ng tumulong mula sa lokal at nasyonal na pamahalaan.
Sa ating Congressman Toby, Mayor John Rey Tiangco at Vice Mayor Tito Sanchez na personal na bumababa upang tignan ang ating kalagayan. Ang kanilang pagtulong ay isang patunay na hindi po tayo nag-iisa sa laban na ito.
Sa DSWD, mga Uniformed Personnel at lahat ng volunteers na nag tulong tulong upang maipaabot sa mga tao ang lahat ng pwedeng tulong gaya ng rescue and relief operations.
Sa ating City Health Office at mga kawani ng Health Centers kabilang ang bawat BHW na patuloy ang pagbibigay ng gamot upang siguraduhin na ang bawat isa ay ligtas sa mga sakit.
Sa pamunuan ng larangan ng edukasyon sa ating lungsod, sa inyong pagpapagamit ng ating mga paaralan na nag silbing evacuation centers upang magkaroon ng pansamantalang ligtas na matutuluyan ang ating mga kababayan.
Higit sa lahat, Sa kawani ng Barangay mula sa Kapitan at mga kagawad katuwang ang Sangguniang Kabataan na nagsilbing unang sandalan para sa ating mga kababayan. Kitang kita ko ang kanilang mga pagod mabigay lamang ang maayos na serbisyo para sa lahat.
Ang mahalaga ay may leksyon tayong nakuha sa mga kaganapan. ITUWID kung may PAGKAKAMALI at AKSYONAN ang mga KAKULANGAN.
Ang bawat isa sa atin, may posisyon man o simpleng mamamayan ay may limitasyon depende sa kakayahan at sitwasyong kinapapalooban.
Ako po ay nagsasalita hindi lamang bilang isang konsehal, kung hindi bilang boses ng isang simpleng ilaw ng tahanan at mamamayan ng ating lungsod. Kaya’t sa ngalan ng aking munting lugar sa Tanza, hiling po namin ang pang matagalang solusyon bilang paghahanda sa mga darating pang mga pagsubok.
We feel HELPLESS at one point in time but still we should remain HOPEFUL all the time.
Sama-sama at tulong tulong po tayo sa muling PAG ANGAT at PAG BANGON.. Maraming Salamat po!
