10/08/2026
PUNO GUID SANG KALIPAY KAG PAGPASALAMAT ang amon mga tagipusuon sa matahum nga selebrasyon nga aton gin-ambitan. Sa tagsa-tagsa ka kadlaw kag kahigayunan nga nagtipon kita, napamatud-an naton liwat ang kusog sang paghiusa kag pagbinuligay sang pumuluyo sang Balasan.
Sa tema nga “Balasan: Kadalag-an sang Nagligad, Kauswagan sang Bwas-Damlag,” ginadala naton ang mga leksyon, eksperyensya, kag mga kadalag-an sang nagligad bilang lig-on nga pundasyon sa aton pagpadayon. Ang aton kasaysayan amo ang aton kusog, kag ang aton mga pangandoy amo ang nagahatag sa aton sang direksyon padulong sa mas hayag kag mas mauswagon nga palaabuton.
Daku guid ang aton pagpasalamat sa Dios nga Makagagahum sa Iya padayon nga paggiya kag pagpakamaayo sa aton banwa. Salamat man sa tanan nga nagbulig, nag-ambit sang ila tini-on kag talento, nagbuylog, nagbisita, kag nagpakita sang ila gugma kag suporta sa sini nga selebrasyon.
Kamo ang naghatag sang kabuhi, kasadya, kag duag sa aton Lechon Festival. Tungod sa inyo, nangin mas matahum kag mas makahulugan ang sini nga selebrasyon.
Ang pagbinuligay nga aton ginpakita subong amo ang aton daku nga paglaum para sa bwas-damlag. Padayon kita sa pagdala sang aton mga leksyon halin sa nagligad, padayon sa pag-uswag, kag padayon sa paghiusa bilang isa ka mabaskog kag mainuswagon nga banwa.
May paghinumdom sa nagligad.
May pagpasalamat sa subong nga kadalag-an.
May paglaum para sa bwas-damlag.
Padayon, Balasan! Padayon sa kadalag-an kag kauswagan!
Video: CyLensxJao Films
