25/08/2026
PAHINUMDOM SA RESPONSABLENG PAGPAMATUD-AN SA IMPORMASYON
Sa atong mga kauban sa media, ilabi na sa Magnificent FM, among respetadong pahinumdom nga palihog magmatngon ug mahimong responsable sa pagkuha, pag-edit, ug pagmantala sa mga impormasyon nga may kalabutan sa police operations ug mga insidente, ilabi na kadtong naglambigit sa mga menor de edad.
Palihog susiha pag-ayo ang inyong title/headline ug caption ug siguroa nga kini tukma ug nahiuyon sa orihinal nga police advisory. Likayi ang paggamit og mga pulong o pahayag nga wala gigamit o wala gipamatud-i sa orihinal nga source, tungod kay mahimo kini nga makausab sa kahulugan sa impormasyon.
Pananglitan, ang pulong nga โNAGPALUYOโ nga gigamit sa inyong headline wala gigamit sa official advisory sa Mawab Municipal Police Station. Busa, angay nga likayan ang paggamit niini kung walay klarong opisyal nga basehan, aron dili ma-misinterpret o ma-overstate ang insidente.
Ang official advisory sa Mawab MPS nag-ingon lamang nga usa (1) ka menor de edad ang nailhan nga adunay kalambigitan sa mikalat nga Facebook post, ug padayon pa ang imbestigasyon aron mailhan ang uban pang posibleng nalambigit.
Gina-awhag usab ang media nga makig-coordinate ug mangayo og permiso o clearance gikan sa orihinal nga source, ilabi na sa Mawab MPS, sa dili pa i-repost, i-edit, o gamiton ang official police advisory.
Ang tukmang headline ug caption importante aron malikayan ang sayop nga interpretasyon, dili hustong impormasyon, ug dugang nga kahadlok sa publikoโilabi na sa mga insidenteng may kalabutan sa mga estudyante ug menor de edad.
Magtinabangay kita sa responsable, tukma, ug etikal nga paghatag og impormasyon alang sa kaluwasan sa atong komunidad.
โ Mawab Municipal Police Station
NAGPALUYO SA SCHOOL SHOOTING THREAT SA MAWAB NAILHAN NA; SEGURIDAD SA LAAK NHS GIPANIGURO
Nailhan na sa kapulisan ang usa ka menor de edad nga giingong may kalambigitan sa mikatag nga โschool shooting threatโ online nga nakahatag og alarma sa mga estudyante, magtutudlo ug ginikanan sa Lorenzo S. Sarmiento Sr. National High School sa Mawab, Davao de Oro.
Gikompirma sa Mawab Municipal Police Station ang pagkasikop sa menor de edad human mikaylap sa social media ang maong hulga.
Samtang, gipakusgan usab ang seguridad sa mga eskwelahan sa Davao de Oro atol sa insidente.
Sa Laak National High School, gipasaligan sa otoridad ang kaluwasan sa mga estudyante, magtutudlo ug mga ginikanan human adunay post gamit ang usa ka fake account nga giingong nakahatag usab og kabalaka sa publiko.
Matod sa mga opisyal, pabantayan og mga pulis ang maong tulunghaan atol sa klase aron masiguro ang kaluwasan sa tanan.
Gipahayag usab nga tinguha karon nga madakpan ang responsable sa pagpakaylap sa dili tinuod nga impormasyon, ilabi na kon kini makahatag og kahadlok ug alarma sa komunidad.
