23/05/2022
PINAKAMATAAS NA PAGPUPUGAY KAY ROMEO 'PAREKOY' SARABIA
Mainit na pakikiramay ang ipinapaabot ng Migrante Philippines sa pamilya, kaibigan at kasamang naiwan ni Romeo "Parekoy" Sarabia.
Si Romeo Sarabia o mas kilala bilang Parekoy ng nga kasama at kaibigan ay isang magiting at masigasig na lider-maralita. Mula sa pagiging manininda sa palengke ng Bagong Silang Caloocan noong 2017, namulat siya sa kahalagahan ng kolektibong pagkilos upang ipagtanggol ang kanilang karapatan sa kabuhayan. Matagumpay niyang pinamunuan ang laban ng mga manininda sa mga tangka ng lokal na gobyerno ng Caloocan na palayasin ang mga kariton vendors sa palengke. Napagtibay ng kanilang organisasyong Samahan ng mga Manininda sa Bagong Silang (SAMABASI), kung saan siya nahalal bilang tagapagtatag na pangulo, ang karapatang maghanapbuhay ng hindi bababa sa 50 manininda hanggang sa ngayon.
Pinaglingkuran rin niya ang iba pang inaaping mamamayan. Organisador siya ng mga OFW at pamilya sa ilalim ng Migrante Caloocan. Hindi matatawaran ang ambag ni Parekoy sa pagmumulat, pag-oorganisa at pagpapakilos sa mga manininda, migrante at masang api. Susi ang kaniyang papel sa nagpapatuloy na laban ng mamamayan ng Caloocan para sa ayuda sa panahon ng pandemya.
Naging bahagi rin siya ng mga community pantry, bungkalan, at iba pang mga aktibidad na nagbubuo ng malawak na pagkakaisa ng mamamayan. Isa rin siya sa mga masigasig na kampanyador ng Anakpawis Party-list, ni Neri Colmenares, ni Elmer "Ka B**g" Labog, Kiko Pangilinan at Leni Robredo noong eleksyon. Higit sa lahat, pinatunayan ng pamumuno ni Parekoy ang malaking papel ng mga mala-manggagawa sa pagkakaisa ng mga maralitang mamamayan.
Ipagpatuloy natin ang makatarungang laban ng mga manininda, migrante at mamamayan para sa pambansang demokrasya at ganap na pagkakapantay-pantay sa alaala ni Parekoy.
