07/04/2026
Tingnan: Pinulong ngayong hapon ng lokal na pamahalaan, kasama ang Sangguniang Bayan sa pangunguna ni Vice Mayor Dennis Escudero, ang lahat ng SK officials sa pangunguna ni Hon. Mark Elmo Buenaobra, sk federation president upang ipabatid ang mahalagang desisyon hinggil sa pagpapaliban ng Grand Opening ng LGU Cup 2026 na nakatakda sana sa Abril 19, 2026.
Ang desisyong ito ay isinagawa alinsunod sa rekomendasyon ng Pamahalaang Panlalawigan na pansamantalang ipagpaliban ang mga lokal na aktibidad, kabilang ang mga summer sports league, trainings, seminars, at iba pang pagtitipon. Kaugnay din ito sa ipinalabas na Executive Order ng Pangulo na naglalayong bigyang-prayoridad ang maayos na paglalaan ng pondo upang matugunan ang kasalukuyang hamon sa ating bansa, partikular ang patuloy na pagtaas ng presyo ng mga pangunahing bilihin at produktong petrolyo.
Bilang pakikiisa sa panawagan ng pambansa at panlalawigang pamahalaan, minabuti ng lokal na pamahalaan na ipagpaliban muna ang Summer Basketball at Volleyball League o LGU Cup. Layunin nitong higit na maituon ang ating mga resources sa mga programang makatutulong sa ating mga kababayang higit na nangangailangan sa panahong ito.
Batid ng lokal na pamahalaan ang kahalagahan ng naturang liga, lalo na sa ating mga kabataan na aktibong nakikilahok at umaasa sa mga ganitong programa para sa kanilang pag-unlad, kalusugan, at pagkakaisa. Gayunpaman, hinihiling namin ang inyong pang-unawa at patuloy na pakikiisa sa desisyong ito, na isinagawa para sa kapakanan ng nakararami.
Ipinababatid ng pamahalaang lokal na kayo'y makakaasa na sa sandaling bumuti at maging mas matatag ang kalagayan ng bansa, agad na ipagpapatuloy ang mga programang pangkabataan at pampalakasan na nagbibigay saya, inspirasyon, at pagkakataon sa ating mga kabataan.
Sa panahong ito, higit dapat na pairalin ang diwa ng pagkakaisa, disiplina, at malasakit sa isaโt isa. Sama-samang harapin ang hamon ng kasalukuyang sitwasyon para sa kapakanan ng bawat mamamayan.
