14/08/2026
Dakilain ang buhay ni Ka Chico! Martir ng Caloocan, tunay na anak ng bayan!
Matagumpay na inilunsad kahapon, Ika-13 ng Agosto, 2026, ang parangal para kay Enrique "Ka Chico" Dayandante. Ito ay ginanap sa may tapat mismo ng kanilang dating tahanan at unang balangay ng Anakbayan na kaniyang itinatag, Palon St., Lungsod ng Caloocan. Dinaluhan ito ng kaniyang mga pamilya at kaibigan, kasama ang mga progresibong grupo at beteranong aktibista.
Iginunita rito ang mga ala-ala ni Ka Chico bilang isang mabuting anak at kasama. Mula sa kabataan niyang tema'y mga awitin na likha ng Eraserheads at pagpasok sa Caloocan High School, tungo sa pagiging kabataang aktibista na isa sa mga unang nagtayo ng mga balangay ng Anakbayan sa Palon St., UE Caloocan, at iba pang mga bahagi ng Caloocan, Malabon, Navotas, at Valenzuela (CAMANAVA).
Kinilala si Ka Chico bilang isa sa mga tagapagtatag ng Anakbayan at isang kabataang organisador sa CAMANAVA. Isa rin siya sa mga pangunahing nag-ambag sa pag-oorganisa ng mga laban ng mamamayan sa kampanyang no to oil price hike, demolisyon, tuition fee increase, komersyalisadong edukasyon, at iba pang lokal na pakikibaka.
Nagtanghal ng mga awitin, tula, talakayan, at talumpati ang mga dumalo rito. Bilang pagkilala sa pagiging artista ni Ka Chico, itinugtog at inawit ang mga kanta noong kaniyang kabataan, at pati na rin ang paglulunsad ng mga kulturang pagtatanghal na mga progresibong likha. Nagkaroon ng mga talakayan hinggil sa tuloy-tuloy na laban ng mga mamamayan ng CAMANAVA, na isa si Ka Chico ang nagbitbit nito; napagusapan ang tuloy tuloy rin na pagtaas ng presyo ng langis, patuloy na pagtaas ng matrikula sa mga pamantasan, mga demolisyon, at pati na rin ang kampanya laban sa Luzon Economic Corridor at Pax Silica ng imperyalistang Estados Unidos. Ang mga talumpating umalingawngaw ay tumagos sa puso at damdamin ng mga masa at kasama, kung saan iisa lamang ang naging panawagan– tuloy ang laban!
Luma't bagong mga miyembro ng Anakbayan ang dumalo rito, kasama ang Bagong Alyansang Makabayan – Caloocan (BYC), at iba pang mga Pambansa Demokratikong Organisasyon. Anila, ang buhay ni Ka Chico ay isang buhay na kasingbigat ng Bundok Maruyen kung saan siya'y iminartir. Ito ay sapagkat ang buhay niya ay nagsilbi para sa masa at sa pakikibaka laban sa imperyalismo, pyudalismo, at burukrata kapitalismo. Ayon din sa mga kapamilya ni Ka Chico, kahit anupamang paninira ng estado sa kaniya, isang tunay na makulit, mapagmahal, at mapagbigay na anak si Eric simula pa noong kabataan niya. Kung kaya't hindi na nakakapagtaka ang pag-alay ni Eric ng buhay niya para sa sambayanan.
Sa pagpatak ng kaniyang dugo at luha ng masa sa pagluluksa, tunay ito'y daraan sa daloy ng panahon. Maging ito man sa lupa, ilog, pisngi, o kaluluwa, ito'y pataba sa mga pumupunlang pag-asa. Hinding hindi makakalimutan ang buhay at pakikibaka ni Eric sa puso ng mga mamamayan, mula Caloocan, CAMANAVA, Abra, at kahit hanggang sa bawat dulo ng ating bayan.
Iba man ang materyal na kundisyon na kinakaharap natin sa kasulukuyang panahon, maging sa mga darating na mga bukas, ang buhay at ala-ala ni Ka Chico ay magsisilbing imortal dahil ito ay nakaugat sa mamamayan.
Enrique Dayandante, isang tunay at mabuting anak ng bayan– martir at bayani ng sambayanan!
