ATI Caraga Region XIII

04/09/2026

Pormal nga gilunsad sa Agricultural Training Institute–Regional Training Center (ATI-RTC) XIII ang Farmers Information and Technology Services (FITS) Center sa Cortes, Surigao del Sur niadtong Septyembre 3, 2026. Gipahigayon usab ang ceremonial signing sa Memorandum of Agreement (MOA) aron mapalig-on ang panagtambayayong sa implementasyon sa Techno Gabay Program (TGP) ug paghatag og ICT support ngadto FITS Center. Sumala kang Municipal Agriculturist Gil Q. Escalante, ang FITS Center nagpakita sa ilang commitment sa paghatag og kahibalo ug teknolohiya ngadto sa mga mag-uuma pinaagi sa husto ug mapuslanong impormasyon.

Gipatin-aw ni TGP Focal Person Mary Grace B. Salve ang mga benepisyo ug katuyoan sa TGP alang sa mga mag-uuma, mangingisda, ug uban pang stakeholders. Nagpahayag usab og suporta sa programa ang mga representante sa Lokal nga Panggamhanan sa Cortes, NEMSU, ug Office of the Provincial Agriculturist. Mitambong usab ang mga lider sa organisasyon sa mga mag-uuma sa lungsod.

04/09/2026

Gipakusog sa Agricultural Training Institute–Regional Training Center 13 (ATI-RTC 13) ang kahibalo ug kapasidad sa mga Agricultural Extension Workers (AEWs) ug mga mag uuma pinaagi sa Banana SMART: Training of Trainers (TOT) on Philippine Good Agricultural Practices (PhilGAP) for Banana Production, nga gipahigayon niadtong Agosto 24–28, 2026 sa Balangay Hall, ATI-RTC 13, Los Angeles, Butuan City.

Ang pagbansay nagtumong sa pagpalig-on sa kahibalo ug pagsabot sa mga partisipante kabahin sa PhilGAP aron sila usab makatudlo sa mga mag uuma ug saging sa ilang lugar. Nahimong mga Resource Person ang mga personahe gikan sa Department of Agriculture (DA)- Caraga Regulatory Division. Nagpa- ambit usab sa iyahang kahanas si Ms. Glenet O. Montiman, Ph.D nga maoy nanguna sa diskusyon kabahin sa Cultural Management. Kabahin sa maong kalihokan ang pagbisita sa Guias Integrated Farm, nga gipanag-iya ni Ms. Sheila Maglines diin nasinati mismo sa mga partisipante ang pipila ka praktikal nga pamaagi sa pag atiman ug saging.

Gibisita usab ang Cantero’s Farm, usa ka PhilGAP-certified banana farm, diin ilang nakita mismo ang aktuwal nga mga proseso ug pamaagi nga gisunod sa usa ka PhilGAP-certified farm. Apil usab sa nahisgutan ang Fertilizer and Pesticide Management nga gipasabot ni Mr. Noel V. Negre gikan sa Fertilizer and Pesticide Authority (FPA). Kini nga inisyatibo nagpakusog sa commitment sa ATI Caraga alang sa luwas ug kalidad nga pagkaon sa mga Caraganons.

03/09/2026

SEPTEMBER 03, 2026 | SCHOOL-ON-THE-AIR (SOA) PROGRAM ON COCONUT PRODUCTION

02/09/2026

Nagpahigayon karung adlawa ang Agricultural Training Institute – Regional Training Center (ATI-RTC) XIII, uban sa pagtinabangay sa Provincial Agriculture Office sa Agusan del Norte, sa Rice Techno Forum on Integrated Nutrient Management, sa Abante E.J. Montilla Ambacon Rice Cluster Farmers Association, Las Nieves, Agusan del Norte. Sa pagsugod sa kalihokan, naghatag og welcome message si Mr. Paul Rey Gonzales, Municipal Rice Coordinator sa Municipal Agriculture Office sa Las Nieves, samtang si Ms. Charmine L. Arconada, Agriculturist I sa ATI Caraga, naghatag og activity overview mahitungod sa mga tumong ug mga kalihokan sa forum.

