21/04/2025
Ang Sinugdanan sa Barangay Buena Suerte
Sa tuig 1940s, kini nga lugar sakop pa sa lungsod sa Piñan, Zamboanga del Norte. Ang mga tawo maglakaw lang o mosakay ug kabayo ug kalabaw gikan sa Piñan paingon sa maong lugar. Gitawag nila kini og GOMAY tungod kay ang ilang agianan nagsubay sa suba nga gitawag og Gomay River. Bisan asa pa sila moadto—Dionom, Silano, Salvacion (Mutia), o Tinglan—kon pangutan-on sila kung asa sila paingon, motubag gihapon sila og "Gomay".
Paglabay sa mga katuigan, nakahunahuna ang mga lumulupyo nga importante nga aduna silay kaugalingong ngalan sa ilang barangay. Aron masulbad kini, ilang pinuno nga si Mr. Antonio Labadan, uban sa mga konsehal nga sila Mr. Vicente Sumalpong, Mr. Magno Manlawe, ug uban pa, nagtigom sa tanang lumulupyo—mga Bisaya ug mga Subanen. Ang maong panagtigom nahitabo panahon sa ilang Tabo o Pentakasi.
Daghan ang misugyot og lain-laing ngalan para sa barangay. Apan, ang pulong nga "BUENAS" nakadaug sa kadaghanan sa boto. Misiyagit pa gani sila og "MABUHAY!" tungod kay nakabantay sila nga daghan sila og humay, mais, ug mga utanon. Dugang pa, daghan usab og mga anak ang matag pamilya. Tungod niini, ilang gidugang ang pulong nga "SUERTE".
Niadtong Setyembre 15, 1948, ilang opisyal nga gipahibalo nga ang bag-ong ngalan sa ilang lugar mao na ang "Barangay Buena Suerte".
---
Mga Purok ug Sitio
Ang Barangay Buena Suerte naglangkob og upat (4) ka Purok:
1. Purok 1 – Lumad Area: Dinhi nagpuyo ang daghang pamilya sa Subanen o lumad nga nagpadayon sa ilang kultura ug tradisyon.
2. Purok 2 – Centro Barrio: Mao ni ang sentro sa barangay, diin makita ang merkado, eskwelahan, ug ubang kalihokan.
3. Purok 3 – Campo Subano: Kalma ug malinawon nga lugar nga puno sa uma ug mga lumulupyo nga Subanen.
4. Purok 4 – Barangay Site: Dinhi nahimutang ang barangay hall ug mga opisina sa gobyerno.
Aduna sab kini duha (2) ka Sitio:
Sitio La Purisima: Usa ka hilom nga lugar nga ginganlan sa La Purísima Concepción, nga nagpakita sa lig-on nga pagtoo sa Katolisismo.
Sitio Mahayag: Usa ka lugar nga pang-uma nga nagpasabot sa “kahayag” ug paglambo, kay mas daghan na ang mga umahan ug aktibo ang mga tawo.
---
Populasyon ug Lokasyon
Base sa 2020 nga sensus, ang Barangay Buena Suerte adunay 1,358 ka tawo, nga nagrepresentar sa 11.58% sa tibuok populasyon sa Mutia. Ang barangay naa sa elevation nga 496.7 metros ibabaw sa dagat, busa presko ug bugnaw ang palibot.
---
Pagtuo ug Tradisyon
Ang mga tawo sa Buena Suerte mapinadaygon sa ilang pagtoo. Matag tuig ilang gisaulog ang barangay fiesta alang sa Immaculate Conception sa Mahal nga Birhen Maria. Kini nga selebrasyon nagpakita sa ilang pagkahiusa, kalipay, ug pagtuo sa Ginoo. Immaculate Conception Chapel - Buena Suerte, Mutia, Zamboanga del Norte
