17/02/2026
Bangon Benedicto Bangon
Kahapon, wala kami ginpangita nga kalayo.
Pero ang kalayo amo ang nagpangita sa amon.
Sang mga ala-una sang hapon, sa tunga sang kasanag sang adlaw, ang balay nga ginpangabudlayan sang pila ka tuig naging abo.
Ang mga litrato, mga notebook sang kabataan,
ang kahon nga may sulod sang mga handum,
ginlamon sang siga.
Damo kita.
Sobra otsenta ka pamilya.
Sobra otsenta ka istorya
nga ginpahipos sang a*o.
Sa Sitio Dikers,
may mga mata nga naga-hibi
pero wala nagluya.
Sa Barangay Benedicto,
may mga kamot nga nagahingad
hindi para mag-uyat sang kalayo
kundi para magbuligay.
Salamat sa Ginoo,
wala sang kabuhi nga nakuha.
Balay ang nadula,
pero ang kabuhi, ara pa.
Ang paglaum, ara pa.
Ang pagbangon, ara pa.
Oo, masakit.
Indi ta pagpanublihon ang pulong.
Masakit gid.
Pero indi kita abo.
Indi kita kahoy nga nasunog kag napatay.
Kita ang binhi
nga mas nagabakod kon gin-agi-an sang bagyo.
Bangon, Dikers.
Bangon, Benedicto.
Ang kalayo wala nagtapna sang aton pagpakigbisog.
Wala niya nasunog ang aton pagtuo.
Wala niya naubos ang aton kusog.
Sa kada pawis nga magatulo sa pagpatindog liwat,
may paglaum nga nagatubo.
Sa kada balde sang tubig nga ginbato naton,
may pag-ampo nga ginbaton sang langit.
Ini nga trahedya
indi amo ang katapusan sang aton istorya.
Ini ang pahina
nga magapamatuod
nga bisan gin-abo kita,
kaya naton magbangon
nga mas masangkad,
mas mabakod,
mas isa.
Bangon Dikers.
Bangon Benedicto.
Ang aga maabot.
Kag kon mag-abot,
kita gyapon ang magatindog.
Brgy. Kgd. Emil Akol
Biktima sang February 16 Fire Tragedy