Naghatag usab og mensahe si Engr. Maribeth Napuli, Provincial Rice Coordinator, diin iyang giawhag ang mga partisipante nga i-apply sa ilang mga humayan ang mga kahibalo ug teknolohiya nga ilang makat-unan. Samtang, si Mr. Ernie Malazarte, Agriculturist II sa ATI Caraga, mipaambit og kahibalo bahin sa Integrated Nutrient Management: Concepts and Principles, lakip ang hustong pag-ila sa nutrient requirements, pag-interpret sa soil test results, pag-ila sa nutrient deficiency symptoms, ug pagkalkula sa angay nga fertilizer rates.

Pinaagi sa forum, gidasig ang mga mag-uuma sa hustong, episyente, ug balanseng paggamit sa abono ug uban pang farm resources aron mamenosan ang gasto sa produksiyon, mapauswag ang kahimsog sa yuta, mapalig-on ang ani, ug makatampo sa mas malungtarong produksyon sa humay.

02/09/2026

Happy Birthday, RED Oñate!

From the Agricultural Training Institute - Regional Training Center Caraga

HAPPY BIRTHDAY, RED OÑATE! 🎉 Warmest birthday greetings to our Regional Executive Director, Engr. Ricardo M. Oñate Jr. May you continue to be blessed with good health, wisdom, and strength as you lead with dedication and purpose in serving our agriculture and fisheries sector. Wishing you a meaningful birthday and many more fruitful years ahead!

01/09/2026

Baynte-syete (27) ka partisipante, nga gilangkuban sa mga livestock farmers ug Agricultural Extension Workers (AEWs), ang malampusong nakakompleto sa Training on FeedNovation: Where Innovation Meets Sustainability and Practicality for Animal Nutrition, nga gipahigayon niadtong Agosto 26–28, 2026 sa Olivier Ecovillage, Ampayon, Butuan City.

Ang tulo ka adlaw nga pagbansay nagtumong sa pagpalambo sa kahibalo ug praktikal nga kahanas sa mga partisipante sa mga bag-ong pamaagi nga mas episyente, malungtaron, ug dili mahal sa animal nutrition ug feed production.

Naglakip ang pagbansay sa nagkalain-laing mga hilisgutan nga gipresentar nila Algen Joy M. Aparece, Shernelyn S. Palma sa Department of Agriculture–Team BAHUG, ug Oliver Q. Terante.
Lakip sa mga hilisgutan ang mga bag-ong impormasyon bahin sa feed production sa Pilipinas, husto nga feed formulation ug animal nutrition, feed safety ug processing, paggamit sa alternatibong feed resources, feeding management, forage establishment ug management, ug ang gasto ug kaayohan sa feed production.
Usa sa labing hinungdanong bahin sa pagbansay mao ang hands-on activity sa pag-andam og organic feeds. Dinhi, ang mga partisipante mismo nag-formulate ug naghimo sa ilang kaugalingong feeds gamit ang mga materyales nga anaa ug dali makuha sa lokal nga lugar.

Pinaagi sa FeedNovation, padayon nga gipalig-on sa ATI-RTC 13 ang kapasidad sa mga livestock farmers ug agricultural extension workers pinaagi sa pagpaila sa mga praktikal ug bag-ong pamaagi sa animal production. Ang paggamit sa lokal nga mga feed resources dili lamang makatabang sa pagpaubos sa gasto sa pagpakaon, apan makatampo usab sa mas episyente ug malungtarong pagdumala sa livestock farms.

01/09/2026

Pamalandungan Karong Semana: Filipino Value Week 35 – “Leadership”

Karong buntaga, atol sa Flag Raising Ceremony nga gipahigayon sa Agricultural Training Institute – Regional Training Center (ATI- RTC) XIII, nga gipangunahan sa Partnerships and Accreditation Section ang paghatag og pagpamalandong alang sa mga empleyado sa ahensya.

