https://www.facebook.com/635913756276360/

Juban Municipal Information Office, North Poblacion, Juban (2026)

24/10/2026

JUBAN MARKS 26TH WEEK OF COMMUNITY CLEAN-UP DRIVE, STRENGTHENS DENGUE PREVENTION EFFORTS

Hindi na bago sa mga barangay sa bayan ng Juban ang maglaan ng oras tuwing Sabado para sa paglilinis ng kanilang komunidad. Sa loob ng 26 na linggo, patuloy itong isinasagawa bilang pagsunod sa direktiba ni Mayor Rogel “Botox” Fulleros na panatilihin ang kalinisan, kaayusan at kaligtasan sa lahat ng 25 barangay ng bayan.

Ngayong Sabado, Oktubre 24, 2026, muling pinangunahan ng mga barangay official ang paglilinis sa kani-kanilang nasasakupan, katuwang ang mga residente at iba pang miyembro ng komunidad.

Kabilang sa mga nakibahagi ang
putingsapa,Embarcadero,Taboc,Bacolod,Buraburan,Rangas,Catanusan,Binanuahan,Añog,Tinago,Aroroy,Cogon,

Dahil sa mataas na bilang ng mga kaso ng dengue sa lalawigan ng Sorsogon, higit na pinaigting ang lingguhang paglilinis, partikular ang pagtanggal ng mga basurang maaaring pag-ipunan ng tubig at maging pamugaran ng mga lamok na nagdadala ng sakit.

Kapuri-puri ang patuloy na suporta at pakikiisa ng mga barangay sa programang ito, lalo na ang mga opisyal na nangunguna sa pag-oorganisa at aktuwal na paglilinis sa kanilang mga nasasakupan. Sa kabila ng kani-kanilang tungkulin at personal na responsibilidad, patuloy silang naglalaan ng oras kasama ang mga residente upang mapanatiling maayos ang kanilang komunidad.

Sa pag-abot ng ika-26 na linggo, nararapat kilalanin ang sama-samang pagsisikap ng mga barangay official, residente at mga katuwang sa komunidad na patuloy na tumutugon sa direktiba ni Mayor Fulleros. Ang kanilang tuloy-tuloy na pakikilahok ang nagpapanatili sa lingguhang clean-up drive bilang isang regular na gawain sa mga barangay ng Juban, lalo na ngayong higit na kailangan ang mga hakbang upang makaiwas sa dengue at iba pang sakit na may kaugnayan sa maruming kapaligiran.

24/10/2026

PRESERVING RECORDS, SERVING GENERATIONS! HAPPY BIRTHDAY, MA’AM NANY!

Sa bawat mahalagang yugto ng buhay ng isang Jubangnon, may mga dokumentong nagsisilbing opisyal na tala ng kanilang pagkakakilanlan, pamilya, at mga karapatan. Sa likod ng mga birth certificate, marriage certificate, at iba pang civil registry records ay ang responsibilidad na tiyaking maayos, tumpak, at ligtas ang mga impormasyong ipinagkakatiwala ng publiko.

Ngayong araw, isang mainit at taos-pusong pagbati sa ating Municipal Civil Registrar, Ma’am Nany Haboc, sa pagdiriwang ng kanyang kaarawan!

Ang pamumuno sa Municipal Civil Registrar's Office ay nangangailangan ng masusing pag-unawa sa mga proseso, pagiging maingat sa bawat dokumento, at maayos na pakikitungo sa mga mamamayang nangangailangan ng serbisyo. Sapagkat ang bawat rekord na pinangangalagaan ay may kaakibat na kuwento ng isang tao at pamilyang Jubangnon.

Ma’am Nany, sa iyong espesyal na araw, nais naming ipaabot ang aming pagkilala at pasasalamat sa iyong patuloy na paglilingkod. Nawa'y maging puno ng saya at magagandang alaala ang iyong kaarawan kasama ang iyong pamilya at mga mahal sa buhay.

Hangad din namin ang marami pang taon ng tagumpay, personal na kasiyahan, at inspirasyon sa iyong propesyon at buhay.

