29/08/2026
DAVAO DEL NORTE MARITIME POLICE STATION, NAGTAGUMPAY SA PAGSUGPO NG ILEGAL NA SIGARILYO SA ASUNCION, DAVAO DEL NORTE
Noong Agosto 27, 2026, ang mga tauhan ng Davao del Norte Maritime Police Station (DDN MARPSTA) ay nagsagawa ng isang operasyon laban sa mga ilegal na produktong tabako sa Asuncion, Davao del Norte. Ang nasabing operasyon ay nagresulta sa pagkakaaresto kina Alyas “Arl,” 19 taong gulang, binata, at residente ng Matalam, Cotabato, at Alyas “Von,” 28 taong gulang, binata, at residente ng Mlang, Cotabato.
Ang dalawang indibidwal ay naaktuhang nagbababa o nag-u-unload ng mga kahon ng sigarilyo sa nasabing lugar nang isagawa ng mga operatiba ang operasyon. Bagama’t wala silang aktuwal na ginagawang pagbebenta ng sigarilyo nang sila ay maabutan, ang mga kahon ng sigarilyo na kanilang ibinababa ay agad na sinuri at isinailalim sa kaukulang dokumentasyon at inventory.
Ang nasabing operasyon ay isinagawa kaugnay ng pagpapatupad ng Republic Act No. 10863, o Customs Modernization and Tariff Act (CMTA), na nag-aatas ng pagkakaroon ng mga graphic health warnings sa mga produktong tabako upang maipabatid sa publiko ang mga panganib sa kalusugan na dulot ng paggamit ng tabako.
Sa isinagawang operasyon, nakumpiska ang siyamnapung (90) kahon ng BOSQU RED na sigarilyo, na may tinatayang halagang ₱3,825,970.00, at tatlumpung (30) kahon ng King Pen na sigarilyo, na may tinatayang halagang ₱1,275,000.00. Sa kabuuan, umabot sa Anim na libong (6,000) ream ng sigarilyo, na may kabuuang tinatayang halagang ₱5,100,000.00, ang nakumpiska.
Ang operasyon ay bahagi ng patuloy na pagsisikap ng DDN MARPSTA na ipatupad ang mga umiiral na batas at regulasyon laban sa mga produktong tabako na hindi sumusunod sa itinakdang requirements. Layunin din nito na mapigilan ang pagpasok, pag-iimbak, pagbiyahe, at iba pang ilegal na aktibidad na may kaugnayan sa mga produktong tabako, alinsunod sa naaangkop na batas.
Matapos ang wastong dokumentasyon, ang dalawang naarestong indibidwal ay inilagay sa kustodiya ng Asuncion Municipal Police Station (MPS) para sa kaukulang disposisyon at pagsasagawa ng mga kinakailangang legal na proseso. Samantala, ang mga nakumpiskang sigarilyo ay maayos na na-inventory at itinurn-over sa Bureau of Customs (BOC) para sa kaukulang pagsusuri at disposisyon.
Patuloy na paiigtingin ng Davao del Norte Maritime Police Station ang mga operasyon laban sa ilegal na kalakalan at iba pang mga paglabag sa batas upang mapanatili ang seguridad, kaayusan, at kapakanan ng mga mamamayan sa nasasakupan nito. Pinagtitibay rin nito ang adhikain ng organisasyon sa ilalim ng adbokasiyang “Bagong PNP para sa Bagong Pilipinas: Serbisyong Mabilis, Tapat, at Nararamdaman”