Si Aljohn Solis, Technical Support Staff sa buhatan maoy nanguna sa pagpaambit sa maong mensahe. Sa Filipino Values Week 35 karong semanaha ang tema nga “Leadership,” nga nagpahinumdom sa kahinungdanon sa maayong pagpangulo isip usa ka responsibilidad ug oportunidad sa pag-alagad sa uban. Pinaagi sa tema nga “Leadership,” giawhag ang tanan nga pamalandungon kung unsaon pagpakita sa pagpangulo sa ilang adlaw-adlaw nga kinabuhi. Sa konteksto sa ahensya, ang leadership usa ka importanteng pundasyon sa epektibo ug maayong serbisyo. Ang pagpangulo dili lamang responsibilidad sa mga anaa sa posisyon, kundili usa usab ka bili nga angay ipakita sa matag empleyado pinaagi sa pagpakita og maayong ehemplo, pag-angkon og responsibilidad sa katungdanan, ug pagpakita og inisyatibo sa trabaho.

Sa laing bahin, si OIC Center Director Noemi Beth G. Macario mipaambit usab sa mga importanteng pahinumdom karong semana nga may kalabuhatan sa operasyon sa ahensya.

01/09/2026

PROSPERIDAD, Agusan del Sur – Malampusong gipahigayon ang Mid-Assessment sa School-on-the-Air (SOA) on Coconut Production niadtong Agosto 28, 2026 sa Hygeia Intrameds / Foundation for the Development of Agusanons Incorporated (FDAI) sa Patin-ay, Prosperidad, Agusan del Sur, isip kabahin sa padayong pagmonitor ug pagpalig-on sa implementasyon sa programa. Nihatag sa iyang welcome address si Joel C. Corvera, Anchorperson ug Provincial SOA Coordinator, samtang si Jason Paul Dads E. Jampac, Information Officer III, mihatag sa overview sa kalihokan ug sa mga tumong niini.

Nahisgutan sa maong assessment ang nagkalain-laing mga isyu ug concerns, lakip ang mga dokumtento nga kinahanglan isumite, partisipasyon sa mga enrollees, mga giya sa pagpahigayon sa pre-test, quizzes ug examinations, ug mga estratehiya aron mas mapalambo pa ang pagpatuman sa SOA. Si Charmine L. Arconada, SOA Regional Coordinator, mipaila sa mga bag-ong forms ug mikolekta sa mga gisumite nga mga dokumento isip partial submissions gikan sa mga partisipante. Gitambongan ang maong kalihokan sa mga SOA Coordinators gikan sa nagkalain-laing municipal ug city LGUs sa Agusan del Sur, nga nagpakita sa ilang padayong pakigtambayayong ug suporta aron maseguro ang malampusong pagpatuman sa SOA on Coconut Production.

28/08/2026

Prosperidad, Agusan del Sur — Tungod sa possibleng hulga sa El Niño, nagpahigayon karong adlawa, Agosto 27, 2026, ang 9th Province-Led Agriculture and Fisheries Extension System (PAFES) Meeting sa Provincial Agriculture Office sa nasangpit nga probinsya.

Gitumong sa maong kalihukan ang paghisgot sa mga nag-unang issues and concerns nga nasinati sa mga lungsod ug munisipyo, lakip na ang mga lakang ug intervention aron matubag kini, uban sa koordinasyon sa mga National Government Agencies (NGAs). Sa maong pagpanagtigom, nahisgutan ang mga posibleng epekto sa El Niño sa sektor sa agrikultura ug pangisdaan sa probinsya, ilabina ang kakulang sa tubig, posibleng pagkunhod sa produksyon, ug mga hagit nga mahimong atubangon sa mga mag-uuma ug fisherfolk.