Mula sa Lokal na Pamahalaan ng Juban, sa pangunguna ni Mayor Rogel “Botox” Fulleros, maligayang kaarawan po.

23/10/2026

BFP JUBAN TAKES ACTIVE ROLE IN LGU’S ALTERNATE FRIDAY ZUMBA FITNESS PROGRAM

Muling isinagawa ng Lokal na Pamahalaan ng Juban ang Alternate Friday Zumba Fitness Program ngayong Biyernes, Oktubre 23, 2026, sa Juban Municipal Ground, kung saan tampok ang masiglang pakikilahok ng BFP Region 5 Juban Fire Station bilang isa sa mga lead department sa aktibidad
kasama ang mga miyembro ng KALIPI Cluster mula sa Barangay Embarcadero at Barangay Cogon.

Buong-siglang nakisabay ang mga tauhan ng BFP Juban sa mga Zumba routine, na nagbigay ng dagdag na enerhiya sa regular na fitness session ng pamahalaang bayan. Bahagi ang kanilang partisipasyon sa nakatakdang salitan ng mga lead department na sumusuporta sa programa.

Layunin ng aktibidad na ito na mahikayat ang mga kawani ng pamahalaan at mga sektor ng komunidad na maging aktibo at maglaan ng oras para sa kanilang kalusugan sa kabila ng araw-araw na trabaho at responsibilidad.

Sa ilalim ng administrasyon ni Mayor Rogel “Botox” Fulleros, binibigyang-prayoridad ng LGU Juban ang kalusugan at kapakanan ng mga kawani bilang mahalagang bahagi ng responsableng pamamahala. Sa pamamagitan ng regular na wellness activities at pagtutulungan ng iba't ibang tanggapan at sektor ng komunidad, isinusulong ang isang lokal na pamahalaang hindi lamang nakatuon sa paghahatid ng serbisyo, kundi maging sa pangangalaga sa mga taong nasa likod nito. Nakasentro ang inisyatibang ito sa isang mahalagang prinsipyo ng mahusay na pamamahala: ang mas malusog at handang hanay ng mga kawani ay mahalagang pundasyon ng mas maaasahan at epektibong serbisyo publiko para sa bawat Jubangnon.

23/10/2026

'LIGTAS NA PAGGUNITA SA UNDAS'.
Handa. Ligtas. Walang Sunog.

Panoorin ang mga mahahalagang paalala ng BFP Region 5 Juban Fire Station sa mga Jubangnon kaugnay ng nalalapit na araw ng pagunita natin sa ating mga mahal sa buhay o Undas 2026.

23/10/2026

LGU JUBAN RECEIVES DILG RECOGNITIONS AT ALDAW NIN HONRA

Pinarangalan ang Lokal na Pamahalaan ng Juban para sa mga nagawa nito sa larangan ng child-friendly governance, kapayapaan at kaayusan, at pagpapatupad ng mga programa sa barangay sa Aldaw nin Honra ng Department of the Interior and Local Government (DILG) Region V, ngayong Biyernes, Oktubre 23, 2026, sa The Pepperland Hotel, Legazpi City, Albay.

Kabilang sa mga natanggap ng LGU Juban ang Plaque of Recognition as Exemplary LGU in Child-Friendly Governance, bilang pagkilala sa mga programa at inisyatiba nito sa pangangalaga sa karapatan, kaligtasan at kapakanan ng mga bata para sa Performance Year 2025.

Ginawaran din ang munisipalidad ng Plaque of Recognition as Exemplary LGU in the 2026 Peace and Order Council Audit, matapos makapagtala ng 97.69% High Functionality Rating sa pagsusuri sa Local Peace and Order Council batay sa performance nito noong 2025.

