03/02/2024
Nasawi ang isang pulis habang sugatan naman ang isa pa niyang kasamahan matapos salpukin ng isang isang pick-up truck ang police checkpoint na kanilang minamandohan sa Silang, Cavite nitong nagdaang Linggo, Enero 28.
Ayon sa ulat, naganap ang insidente sa kahabaan ng Aguinaldo Highway sa bahagi ng Barangay Tubuan-Dos bandang alas-3:00 ng madaling araw.
"Well lighted naman ‘yung area… napag-alaman po natin [na] ito pong driver ay positive po sa alcohol breath [test]. Ibig sabihin, nakainom po ‘yung driver. Galing po sila ng Tagaytay… medyo siguro nagkainuman daw po doon sa isang kaibigan tapos pauwi na po sila around 2:40 a.m. nu’ng mangyari ang insidente po,” ani PCPT. Noel Obrador, spokesperson ng Silang Police Station.
Kinilala ang nasawing biktima na si Patrolman John Carl Austria Delyola, 27, na nakatalaga sa 401st A Maneuver Company, RMFB 4A habang kasalukuyan namang nagpapagaling sa ospital si Police Corporal Adriene Atienza.
Samantala, agad namang nadakip ng mga awtoridad ang driver ng pick-up truck na si Jemuelle Bernardo Belen, 22 taong gulang.
Mahaharap ang suspek sa kasong reckless imprudence resulting in homicide, multiple physical injuries, damage to property, at violation of Republic Act 10586.
"Sa mga driver po natin, mga motorista, unang-una po, huwag po tayong magmamaneho ng nakainom at marami pong pwedeng mapinsala o madamay. Dahil po sa isang kaapabayaan, malungkot isipin po na mayroon tayong tropa na binawian ng buhay,” paalala ni Obrador.
Source: GMA News
