01/08/2026
๐ ๐๐ข ๐๐ฎ๐ ๐ก๐ถ๐ฒ๐๐ฒ๐ ๐ก๐ฎ๐ด๐ฝ๐ฎ๐๐ถ๐ฑ๐๐ป๐ด๐ผ๐ด ๐ธ๐ฎ๐ป๐ด ๐ฆ๐ถ๐ฟ ๐ฃ๐ฒ๐ฑ๐ฟ๐ผ ๐ฉ. ๐๐ผ๐ป๐ฐ๐ผ๐ป ๐๐ฎ ๐๐๐ฎ๐ป๐ด ๐ฏ๐ด ๐ธ๐ฎ ๐ง๐๐ถ๐ด ๐ป๐ด๐ฎ ๐ ๐ฎ๐๐ถ๐ป๐๐ฑ-๐ฎ๐ป๐ผ๐ป๐ด ๐ฆ๐ฒ๐ฟ๐ฏ๐ถ๐๐๐ผ
Usa ka adlaw nga puno sa kalipay, pagpasalamat, ug emosyon ang nasinati sa Municipal Agriculture Office (MAO) sa Las Nieves atol sa Retirement Program alang kang Mr. Pedro V. Concon, nga gipahigayon sa Municipal Demonstration Farm, Barangay San Isidro, Las Nieves, Agusan del Norte.
Ang maong selebrasyon gitambongan ni Municipal Mayor Hon. Karen S. Rosales, sa tibuok MAO Family nga gipangulohan ni Municipal Agriculturist Leonito C. Pasquito, uban sa mga kauban sa trabaho, higala, ug mga kauban ni Sir Pedro sulod sa daghang katuigan sa serbisyo publiko.
Ang maong kalihokan dili lamang pagsaulog sa iyang 65th Birthday, kondili usa usab ka espesyal nga okasyon aron pasidunggan ang iyang 38 ka tuig nga matinud-anong serbisyo isip Agricultural Technologist ug opisyal nga pagsaulog sa iyang pagretiro gikan sa Local Government Unit sa Las Nieves.
Gisugdan ang programa pinaagi sa mensahe ni Municipal Agriculturist Leonito C. Pasquito, nga nagpahayag sa iyang dakong pagpasalamat sa dedikasyon, pagkamasaligan, ug dili matupngan nga kontribusyon ni Sir Pedro sa pagpalambo sa agrikultura sa lungsod. Gisundan kini sa makahuluganon nga mensahe ni Mayor Hon. Karen S. Rosales, nga naghatag og taas nga pagpasidungog sa mga katuigan nga serbisyo ni Sir Pedro ug sa iyang bililhong papel sa pag-alagad sa mga mag-uuma sa Las Nieves.
Sunod-sunod usab nga nagpahayag og mensahe ang mga kauban sa MAO Family, diin ilang gipaambit ang mga unang higayon sa ilang pag-uban ni Sir Pedro, ang daghang kataw-anan, mga hagit nga ilang nalampasan, ug ang mga dili malimtan nga panumduman nga ilang nabaonan isip usa ka pamilya sa trabaho. Ang matag estorya napuno sa katawa, throwback, ug emosyon, nga usahay nahimong hinungdan sa mga luha tungod sa kasubo sa pagpanamilit sa usa ka haligi sa opisina.
Usa sa labing gipasidunggang nahisgutan mao ang legacy ni Sir Pedro sa Municipal Demonstration Farm, nga iyang gitabangan sa pagpalambo ug paghulma isip sentro sa pagkat-on ug demonstrasyon sa mga modernong teknolohiya sa agrikultura. Pinaagi sa iyang dedikasyon ug kahago, daghang mga mag-uuma ug kabatan-onan ang nakakat-on ug nadasig sa husto ug episyenteng pamaagi sa pagpanguma. Ang iyang walay kakapoy nga pagserbisyo nahimong inspirasyon sa daghang henerasyon sa mga Agricultural Technologists ug empleyado sa LGU.
Sa dili pa matapos ang programa, gihatagan si Mr. Pedro V. Concon og Plaque of Retirement Recognition Award ug Certificate of Recognition isip pag-ila sa iyang 38 ka tuig nga matinud-anong serbisyo ug dakong kontribusyon sa pagpalambo sa sektor sa agrikultura sa Las Nieves. Ang mga pasidungog gipangunahan ni Mayor Hon. Karen S. Rosales ug Municipal Agriculturist Leonito C. Pasquito, isip simbolo sa dakong pagpasalamat sa tibuok lokal nga panggamhanan ug sa MAO Family.
Human sa pormal nga programa, nagpadayon ang selebrasyon pinaagi sa lunch ug fellowship, diin nagkauban ang MAO Family sa usa ka yano apan makahuluganon nga panagtapok. Kini nahimong higayon aron magpadayon ang ilang panaghigalaay, maghinumdom sa daghang maayong panahon nga ilang gikauban si Sir Pedro, ug maghatag sa ilang labing maayong panghinaut alang sa bag-ong yugto sa iyang kinabuhi.
Ang pagretiro ni Mr. Pedro V. Concon dili katapusan sa iyang panaw, kondili sinugdanan sa usa ka bag-ong kapitulo nga puno sa pahulay, kalipay, ug panahon uban sa iyang pamilya. Ang iyang dedikasyon, integridad, ug gugma sa pag-alagad magpabiling ehemplo sa tanang empleyado sa Municipal Agriculture Office ug sa tibuok LGU Las Nieves. Ang iyang ngalan ug mga nahimo magpabiling bahin sa kasaysayan sa agrikultura sa lungsod, ug ang iyang mga legasiya magpadayon sa pagdasig sa umaabot nga mga henerasyon sa mga alagad sa publiko.
Malipayong ika-65 nga Adlawng Natawhan ug malipayon nga pagretiro, Sir Pedro! Daghang salamat sa 38 ka tuig nga matinud-anong serbisyo. Ang MAO Family ug ang tibuok Las Nieves mapasalamaton sa imong bililhong kontribusyon. Ginoo ang magpadayon sa pagpanalangin kanimo ug sa imong pamilya sa bag-ong yugto sa imong kinabuhi.