Kasama rin sa mga natanggap na pagkilala ang Exemplary LGU in LCAT-VAWC Assessment, kung saan nakapagtala ang Juban ng 108% rating sa pagsusuri sa Local Committee on Anti-Trafficking and Violence Against Women and Their Children (LCAT-VAWC). Higit sa mataas na rating, mahalaga ang pagkilalang ito dahil nakatuon ito sa proteksiyon ng mga kababaihan at bata sa Juban laban sa karahasan, pang-aabuso, trafficking at iba pang uri ng pananakit at pagsasamantala. Partikular na kapuri-puri ang naging papel ng Municipal Social Welfare and Development Office (MSWDO) sa pangunguna sa mga programa at hakbang upang matiyak na may malalapitan, mapagsusumbungan at makukuhang tulong ang mga kababaihan at batang nangangailangan ng proteksiyon. Sa pakikipagtulungan ng Office of the Municipal Administrator, Municipal Health Office (MHO), Municipal Disaster Risk Reduction and Management Office (MDRRMO) at iba pang katuwang na tanggapan, nakamit ang mataas na rating na ito. Kaakibat ng mga pagsisikap na ito ang dalawa sa pinaka mataas na adhikain ng pamumuno ni Mayor Rogel “Botox” Fulleros na maiangat ang dignidad at moralidad ng mga Jubangnon, kung saan mahalagang bahagi ang paggalang sa karapatan, kaligtasan at kapakanan ng bawat babae at bata sa munisipalidad.

Bukod dito, tumanggap ang Juban ng Special Citation sa ilalim ng 2026 Retooled Community Support Program (RCSP) – Barangayan sa Bikol, bilang pagkilala sa suporta at kontribusyon ng lokal na pamahalaan sa matagumpay na pagpapatupad ng programa sa isang barangay sa munisipalidad.

Bilang kinatawan ni Mayor Rogel “Botox” Fulleros, dumalo sa seremonya si Municipal Administrator Atty. Relina Arellano, kasama si OIC-MSWDO Janela Hainto.

Ang mga pagkilalang ito ay karangalan para sa buong Juban, lalo na sa mga tanggapan, kawani, barangay official at iba pang katuwang ng Lokal na Pamahalaan na may bahagi sa pagpapatupad ng mga programang kinilala ng DILG.

Taos-pusong pasasalamat at pagkilala rin ang ipinaaabot sa Juban Municipal Police Station (MPS), Public Safety Unit (PSU), Municipal Social Welfare and Development Office (MSWDO), Municipal Health Office (MHO), Municipal Disaster Risk Reduction and Management Office (MDRRMO), Office of the Municipal Administrator, gayundin sa lahat ng tanggapan, kawani, barangay officials, mga miyembro ng lokal na konseho at komite, at iba pang katuwang na may mahalagang kontribusyon sa mga programang kinilala ng DILG. Ang mga parangal na ito ay bunga ng sama-samang pagsisikap at pagtutulungan sa paghahatid ng mga serbisyo para sa kapakanan ng mga Jubangnon.

Mula sa pangangalaga sa mga bata at kababaihan hanggang sa pagpapanatili ng kapayapaan at kaayusan at pagpapatupad ng mga programa sa barangay, ang mga natanggap na parangal ay pagkilala sa mahahalagang larangan ng serbisyong pampubliko na patuloy na binibigyang-pansin sa ilalim ng pamumuno ni Mayor Fulleros.

Congratulations, LGU Juban!!

23/10/2026

LGU JUBAN BRINGS P20 RICE PROGRAM TO LAJONG, BIRIRAN, BACOLOD, AND CATANAGAN

Nagpatuloy ngayong Biyernes, Oktubre 23, 2026, ang barangay-based na pagbebenta ng bigas sa halagang P20 kada kilo sa bayan ng Juban, kung saan dinala ang programa sa mga Barangay Lajong, Biriran, Bacolod, at Catanagan.

Umabot sa 300 residente ang nakinabang sa programa ngayong araw, kabilang ang 80 benepisyaryo mula sa Lajong, 85 sa Biriran, 65 sa Catanagan, at 70 sa Bacolod.

Layunin ng programa na makatulong sa mga pamilyang Jubangnon sa kanilang pang-araw-araw na pangangailangan, habang nababawasan din ang kanilang gastos sa pamasahe dahil sa mas malapit na lugar ng pagbebentahan.

Ang aktibidad ay bahagi ng patuloy na pagpapatupad ng Benteng Bigas, Meron Na—Sa Juban sa ilalim ng P20 Rice Project ng Pambansang Pamahalaan, sa pangangasiwa ng Office of the Municipal Agriculturist (OMAg), na pinamumunuan ni OIC Municipal Agriculturist Ranie Desabayla.

Matatandaang noong Oktubre 6, inanunsyo ni Mayor Rogel “Botox” Fulleros na dadalhin ang mga susunod na pagbebenta ng murang bigas sa mga barangay upang hindi na kailangang bumiyahe pa ng mga benepisyaryo patungo sa Juban Gymnasium.

23/10/2026

Nakatakda sa Oktubre 26–31, 2026 ang huling schedule ng National ID Registration sa bayan ng Juban, sa pangunguna ng Philippine Statistics Authority (PSA) – Sorsogon Provincial Statistical Office.

Inaanyayahan ang mga residente ng Juban na hindi pa nakapagpaparehistro sa Philippine Identification System (PhilSys) na samantalahin ang mga nalalabing araw ng pagpaparehistro.

Narito ang huling iskedyul at mga lugar ng pagpaparehistro:

📍 October 26 (Monday) – LGU Juban

📍 October 27 (Tuesday) – Taboc Child Development Center

📍 October 28 (Wednesday) – Binanuahan Child Development Center

📍 October 29 (Thursday) – Guruyan

📍 October 30 (Friday) – Guruyan

📍 October 31 (Saturday) – Tughan, Juban

Para sa pagpaparehistro, pinapayuhang dalhin ang mga sumusunod na dokumento:

👉Para sa edad 0–4 taong gulang:
- Orihinal na Birth Certificate
- National ID ng magulang o guardian (card, paper form, o Digital ID)

👉Para sa edad 5 taong gulang pataas:
- Orihinal na Birth Certificate o anumang government-issued ID

Bibigyang prayoridad ang mga senior citizen at Persons with Disabilities (PWDs). Para sa mga bedridden na residente, maaaring makipag-ugnayan sa BASCA Officials o assigned PhilSys personnel para sa kinakailangang tulong.

Hinihikayat ang mga hindi pa rehistradong residente na magtungo sa pinakamalapit na itinakdang lugar upang makapagparehistro sa nalalabing iskedyul ng National ID Registration sa Juban.

23/10/2026

BRINGING GOVERNMENT SERVICES CLOSER TO THE PEOPLE: LGU JUBAN BRINGS P20 RICE PROGRAM DIRECTLY TO BARANGAYS

Mas inilalapit sa mga Jubangnon ang P20 kada kilong bigas sa pagpapatuloy ng barangay-based distribution ng "Benteng Bigas, Meron Na—Sa Juban."

Ito ay bilang pagtupad sa pangako ni Mayor Rogel “Botox” Fulleros na dalhin mismo sa mga barangay ang programa upang hindi na kailangang bumiyahe pa sa Juban Gymnasium, gumastos sa pamasahe, at pumila nang mahaba ang mga benepisyaryo.

Alinsunod ito sa prinsipyo ng kanyang pamumuno na ilapit ang serbisyo ng lokal na pamahalaan sa mga tao.

Pinangangasiwaan ng Office of the Municipal Agriculturist (OMAg) ang pag-iikot ng programa bilang bahagi ng P20 Rice Project ng Pambansang Pamahalaan.

Mga Jubangnon, tingnan ang kalakip na iskedyul upang malaman kung kailan darating ang Benteng Bigas sa inyong barangay.

👉👉Kahapon, Huwebes, Oktubre 22, 2026, sinimulan ang barangay-based distribution ng Benteng Bigas sa apat na barangay: Guruyan, Cogon, Tughan, at Buraburan..

23/10/2026

LGU JUBAN PROVIDES FREE ANTI-RABIES VACCINATION, SPAYING AND NEUTERING SERVICES FOR PET HEALTH AND PUBLIC SAFETY

Kasalukuyang isinasagawa ngayong Biyernes, Oktubre 23, 2026, ang Spaying and Neutering Activity at libreng Anti-Rabies Vaccination para sa mga alagang aso at pusa sa 2nd Floor ng Evacuation Center, malapit sa MDRRMO Building sa Barangay Tughan, Juban, Sorsogon.

