02/08/2022
Ex-Officio Member and Liga ng mga Barangay President, Honorable Rolito Rivera Blando gave his speech last July 28, 2022 during the Inaugural Session of the 20th Sangguniang Panlungsod of General Santos City.
SA ATONG MAANYAG NA CITY MAYOR, HONORABLE LORELIE PACQUIAO,
SA ATONG HANDSOME FORMER CITY MAYOR, HONORABLE RONNEL CHUA RIVERA,
SA AKONG KUMARE, VICE MAYOR, HONORABLE ROSALITA T. NUÑEZ,
TO MY BEAUTIFUL WIFE, DOMINGA ABREA BLANDO,
SA AKONG MGA KAUBANAN SA KONSEHO, SA ATONG ACTING SP SECRETARY MA'AM ROSALINDA MONDIDO , MGA GIDAPIT NGA BISITA, UG SA TANANG ANIA KARON, MAAYONG HAPON KANATONG TANAN.
SA MILABAY’NG MGA BULAN, WALA NAHIMONG SAYON ANG PROSESO SA AKONG PAGHULIP ISIP PRESIDENTE SA MGA LIGA NG MG BARANGAY. NAA’Y MGA LAKANG ANG GIPANGHIMO ARON KITA MABABAGAN SA PAGLINGKOD SA PWESTO. APAN WALA KITA NATINAG NIINI.
ATONG GIBARUGAN ANG ATONG KATUNGOD SUMALA SA KUNG UNSA ANG GISAYSAY SA BALAOD. KINING POSISYON, WALA NAKO GIPANGAYO. GIHATAG KINI SA GINOO UG ANGAY LANG NGA AKONG DAWATON SA NGALAN SA PAGPANERBISYO.
ISIP PUNONG BARANGAY SA LAGAO SULOD SA ONSE KA TUIG, DILI MALIMOD ANG MGA PROGRESO UG KALAMBUAN NGA ATONG NAHATAG SA ATONG PINALANGGANG BARANGAY.
MAKITA KINI SA MGA AWARDS NGA NAKUHA SA BARANGAY LAGAO SA ILALUM SA AKONG ADMINISTRASYON. APAN KINING TANAN WALA NAHITABO SULOD SA USA KA GABII.
ANG UNSA MANG KALAMBUAN NGA ANAA SA BARANGAY LAGAO KAY BUNGA SA PILA KA TUIG NGA PANARBAHO UG PAKIG-ALAYON SA LGU, SA MGA NAGKALAING AHENSYA SA GOBYERNO, SA MGA PRIBADONG SEKTOR, UG HILABI SA TANAN, SA MGA KATAWHAN SA BARANGAY. UG KINI NGA KALAMBUAN MAO SAB ANG AKONG PANGANDOY SA UBAN PANG MGA BARANGAY HILABI NA NGADTO SA MGA BARANGAY NGA KULANG SA PAGTAGAD.
NASAYOD KO NGA KINI NGA PAGLANTAW, NANGINAHANGLAN UG TAAS NGA PANAHON ARON MAPATIGAYON UG MATINUOD. APAN AKONG PANINGKAMUTAN NGA SULOD SA NUBO NGA PANAHONG NAHIBILIN SA AKONG TERMINO ISIP PRESIDENTE SA LIGA NG MGA BARANGAY, NGA MAHATAGAN UG PAGTAGAD ANG MGA BARANGAY NGA NANGINAHANGLAN NIINI.
DILI MAN NAKO MAPATUMAN ANG AKONG GINAPANGANDOY NGA KALAMBUAN, MAPABATI MAN LANG NATO KANILA NA IMPORTANTE SILA NGA KOMPOSISYON NING ATONG SIYUDAD. NGA IHATAG KANILA ANG PAGTAGAD UG ATENSYON NGA DILI NA KINAHANGLAN MOHANGYO. NGA ANG MGA OPISYAL SA SIYUDAD MAY PAKABANA KANILA UG DILI LANG SILA TAGDON INIG PANAHON SA ELEKSYON.
NASAYOD KO NA DAKO ANG KALAHIAN SA PAGPANERBISYO ISIP PUNONG BARANGAY UG ISIP USA KA KONSEHAL SA SIYUDAD. APAN ANDAM KO MO-AGI UG TRANSISYON UG MOTUON BISAN PA MAN SA LIMITADONG PANAHON NGA GIHATAG KANAKO. MOTUON GIKAN SA AKONG MGA KAUBANG BETERANONG MAGBABALAUD. KAY NAGATUO AKO NGA PAGTUON WALA NAGABILANG UG PANGIDARON.
AKO LANG PANGHINAOT NGA KINING KONSEHO ANAY USA RA KA TUMONG – ANG PAGSERBISYO UG PAG-ALAGAD DILI LAMANG SA PIPILA KUNG DILI SA TANANG KATAWHAN NING SIYUDAD.
DAGHANG SALAMAT UG ANG GINOO MAGPANALANGIN KA NATONG TANAN.
