06/09/2026
SOLCOM Magiting Run 2026: Takbo ng Pagpupugay, Hakbang ng Pagkakaisa
05 Setyembre 2026 | Camp Guillermo Nakar, Lucena City — Matagumpay na naisagawa ng Southern Luzon Command, Armed Forces of the Philippines ang Magiting Run 2026 bilang bahagi ng paggunita sa Araw ng mga Bayani at pagdiriwang ng ika-47th National Reservist Week 2026.
Humigit kumulang 1,210 ang nakiisa sa makabuluhang aktibidad kabilang ang mga kasapi ng ibat-ibang ahensya ng gobyerno, mga kasundaluhan at kawani ng SOLCOM, Quezon Police Provincial Office, Bureau of Jail Management and Penology, Bureau of Fire Protection, at Philippine Coast Guard, mga reservists, estudyante ng Reserve Officers' Training Corps, at ang mga mamamayan mula sa komunidad.
Naging tampok din sa aktibidad ang pakikiisa ng mga kalahok mula sa iba’t ibang henerasyon, kabilang ang 72-anyos na participant na patuloy na nagpakita ng sigla at dedikasyon sa paglilingkod at pakikiisa; ang 11-anyos na kalahok na nagpamalas ng kahanga-hangang bilis at determinasyon; at ang 5-anyos na pinakabatang kalahok ng aktibidad.
Sa kanyang mensahe, binigyang-diin ni LTGEN CERILO C BALAORO JR PA, Commander, SOLCOM, “Sa pagdiriwang natin ng Araw ng mga Bayani ngayong taon, layunin natin na mas patatagin pa ang pisikal na kalusugan at ang ugnayan ng ating mga kasundaluhan, sibilyan, at ng ating mga katuwang sa pagtupad ng ating mandato. Ang aktibidad na ito ay nagsisilbi ring plataporma upang alalahanin ang naging sakripisyo at ambag ng ating mga bayani. Sa ating pagtakbo, naalala natin ang ating mga ninuno na tumakbo sa mas mahirap na karera – isang karera para sa ating kalayaan at para sa ating kinabukasan bilang isang bansa.”
Dagdag pa niya, naging makahulugan rin ang programa sa pagdiriwang ng 47th National Reservist Week, na may temang “Modernong bayanihan: Takbo para sa West Philippine Sea.” Bilang mga laang kawal o reservists ng ating Sandatahang Lakas, kayo ay patunay na ang paglilingkod sa bayan ay walang kinikilalang propesyon o antas sa buhay. Malaki ang ginagampanan ninyong papel sa ating organisasyon dahil kayo ang nagsisilbing “Force multipliers” ng ating sandatahang lakas.”
Sa pamamagitan ng sama-samang pagtakbo, ipinakita ng mga kalahok na ang diwa ng kabayanihan ay patuloy na nabubuhay sa pagkakaisa at sama-samang pagkilos ng bawat Pilipino.
Sa huli, bawat hakbang na isinagawa sa Magiting Run 2026 ay naging simbolo ng pagkilala sa kabayanihan ng mga nauna nang naglingkod at nag-alay ng kanilang buhay para sa bayan, gayundin ng paninindigan ng kasalukuyang henerasyon na ipagpatuloy ang kanilang marangal na adhikain.
Sa bawat pagtakbo ay may pagpupugay; sa bawat hakbang ay may pagkakaisa; at sa bawat reservist at mamamayang handang maglingkod, patuloy na nabubuhay ang diwa ng kabayanihan.
#𝗔𝗙𝗣𝘆𝗼𝘂𝗰𝗮𝗻𝗧𝗥𝗨𝗦𝗧
