15/07/2025
MAYOR RAISA TREÑAS MAGA-ASSIGN SANG MONITORING TEAM PARA SA CITYWIDE CLEAN-UP DRIVE SANG SYUDAD
Sa tuyo nga ma-sustain ang pagpatuman sang citywide clean-up drive kada Sabado sa syudad sang Iloilo, maga-assign si Mayor Raisa Treñas sang mga opisina nga magatutok sa pag-monitor sini.
Ginpahayag sang alkalde nga importante ma-sige sige ang pagpaninlo agud masigurado nga matapna ang mga masakit kaangay sang dengue, leptospirosis kag acute gastroenteritis.
Dapat, suno sa alkalde, nga masustinir sang tanan nga mga barangay ang hilikuton agud wala sang palagyuhan ang lamok kag mga ilaga kon tanan nagapanglimpyo.
Ginpakigbahin sang alkalde nga nakaagi man sya nga gin-dengue, gani nahibaluan ya gid kon ano ini ka budlay.
Samtang, isa sa nakit-an nga dapat hatagan sang atensyon sa mga barangay amo ang pag-manage sang ila basura kag kakulang sa edukasyon angot diri.
“Amo ni nga gapangabay ako sa inyo, buligan naton ini tanan,” siling sang alkalde.
Nahibaloan nga nakalab-ot sa 10 ka tonelada sang basura ang natipon sa ginpatigayon nga clean-up drive sang Sabado, bilang una nga adlaw sa pagpatuman sang Every Saturday Clean-Up Day campaign sa syudad.
Ginkasubo sang alkalde nga tungod mismo sang pang-ginawi sang iban kaangay sang paghaboy sang basura bisan diin lang, rason nga naga-clog ang mga drainage kag naga resulta sang mga pagbaha.
“Sa iban nga barangay, ang unod sa ila drainage mga plastic bottles. Sin-o naga-cause sang baha? Aton man tanan pang-gawi. Kon gusto ta buligan ang aton barangay, masugod gid kita sa aton ugsaran,” pahayag sang alkalde.
Samtang, ginsiling ni Treñas nga ginapangitaan na sang paagi sang syudad agud madugangan ang mga basurahan kag garbage collection areas sa mga barangay para mangin accessible sa tanan.
Ginpasalamatan sang alkalde ang tanan nga mga nagkalain-lain nga sektor nga nagsakdag agud mangin successful ang paglunsar sang Every Saturday Clean-up Day campaign sang syudad.
“We will encourage pa gid ang aton mga community leaders sa mga kabaranggayan naton, pabuligon naton ang aton mga pamatan-on, mga homeowners kag iban pa nga mga sektor,” dugang sang alkalde. (GSTayona/Iloilo City PIO)
