10/04/2026
Kaalaman para sa Kaligtasan ng Komunidad
Matagumpay na naisagawa ang Provincial Basic Life Support (BLS) Capacity Building Program 2026 noong Abril 8 at 9, 2026 sa Buliasnin Covered Court, Boac, Marinduque.
Layunin ng dalawang araw na pagsasanay na mahasa ang kaalaman at kasanayan ng mga kalahok sa mga paunang hakbang sa pagsagip ng buhay bilang pundasyon ng epektibong pagtugon sa mga kritikal na sitwasyon. Dinaluhan ito ng mga kinatawan mula sa iba’t ibang barangay ng bayan ng Boac na aktibong nakiisa para sa mas ligtas at handang pamayanan.
Naging matagumpay ang aktibidad sa pangunguna nina Dra. Rachel Rowena R. Garcia, Provincial DOH Officer ng PDOHO Marinduque, at Engr. Joel J. Maling, Engr. III ng PHO, na magkatuwang na nagbigay ng gabay at suporta sa pagpapatupad ng nasabing programa. Katuwang din ang mga kawani ng Tanggapan ng Bise Gobernador na buong pusong sumuporta sa aktibidad.
Ipinapahayag din ang patuloy na suporta ng Tanggapan ng Bise Gobernador sa mga ganitong makabuluhang programa na naglalayong mapalakas ang kakayahan ng bawat komunidad sa pagligtas ng buhay at pagpapanatili ng kaligtasan ng bawat mamamayan.
Ligtas na barangay, ligtas na lalawigan tungo sa mas handa at matatag na Marinduque!