Pinangungunahan ito ng Office of the Municipal Agriculturist (OMAg) sa ilalim ng pamamahala ni OIC-MAO Ranie Desabayla, upang matulungan ang mga pet owner sa pangangalaga sa kanilang mga alaga at makaiwas sa mga panganib na dulot ng rabies.

Nakalaan ang 10 slots para sa spaying at 30 slots para sa neutering, habang bukas naman sa mga walk-in ang libreng anti-rabies vaccination.

Sa pamamagitan ng aktibidad, nabibigyan ng pagkakataon ang mga Jubangnon na mapangalagaan ang kanilang mga alaga, lalo na ang mga walang madaling access sa ganitong serbisyo.

Bahagi ito ng mga serbisyong pangkalusugan at pangkaligtasan ng komunidad na isinusulong ng Lokal na Pamahalaan ng Juban sa ilalim ng administrasyon ni Mayor Rogel “Botox” Fulleros.

Patuloy na hinihikayat ang mga fur parent na maging responsable sa pag-aalaga at regular na pagpapabakuna ng kanilang mga aso at pusa upang maprotektahan hindi lamang ang kanilang mga alaga kundi pati ang kanilang pamilya at komunidad.

22/10/2026

PROMISE MADE, PROMISE KEPT: P20 RICE PROGRAM REACHES TUGHAN AND BURABURAN

Tinupad ni Mayor Botox-Rogel Fulleros ang kanyang pangako na ilapit sa mga barangay ang benteng bigas upang hindi na mahirapan ang mga Jubangnon sa pagkuha nito.

Ngayong hapon, Huwebes, Oktubre 22, 2026, sa mismong Barangay ng Tughan at Buraburan isinagawa ang pagbebenta ng bigas sa halagang P20 kada kilo, kung saan 91 residente mula sa Tughan at 90 naman mula sa Buraburan ang nakinabang sa programa.

Noong Oktubre 6, sa paglulunsad ng “Benteng Bigas, Meron Na—Sa Juban,” ipinangako ni Mayor Fulleros na gagawing barangay-based ang mga susunod na pagbebenta upang hindi na kailangang bumiyahe pa ng mga benepisyaryo patungo sa Juban Gymnasium.

Ngayon, nararamdaman na sa apat na barangay ang pagbabagong ito.

Para sa mga pamilyang kailangang pagkasyahin ang araw-araw na badyet, malaking bagay ang makabili ng murang bigas nang hindi na gumagastos pa sa pamasahe o lumalayo sa kanilang tahanan.

Pinangasiwaan ang aktibidad ng Office of the Municipal Agriculturist (OMAg), sa pamumuno ni OIC MAO Ranie Desabayla, bilang bahagi ng pagpapatupad ng P20 Rice Project ng Pambansang Pamahalaan.

Sa Tughan at Buraburan, 181 Jubangnon ang napaglingkuran ngayong hapon. Sa pagdadala ng programa sa mismong mga barangay, isinakatuparan ng lokal na pamahalaan ang layuning ilapit ang serbisyo ng gobyerno sa mga mamamayan; upang hindi na sila ang kailangang lumapit sa serbisyo, kundi ang serbisyo mismo ang makarating sa kanila.

Sa mga barangay na hindi pa napupuntahan, huwag po kayong mag-alala dahil makararating din sa inyong lugar ang P20 Rice Program. Lilibutin ng Office of the Municipal Agriculturist (OMAg) ang lahat ng barangay sa Juban, alinsunod sa nakatakda nitong schedule.

Juban Municipal Information Office

24/10/2026

24/10/2026

23/10/2026

23/10/2026

23/10/2026

23/10/2026

23/10/2026

23/10/2026

23/10/2026

22/10/2026

Address

Website

Alerts

Shortcuts

Share

Category

Listing takedown request