06/08/2023
Sa harap ng mga sigalot na ating nararanasan, ang kilusang kabataan na iniluwal ng nabubulok na katangian ng lipunan at ang militanteng tradisyon ng mga Iskolar ng Bayan ay mananatiling totoo sa tungkulin nitong pagsilbihan ang interes hindi lamang ng kapwa nito kabataan, ngunit higit lalo ang interes ng mga magbubukid, manggagawa, at maralita upang ipaglaban kung ano ang nararapat para sa lahat.
Ano ang kalagayan ng sektor ng edukasyon?
Sa kasalukuyan, ang βHybrid Learning Modalityβ na ipinataw ng Commission on Higher Education (CHED) ay bagong mukha lamang ng sumisidhing kolonyal, komersyalisado, at anti-demokratikong katangian ng edukasyon sa bansa, na nagpapanatili ng mga krisis na nagpapahirap sa karaniwang estudyante at kaguruan, na nagpapaliit at nagpapakipot ng oportunidad sa pagtamasa ng edukasyon.
Habang ganito ang sitwasyon sa mga paaralan ay walang sinasayang na oras ang estado sa pagratsda ng mga anti-estudyanteng polisiya na sumusupil sa kalayaang pang-akademiko ng mga kabataan. Tuloy ang pagsalya ng mga mambabatas sa panunumbalik ng Mandatory ROTC upang gawing lehitimo ang presensya ng militar sa loob ng mga paaralan.
Hitik na hitik ang 4-10% tuition and other fee increase (TOFI) sa mga pribadong paaralan habang ang mga state universities and colleges (SUCs) ay kumakaharap sa taunang kaltas-badyet na nagreresulta sa kawalan ng sapat na mga klasrum, lumang mga pasilidad, kakulangan sa g**o at mga empleyadoβhabang nakasilip na rin sa bintana ang muling panunumbalik ng matrikula sa mga SUCs sa mukha ng socialized tuition system at pagpataw ng mga income-generating scheme.
Paano ito tumatagos sa kongkretong kalagayan ng PUP?
Sa ilalim ng 2024 NEP, ang P2.9 Billion na proposed budget ng pamahalaan sa PUP ay kakapusin ng P3.9 Billion mula sa isinumiteng kabuuang 2024 budget proposal ng ating pamantasan na P6.9B. Sa ganitong balangkas, imposible pa rin na maisakatuparan ang 100% face-to-face classes na ligtas, aksesable, at dekalidad.
Madilim ang kinaharap ng mga Iskolar sa dalawang buwan na power outage sa Mabini Campus. Kakasimula pa lamang ng mga pisikal na klase nang puwersahan na namang pinabalik sa online ang mga estudyante. Maraming mga magulang at mga anak ang nadismaya at nanghinayang sakanilang rekurso at panahon.
Sa ngayon, malayo pa rin tayo sa linawag na ating tinatanaw dahil kagaya kung gaano tayo ka-salat sa pondo upang makabili ng krudo sa pagpapagana ng mga generator ay hindi rin natin maibigay ang mga batayang pangangailangan ng mga Iskolar ng Bayan para sa pagkatuto. Halimbawa, tila nanlilimos na ang ating mga kabataang alagad ng midya mapondohan lamang ang kanilang mga produksyon; naliligaw na sa sarili nilang mga kampus ang ating mga inhinyero at arkitekto kakahanap ng espasyo para makapag-aral; at ang ating mga siyentista at teknolohista ay walang magamit na kompyuter at laboratoryo. Samantala, libo-libong kabataan ang pinagsasaraduhan na ng pinto dahil sa pagkalusaw ng Senior High School sa main at accountancy program sa ibang mga branches at campuses.
Tiyak din ang epekto ng kakulangan ng badyet sa kaguruan at manggagawa ng ating pamantasan. Higit na hindi maisasakatuparan ang panawagan ng mga kaguruan para sa pagpapataas ng entry-level pay para sa mga g**o. Magiging bara ito sa laban ng mga janitor at iba pang manggagawa sa PUP para sa nakabubuhay na umento sa sahod at pagkontra sa kontraktwalisasyon.
