26/09/2022
MALABUYOC LDRRMO ANTI-DENGUE MEASURES. Mipahigayon ang Malabuyoc Local Disaster Risk Reduction and Management Office og mga lakang aron pagsugpo sa dugang pagkuyanap niining mga kaso karon sa Dengue nga mitumaw sa lungsod sa Malabuyoc.
Nagkanayon ang acting OIC nga si Lourdes Bajo nga ang pag-misting ug disinfection sa mga lugar nga posibleng maoy sanayan sa mga lamok ang gipunterya sa LDRRMO Team, labi pa naidtong dapit diin nagagikan ang mga pasyente.
Sa nahitabo nga joint operation sa LDRRMO ug RHU karong buntaga, nagkatinabangay ang mga residente sa Barangay Poblacion 2 Malabuyoc ug ang mga field operatives sa panghinlo sa palibot.
Kanunay nga gi-monitor sa LGU ang mga insidente nga may kalabot ang estado sa kahimsug sa mga residente sa lungsod ug andam ang mga departamento sa munsipyo sa pagresponde sa mga kakuliang moresulta bahin niini.
Gani samtang nahitabo ang pagpamaybay sa kadalanan sa mga grupo nga gitahasan, personal nga misusi sa gipahigayong operation ang atong Bisemayor, si Vice Mayor Ann Allosada
Bisan pa man nga dili angay ikaalarma ang kaso sa Dengue sa lungsod, gipahimangnuan gihapon ang tanan nga magmatngon sa bisan unsang matang sa sakit ug kanunayon ang paglimpyo sa inyong tagsa-tagsa ka mga tugkaran.
