03/06/2026
LSB ug DepEd Talaingod Nagpahigayon og Panagtigum; Bag-ong PSDS Giabiabi ug mga Dagkong Programa sa Edukasyon Gihisgutan
TALAINGOD, Davao del Norte – Mainiton nga giabiabi sa Local School Board (LSB) sa Talaingod, ubos sa pagpanguna ni Mayor Jonnie A. Libayao, ang bag-ong na-install nga Public Schools District Supervisor (PSDS), Sir Arnel Labasan, atol sa usa ka importante nga panagtigum uban sa mga miyembro sa LSB ug mga representante gikan sa DepEd.
Usa sa mga nag-unang hisgutan sa maong tigum mao ang pag-abli sa hiring process alang sa Local School Board (LSB) Teachers alang niining tuiga. Gipahibalo nga ang pagdawat sa mga aplikasyon magsugod karong adlawa ug molungtad hangtod sa Biyernes, Hunyo 5, 2026, aron masiguro ang padayon nga paghatag og kalidad nga edukasyon sa mga kabatan-onan sa Talaingod.
Gihisgutan usab ang mga preparasyon alang sa Provincial Meet 2026 nga pagahigayunon karong Setyembre 2026. Positibo nga mipahayag ang LGU ug ang mga kaubang opisina sa ilang suporta alang sa maong kalihukan. Gipaningkamotan sa mga stakeholders nga matigom ug ma-allocate ang gikinahanglang pondo aron masuportahan ang target nga 250 ka participants, lakip ang mga athletes, coaches, trainers, ug chaperones.
Lakip usab sa mga agenda ang umaabot nga Camp Libayao Jamboree, ingon man ang mga dagkong kalihukan sa DepEd sama sa Journalism ug Division Festival of Talents (DFOT). Gipalig-on sa panagtigum ang panaghiusa ug kooperasyon tali sa DepEd ug LGU aron masiguro ang kalampusan sa mga programa ug kalihukan alang sa mga kabatan-onan sa lungsod.
Sa kinatibuk-an, napakita sa maong panagtigum ang 100% nga suporta sa Lokal nga Panggamhanan ngadto sa DepEd Talaingod, usa ka lig-on nga panag-uban nga nagtumong sa pagpalambo sa kalidad sa edukasyon ug sa kinatibuk-ang kaayohan sa mga estudyante sa Talaingod.