Alang sa buhatan sa Agricultural Training Institute - Regional Training Center (ATI-RTC) XIII, lakip sa mga gihatagan og pagtagad ang pagpalig-on sa information dissemination, pag-promote sa climate-resilient agricultural practices, ug tukmang pagpili sa mga tanom ug teknolohiya nga angay gamiton panahon sa hulaw pinaagi sa mga pagbansay.

Gitutokan usab ang pagpalig-on sa koordinasyon tali sa provincial, city/municipal agriculture offices, ug mga NGAs aron masiguro ang hapsay ug tukmang paghatag og serbisyo ug suporta ngadto sa mga apektadong lugar. Gipangulohan ang maong aktibidad ni Armando Valiente, Provincial Agriculturist sa PAVO-Agri, nga mitambong isip representante sa PAFES Chairperson nga si Hon. Santiago B. Cane Jr.

28/08/2026

Ang Agricultural Training Institute–Regional Training Center 13 (ATI-RTC 13) malampusong nagpahigayon sa Training on Free-Range Chicken Production and Management niadtong Agosto 18–20, 2026, sa ATI-RTC 13, Los Angeles, Butuan City, nga gitambongan sa traynta (30) ka mga partisipante nga gilangkuban sa Agricultural Extension Workers (AEWs) ug LEED beneficiaries.

Ang tulo ka adlaw nga pagbansay nagtumong sa pagpalig-on sa kahibalo ug praktikal nga kahanas sa mga partisipante bahin sa produksyon ug pagdumala sa free-range ug native chicken.

Ang mga teknikal nga sesyon gipangulohan nila ATI - RTC XIII Engr. Arnel Fernandez, bahin sa mga oportunidad ug kaugmaon sa industriya sa itlog sa manok, ATI - RTC XIII Agriculturist II Florita G. Lozada bahin sa mga teknolohiya ug pamaagi sa produksiyon sa manok, Dr. Jayzel O. dela Peña gikan sa Caraga State University nga nag tudlo kabahin sa pagdumala sa kahimsog sa manok, Ms. Jessa C. Simene gikan sa MAO Placer nga nagtudlo kabahin sa ethnoveterinary medicine, LSA Cooperator Mr. Oliver Q. Terante nga nagtudlo bahin sa pagdumala sa pagpakaon, housing, record keeping, ug farm economics; ATI - RTC XIII Farm Staff Mr. Diosdado T. Halilong bahin sa egg incubation ug Dr. Tomas Maque Austral Jr. gikan sa Caraga State University nga nagtudlo kabahin sa produksyon ug pagdumala sa Caraga Black Native Chicken.

Isip kabahin sa experiential learning component, mibisita ang mga partisipante sa Olivier Ecovillage sa ikaduhang adlaw alang sa usa ka site visit nga nakatutok sa aktuwal nga produksyon ug pagdumala sa free-range native chicken. Nakahigayon ang mga partisipante nga direktang makita ug makat-on gikan sa mga praktis sa uma, ilabina sa housing, pagpakaon, pagdumala sa flock, paggamit sa anaa nga mga kapanguhaan sa uma, ug kinatibuk-ang pag-atiman sa native chicken.

Ang maong site visit nakahatag og praktikal nga aplikasyon sa mga konsepto nga gihisgutan panahon sa training ug naghatag usab og higayon sa mga partisipante nga makig-interact, magbinayloay og mga kasinatian, ug masabtan ang mga pamaagi nga angay sa lokal nga kahimtang ug episyente sa paggamit sa mga kapanguhaan alang sa free-range chicken production. Pinaagi sa kombinasyon sa technical sessions sa classroom ug field-based experiential learning, napalambo sa training ang kahibalo ug kahanas sa mga partisipante sa production technologies, nutrisyon ug feeding management, animal health, housing, record keeping, farm economics, egg incubation, ug native chicken production.

Ang maong kalihokan nakapalig-on usab sa kapasidad sa mga AEWs ug LEED beneficiaries aron magamit ug mapakaylap ang angay nga mga teknolohiya ug maayong pamaagi sa pagdumala ngadto sa mga mag-uuma sa ilang tagsa-tagsa ka lugar.