Sa kabila ng lahat ng ito, tuloy ang mulat na pagtapak ng estado sa ating kalayaang pang akademiko at demokratikong karapatan. Inaasahan natin ang mas mainit pa sa kape na presensya ng mga militar at iba pang pwersa ng estado sa loob ng pamantasan dahil sa abrogation ng PUP-DND accord na higit na maglalagay sa panganib sa lahat ng miyembro ng ating komunidad.
Bakit ito nangyayari?
Ang sistema ng edukasyon sa bansa ay higit na hindi maabot-abot ng karaniwang mamamayan, bagsak ang kalidad, at pasista na ang tanging hangarin ay tulungang makakubra ng kapital ang mga pinakamayayamang negosyante, pagsilbihan ang interes ng mga dayuhan, at pagsamantalahan ang talino at lakas-paggawa ng mga kabataanβhigit sa panahong sila ay maging mga manggagawa na rin na sasalubungin ng mababang sahod at hindi makataong kondisyon ng paggawa.
Hindi natin maikukubli na pinapatay sa gutom ang milyon-milyong mamamayan dahil sa pagsirit ng presyo ng mga pangunahing bilihin at pampublikong serbisyo, habang tinataga pa rin ng mababang umento sa sahod ang karaniwang manggagawang Pilipino. Sa kabilang banda, sinamantala ni Marcos, Jr. ang panahon sa pagsasabatas ng pinakamalaking pambubudol ng administrasyon na Maharlika Investment Fund at pagpasok ng Pilipinas sa mga hindi pantay na pampulitika at pang-ekonomiyang tratado sa US at pag asa nito sa pag-aangkat at dayuhang pangungutang na magpapanatili ng mga krisis na tagos sa sikmura ng mga mamamayan.
Ang kasalukuyang anyo ng paghaharing US-Marcos II ay sumasalamin sa katayuan ng Pilipinas na higit na mag-aanak ng ibaβt iba pang mga krisis na mararanasan ng mga kabataan at mamamayan na siya ring mangangahulugan ng pag-ahon ng mas malalaki pang laban na tatanganan ng sambayanan.
Ano ang hamon sa atin?
Ang Student Council Elections (SCE) ay hindi panahon ng pagbubuhat ng sarili nating mga bangko o pagpapasikat ng ating mga kandidato, ito ay isang aktibidad na tuwirang ekspresyon ng partisipasyon ng lahat ng miyembro ng ating komunidad sa mga pulitikal na usapin sa loob at labas ng pamantasan.
Hamon sa atin na mamaksimisa ang panahong ito upang pamunuan at bigyan ng direksyon ang ating mga labanβmula sa mga diskusyon, talastasan, hanggang sa pagboto ng ating mga tunay, palaban, at makabayang kandidato.
Sa panahong higit na aktibo sa pulitika ang buong komunidad, malaki ang ating tungkuling ipagsilbi ito sa higit pang pagpapalakas ng kampanya at pakikibakang masa. Walang patlang tayong susuong sa hamon ng tunay at ganap na representasyon sa bawat antas ng pamumuno sa ating pamantasan lalo naβt kasunod ng SCE ang muling pagpili ng rehente ng mga mag-aaral na tatagos pa sa nalalapit na PUP Presidential Elections.
Hindi pa tapos ang deklarasyon natin na . Sa halip, tayo ngayon ay nasa yugto kung saan higit ang hamon sa atin na palaparin ang ating mga hanay bilang pagpapatibay ng paninindigan na tayo pa rin ang may hawak at papanday ng sarili nating kinabukasan.
Bitbit ang ating mga lokal na laban patungong pambansang entablado ay ipagsisilbi natin ang ating mga tagumpay sa loob ng pamantasan sa pakikibaka ng malawak na hanay ng mamamayan. Mula eskwelahan hanggang sa mga komunidad, iisa ang hamon sa ating lahat---
Tuloy-tuloy na magpalakas at kamtin ang malayang bukas! Iskolar ng Bayan, paglingkuran ang sambayanan bilang !
