01/09/2026
PALAYAIN SI JOHN RUIZ!
Mariing kinukundena ng Kilusang Mayo Uno ang pag-aresto kay John Ruiz, Makabayan Vice President for Visayas. Kasunod ito ng pagkilos ng mga manggagawa at mamamayang Cebuano kahapon laban sa imperyalistang pandarambong at gera upang ipagdiwang ang National Heroes Day.
Bahagi ito ng nagpapatuloy na atake laban sa mga progresibo sa Cebu. Kamakailan, iligal na tinanggal sa trabaho si BIEN Vice President for Visayas Kyle Enero sa kasagsagan ng paglaban para sa makabuluhang dagdag-sahod at ng paglalantad ng karumaldumal na kalagayan sa paggawa ng BPO workers. Gayundin, kinasuhan ng paglabag ng BP880 si KMU Vice Chairperson for Visayas Jaime Paglinawan kaugnay ng protesta sa DPWH laban sa korapsyon noong nakaraang taon.
Nananawagan ang KMU para sa kagyat na paglaya ni John Ruiz, at sa agarang pagbabasura ng mga gawa-gawang kaso laban sa kanya at sa lahat ng progresibong mamamayang naggigiit ng kanilang mga makatwirang panawagan. Karapatan ng mamamayan ang magpahayag at magprotesta!
