19/07/2022
GIKUNDENAR SA KPL ERMITA ANG ILEGAL NGA PAGDEMOLISH SA FREEDOM PARK UG AMBULANT VENDORS
Tulo na ka adlaw ang miagi sukad sa pagsugod sa wala’y luoy ug ilegal nga pagdemolish sa mga lugar sa Carbon Market, primaryo ang Freedom Park ug Ambulant Vendors. Wala’y court order ang napakita sa demolition team ug pasabot, ilegal ang nabuhat nga demolition sukad tulo ka adlaw.
Dili tinuod ang kalambuan nga gisaad sa Megawide. Tungod sa pagtukod og mga pangmall nga mga gusali ug pagempleyo og uban pang mga panginahanglan sa Carbon, siguradong musaka ang presyo sa tanang mga palaliton. Pasabot, ang yanong Sugbuanon nga ganahan mupalit og barato sa Carbon, mahiagoman sa pinakamataas nga presyo sa palaliton.
Imbes nga dunggon ang tingog sa masang magtitinda ug residente sa Carbon nga misupak sa maong demolisyon, giigo og grabeng pwersa sa estado. Pananglitan, sa ikaduhang adlaw, mibangga ang Civil Disturbance Unit sa mga nagprotesta og malinawon gamit ang mga riot shield ug uban pa.
Pangandoy na sa mga dagkong kapitalista ug burokrata kapitalista ang pagpribatisa sa Carbon Market aron tukuron og usa ka world class market. Sa maong pamaagi, gipeligro ang kinabuhi sa tanang masang Sugbuanon sa pagsaka sa presyo sa mga palaliton sa Carbon tungod sa pagusab sa taripa.
Ang maong pribatisasyon pud kay aduna’y plano sa pagdemolish sa Sitio Bato ug Kastilaan isip unang mga komunidad nga maigo sa Mega Cebu nga plano sa lokal nga gobyerno sa Sugbo. Dili luwas ang tanang Ermita sa maong mga proyekto sa demolisyon.
Nasubo ug nahigawad ang mga tao sa Ermita sa maong ginatawag nga “development aggression” - pagguba sa panginabuhian sa katawhan alang sa kalambuan daw. Apan, para kang kinsa ang kalambuan nga mudemolish sa mga stalls sa Carbon ug mubangga sa ilang mga tigpasiugda og pulis ug CDU? Para kang kinsa ang kalambuan sa pagtrespass sa mga pulis sa mga kabalayan sa katawhan sa Ermita nga walay search warrant?
Ang kining kalambuan, dili para kanato pero para sa mga dagkong kapitalista ug mga naa sa gobyerno - para sa pagpadato sa dato na daan!
Ginasuporta sa Kabataan Partylist - Ermita ang mga Carbon Market vendors nga sa kasamtangan kay nagpanalipod sa ilang panginabuhian batok sa development aggression ug sa pasismo!
