26/08/2026
Programang SLT sa NCCA alang sa Pagpreserba sa 'Asin Tibuok'.
Giabi-abi ni Governor Erico Aris Aumentado sa Kapitolyo Provincial ang mga opisyales sa National Commission for Culture and the Arts (NCCA) alang sa pagpatuman sa ilang programang School of Living Traditions (SLT) nga gipahigayon sa lungsod sa Alburquerque aron mapreserba ang tradisyonal nga panimpalad ug paghimo sa "Asin Tibuok."
Kini nagtumong nga mapadayon, mapreserba, ug mapasa ngadto sa sunod nga henerasyon ang mga kultural nga kahibalo ug lumad nga tradisyon aron dili kini mawala o makalimtan. Gipahibalo sa NCCA nga ilang tabangan ang Local Government Unit (LGU) sa Alburquerque sa paghimo og usa ka taas ug sistematikong development plan alang sa SLT, lakip na ang paghatag og pundo alang sa maong katuyoan.
"Atong gipasalig ang atong padayon nga suporta sa NCCA ug LGU Alburquerque aron mapreserba ug mapadayon ang Asin Tibuok isip importante nga bahin sa atong kultura ug kabilin," pamahayag pa ni Gov. Aumentado sa iyang opisyal nga pahayag human sa maong panagtagbo.
Mitambong usab sa panagtapok ang mga representante gikan sa National Museum of the Philippines–Bohol, Bohol Center for Culture and Arts Development, Bohol Arts and Cultural Heritage Council, ug ang mga mismong Mang-asinay sa lungsod sa Alburquerque aron mopadangat sa ilang suporta sa maong historikanhong proyekto.
| By Jomer S. Pequit
