Bagong Alyansang Makabayan - Batangas

03/04/2024

Walang magawang tama ang 59th IBPA sa lalawigan. Pabigas? Clean-up drive? Seminar? Lahat, paghuhugas-kamay sa dugo ng mga Batangueño na kanilang itinago at pinaslang.

SUNDALONG SINUNGALING, WALANG MAGAWANG MAGALING!
PAPANAGUTIN ANG 59TH IBPA SA PAMBABALASUBAS SA MGA MAMAMAYAN NG BATANGAS!

Kinukundena ng Tanggol Batangan ang tahasang kasinungalingan at paghuhugas-kamay ng 59th Infantry "Protector" Battalion, Philippine Army sa karumal-dumal na mga krimen nito sa kababaihan at kabataan ng Batangas.

Ubod ng sinungaling at walang-kaparis ang kabalahuraan nito na animo'y sila pa ang biktima ng 'akusasyon' samantalang malinaw na naiulat sa baranggay ang nakaraan lamang na kaso ng panghihipo at pangmomolestiya ng isang opisyal nila noong nakaraang ika-28 ng Marso sa isang bata, at panununtok at panunutok ng baril nito sa isa, na pawang mga menor-de-edad at naliligo lamang sa ilog.

Gayundin, hindi totoong sinusunod ng 59th IBPA ang International Humanitarian Law (IHL) sapagkat makailang-ulit nang nakapagtala ang iba't-ibang human rights organization tulad ng Karapatan Southern Tagalog at Mothers and Children for the Protection of Human Rights - MCPHR ng maraming kaso ng paglabag sa karapatang pantao sa pangunguna ng 59th IBPA. Isa na rito ang walang-habas na pagpatay sa batang si Kyllene Casao noong July 2022 - na walang-konsensya nilang pinagtakpan at isinisi sa mga 'di-umano'y rebelde, samantalang malinaw sa fact-finding mission at sa salaysay ng mga sakaing lokal na sila ang pumaslang sa bata.

Kamakailan lamang, walang kaabog-abog din nitong sinalakay ang mga tinutuluyang bahay ng mga volunteer researcher ng Kasama - TK at walang patumanggang tinutukan ng baril ang mga ito sa kalagitnaan ng gabi noong ika-24 ng Marso, 2024 habang sila ay nagsasagawa ng pananaliksik hinggil sa epekto ng El Niño sa mga magsasaka ng tubó ng Brgy. Sampaga, Balayan, Batangas. Hindi na rin ito iba sa paulit-ulit nang serye ng intimidasyon, paniniktik, panggugulo, at pagbabanta na inilalatay nila sa mga kasapi at volunteer ng Kaisahan ng mga Manggagawang Bukid sa Batangas, ng Sugarfolks' Unity for Genuine Agricultural Reform - Batangas, at ng Samahan ng Magbubukid sa Batangas.

Nananawagan ang Tanggol Batangan sa lahat ng nagmamahal sa hustisya, karapatan, at kapayapaan na sama-samang kundenahin at papanagutin si. Lt. Col. Ferdinand Bruce M. Tokong at ang kaniyang uhaw-sa-dugo at sinungaling na kasundaluhan ng 59th Infantry Battalion sa kanilang paulit-ulit at masahol na krimen sa mamamayang Batangueño.

Malinaw ang mga batayan kung bakit dapat silang palayasin na sa probinsya ng Batangas, gaya nang nauna nang pagpapalayas sa kanila ng mga mamamayang Quezonin! Mainaw ang mga batayan kung bakit dapat palakasin ang panawagan para palayasin na ang lahat ng militar sa ating kanayunan!

03/04/2024

ALERT!

Kasalukuyang iligal na binabakuran ng mga guwardiya ng Ayala - Aguinaldo ang lupang sakahan at panirikan ng mga magsasaka sa Barangay Tartaria, bayan ng Silang sa Cavite.

Ang mga nasabing guwardiyan ng mga Ayala at Aguinaldo ay mayroong mga bitbit na baril. Ang laban sa lupa ng mga magsasaka at mamamayang ng Tartaria ay lehitimo at kasalukuyang naka pending sa DAR.

Mag antabay para sa mga susunod na detalye.

01/04/2024

Nakaabot sa Tanggol Batangan, kasama ang ulat ng Mothers and Children for the Protection of Human Rights - MCPHR ang panibagong kaso ng pambabastos at pananakot sa mga kabataan pa man din na gawa ng isa sa mga sundalo ng 59th Infantry "Protector" Battalion, Philippine Army noong ika-28 ng Marso, sa pagitan ng Sityo Sales ng Baranggay Pooc, bayan ng Balayan; at sa Baranggay Coral ni Lopez, lungsod ng Calaca. Pinatutunayan lamang ng 59th IBPA na kasinungalingan ang ipinagpupukpukan nila sa kanilang sarili na 'protektor' sila ng mga lokal ng Batangas.

Ayon sa ulat, tinukoy ng mga lokal na nagkakasiyahan ang mga kabataang taga-Coral ni Lopez sa ilog na nasa pagitan ng Balayan at Calaca nang sadyain sila ng isang lasing na sarhento. Sapilitang pinaahon ang mga kabataan, at nang masilayan ang isang 13-anyos na dalagita ay hinipuan ito sa hita ng bastos na sundalo. Agad itong sinundan ng panununtok ng sundalo sa isa pang 14-anyos na binatilyo, na tinutukan pa anya ng baril. Labis-labis na takot ang inabot ng mga kabataan matapos ang pangyayari. Kahilingan ngayon ng pamilya ng mga biktima na maalis na ang kampo ng mga sundalo sa Sityo Sales para sa kanilang ikapapayapa't kaligtasan.

Ikinababahala ring lubos ngayon ang napabalitang pag-aligid at pakikipagdiinan ng mga tauhan ng 59th IBPA sa mga pamilya ng biktima sa pagtatangka nila na huwag na silang maisumbong at maipamalita pa sa iba. Napaulat ding sinusibukang iareglo na lamang ng kasundaluhan sa perang kabayaran ang pananatiling tahimik ng mga biktima ng kanilang karahasan.

Ipinaaalala sa ating lahat ng pangyayaring ito na hindi pa rin nabibigyang hustisya ang nauna nang kaso ng panggagahasa ng mga tauhan ng 59th IBPA sa isa ring dalagita sa prubisnya ng Quezon taong 2021. Pilit pa rin nilang binubura ang pananagutan nila sa hustisya matapos nilang paslangin ang isa ring inosenteng bata na si Kyllene Casao, noong 2022 sa bayan naman ng Taysan, na pilit nila ngayong ipinagtuturo at ibinibintang sa kung sinu-sino.

Pero gaya ng pagkakabasura ng kaso ninyo kay Hailey Pecayo at sa iba pang human rights workers, hindi basta mapapatahimik lamang at maitatago ang inyong mga kasalanan at kasinungalingan.

Nararapat na harapin sa hukuman nina Lt. Col. Ferdinand Bruce Tokong at ng nasasakdal nyang mga tauhan sa 59th IBPA ang panibagong karagdagan sa serye ng kanilang pambabastos, karahasan, at kasinungalingan sa mamayan ng Batangas! Hayaan ninyong mailantad ng mga kaanak, ng mga lokal na pamahalaan, at ng mga grupong pangkarapatang-tao ang kanilang naging karanasan sa ilalim ng pagsusumiksik ng mga bastos at mamamatay-tao ninyong mga sundalo sa aming mga baryo! Hinihiling din namin ang tulong ng mga kinatawan ng Regional Juvenile Justice and Welfare Committee - Calabarzon, DILG IV-A, Department of Justice - Office of the Regional Prosecutor-Region IV, Commission on Human Rights IV-A, Gabriela Women's Party; ng mga upisina ng Municipality of Balayan at ng City of Calaca; at nina Mayor JR Fronda, Mayor Nas Ona, at Governor DODO Mandanas na maibuhos sana ang agarang suporta at proteksyon sa mga biktima at kanilang mga kaanak upang hindi sila basta mapatahimik at matakot na lamang ng mga tangkang pambubusal ng 59th IBPA. Mananatiling bukas ang Tanggol Batangan upang inyong makatulungan para sa paghahatid ng katarungan sa mga ganitong paglabag sa karapatan.

Pinalalakas lamang lalo ng bawat panibagong kaso ng pambabastos at panggigipit na inilalapat ninyo sa mga taga-Batangas ang panawagan namin: !

01/04/2024

KAWALAN NG MILITAR SA LIBING, KATAHIMIKAN ANG KATUMBAS

Matiwasay nang naihatid sa kani-kanilang puntod ang dalawa sa , ang panibagong biktima ng labis-labis na pamamaslang mula sa 59th Infantry "Protector" Battalion, Philippine Army.

Kahigpitang kahilingan ng mga kaanak ng mga pinatay na sina Jhunalice Arante-Isita at Erickson Bedonia ang hindi na pagpunta at pambubulabog pa sa kanila ng mga kasundaluhan ng 59th IBPA sa lamay hanggang sa libing ng mga labi. Ayon sa kanila, inaabot lamang sila ng pangamba, lalo ang mga matatanda, sa tuwing tinutungo't binabantayan sila ng mga armaduhang sundalo. Hindi rin anya palagay ang loob ng mga bisitang nakikiramay at nag-aalangang lumapit kapag nakikitang nakaaligid ang kasundaluhan. Dagdag pa nila, wala naman nang dapat pang bantayan sa lamay ang mga sundalo, kaya wala nang dapat pang ipaglagi roon ang mismong mga pumatay sa kanilang mahal sa buhay.

Ibinukas din ng mga kaanak ang kanilang pagkabahala dahil ayon sa kanila, napag-alaman nila mula sa kasundauhan mismo na iniwan lamang ang mga bangkay sa lapag nang mahigit sa limang oras, sa ilalim ng tirik na araw, bago ibinaba sa punerarya, dahilan para mapabilis ang pagkasira at pangangamoy ng mga bangkay. Nagbanggit din ang isa sa mga kapatid ng biktima na kung hindi agad nakapunta ang mga kaanak at humanitarian team, binabalak palang hindi na ibigay sa mga pamilya ang mga labi nila, at itago na lamang sa loob ng kampo ng mga sundalo. Malinaw na paglabag ang mga ito sa pagtitiyak ng dignidad at karapatan ng mga biktima sa digmaan ang paulit-ulit na ganitong panggigipit ng 59th IBPA.

Mahigpit na pakikiramay at pakikidalamhati ang alay ng Tanggol Batangan sa mga kaanak at kakilala nina Jhunalice at Erickson. Kasama ninyo kami sa pagluluksa sa kanilang pagkawala, at sa paghahabol na maiharap sa hustisya ang kalabisang ginawa sa kanila ng 59th IBPA.

Hinihikayat din ang sinuman na may karagdagan pang kaalaman hinggil sa pangyayari sa , o kaya nama'y sa mga nakaranas o makararanas ng panggigipit at pananakot mula sa mga tauhan ng 59th IBPA, na huwag mag-alangang magpaabot sa amin sa Tanggol Batangan upang mabigyang-aksyon natin sa madaling panahon at sa abot ng makakayanan ang inyong kalagayan.

14/12/2023

14/12/2023

Mamamayang Batangueño, makiisa sa welga!!!

Sa anunsyo ni Presidente Marcos Jr. sa tuluyang phase-out ng mga tradisyunal na jeep sa Disyembre 31, mawawalan ng pagkukunan ng pangkabuhayan ang humigit-kumulang na 10,000 drivers at operators sa CALABARZON pati na ang pagkawala ng halos 200 ruta sa Timog Katagalugan.

Makiisa sa laban ng tsuper at operator! Sumama sa welga at sumuporta sa transport strike ngayong Disyembre 14 hanggang 15!

05/12/2023

ANG KATOTOHANAN SA LIKOD NG NTF-ELCAC AT KUNG BAKIT ITO DAPAT BUWAGIN

Sa likod ng mga “kabutihang-loob” na ibinabalandra ng National Task Force to End Local Communist Armed Conflict (NTF-ELCAC) sa kanilang propaganda, nagtatago ang napakahabang listahan ng kanilang mga krimen laban sa mamamayan.

Ano nga ba ang NTF-ELCAC?

Ito ay isang pambansang task force na binuo sa ilalim ng rehimeng US-Duterte noong 2018 para umano’y matapos na ang armadong tunggalian sa bansa. Binubuo ito ng iba’t-ibang ahensya ng gobyerno kabilang ang mga sibilyang departamento tulad ng DepEd. Mula sa pagkakatatag nito, wala na itong ibang idinulot kundi dahas at panlilinlang sa mga mamamayan.

Inilunsad ng AFP-PNP ang madugong COPLAN ASVAL na pumaslang sa siyam na aktibista sa Timog Katagalugan, kabilang ang mag-asawang Chai at Ariel Evangelista na pinaslang sa harap ng kanilang anak noong Marso 7, 2021 sa tinaguriang “Bloody Sunday Massacre.” Humagupit sa kanayunan ang mga Focused Military Operation o FMO na humahagip sa mga komunidad ng mga magsasaka at katutubo. Tinotortyur at pilit pinasusuko ng mga militar ang sinumang pinaghihinalaan nilang tagasuporta ng New People’s Army sa kabila ng kawalan ng katibayan. Hindi nakaliligtas ang mga matanda, babae, at bata sa brutalidad ng militar. Sa Quezon, ginahasa ng anim na sundalo ng 59th Infantry Battalion ng Philippine Army ang noo’y 15-anyos na dalagitang si “Belle” matapos paghinalaang tagasuporta ng NPA ang kaniyang pamilya.

Noong Enero 2022, idineploy sa Batangas ang naturang yunit ng militar. Kalahating taon pa lamang sa probinsya ay naghuramentado na ang 59th IBPA. Una nitong pinatay ang 9-anyos na batang babae na si Kyllene Casao sa Taysan, Batangas habang pauwi mula sa bukid kasama ang kaniyang ama at kapatid noong Hulyo 18. Sa kabila ng pagmamakaawa ng kaniyang ama ay pinagbabaril pa rin sila ng mga sundalo . Tinamaan sa ulo ang bata na agad niyang ikinamatay.

Hulyo 26, makalipas lamang ang higit isang linggo ay brutal din na pinaslang ng 59th IBPA ang matandang magsasaka na may sakit sa pag-iisip na si Maximino Digno sa bayan ng Calaca. Tinaniman siya ng M-16 Rifle at ipinalabas ng mga militar bilang NPA.

Nito lamang 2023, mayroon nang 75 human rights violations na naitala ang Tanggol Batangan sa ating probinsya. Kasama rito ang pagdakip sa SUGAR Batangas volunteers na sina Alfred Manalo, Lloyd Descallar at saksi na si Angelito Balitostos, o mas kilala bilang Balayan 3 na kalauna’y sinampahan ng mga gawa-gawang kaso.

Sa loob pa lamang ng isang taon ng rehimeng Marcos Jr., ang NTF-ELCAC, na may pondong P6.3 bilyon ay sapilitang nagpasuko ng 552 sibilyan at nagdulot ng pagbabakwit ng higit 86,000 indibidwal:

22,391 dahil sa pambobomba ng militar
39,769 dahil sa indiscriminate firing o walang-habas na pagpapaputok ng baril
24,670 dahil sa mga operasyong militar sa komunidad ng mga magsasaka

Sa kasalukuyan, nakapiit sa bilangguan ang mahigit 770 bilanggong pulitikal dulot ng mga ilegal na pag-aresto at gawa-gawang kaso. Kabilang dito ang mga aktibista at makabayang indibidwal mula sa Batangas tulad ng magkapatid na Erlindo Baez (BAYAN Batangas Spox) at Ernesto Baez Jr., W***y Capareño, Ernesto Lorenzo, at ang mga maggagapak ng tubó at SUGAR volunteer na sina Alfred Manalo at Lloyd Descallar sampu ng napakarami pang iba.

Nadagdagan pa ito nito lamang Nobyembre nang arestuhin at sampahan ng gawa-gawang kaso si Karla Mae Monge, isang kabataan na volunteer-researcher ng SUGAR Batangas. Nagsasaliksik siya sa epekto ng pagsasara ng Central Azucarera de Don Pedro o CADPI sa mga magtutubó nang dakpin sa Tuy. Ginamit laban sa kanya ang isang warrant of arrest na nakapangalan sa isang alyas, na umano’y lumabag sa mapanupil na Anti-Terrorism Act.

Simula ng itinatag ito, ang NTF-ELCAC ay walang mabuting naidulot sa mga mamamayan. Mula sa mga magsasaka, manggagawa, hanggang sa sektor ng kabataan-estudyante, mga propesyunal at iba pa, walang iba kundi lagim ang inihasik nito gayundin ng mapanupil na Anti-Terrorism Act of 2020.

Hindi dahas at panlilinlang, na gaya ng ginagawa ng NTF-ELCAC ang tunay na solusyon sa armadong tunggalian sa ating bansa. Bagkus, kinakailangang ugatin ang mga ultimmong dahilan kung bakit mayroong umiiral na digmaang sibil na inilulunsad ng mga mamamayan laban sa estadong nasa kapangyarihan.

Ang kawalan ng lupa, ang malaon nang pagsasamantala, pang-aapi, at pagkakait ng batayang serbisyong panlipunan sa mga magsasaka, manggagawa, kabataan, kababaihan at iba pang uri at sektor sa lipunan, at ang iba pang masahol na kalagayang dikta ng imperyalistang US at lokal na naghaharing uri ang nagtutulak sa mga mamamayan na mag-armas at lumaban. At hangga’t hindi ito natatapos, magpapatuloy ang digmaan.

Kinakailangang tapat na humarap ang Gobyerno ng Republika ng Pilipinas (GRP) sa mga representante ng rebolusyonaryong kilusan mula sa National Democratic Front of the Philippines (NDFP) sa peace talks at lubusang pag-usapan ang mga solusyon at kasunduan na tutugon sa mga problema ng lipunan at ng mamamayang Pilipino. Gayunpaman, anumang kasunduan ang pirmahan ng dalawang panig ay wala ring ganansyang makukuha ang mga mamamayan kung hindi ito susundin laluna ng GRP, gaya na lamang ng ginagawa nitong pambubusabos sa Comprehensive Agreement on Respect to Human Rights and International Humanitarial Law o CARHRIHL.

BUWAGIN ANG NTF-ELCAC!
TUGUNAN ANG MGA UGAT NG ARMADONG TUNGGALIAN!
PEACE TALKS, ITULOY!

23/11/2023

𝐊𝐀𝐓𝐎𝐓𝐎𝐇𝐀𝐍𝐀𝐍 𝐀𝐓 𝐇𝐔𝐒𝐓𝐈𝐒𝐘𝐀: 𝐀𝐍𝐆 𝐓𝐀𝐆𝐔𝐌𝐏𝐀𝐘 𝐍𝐈 𝐇𝐀𝐈𝐋𝐄𝐘 𝐏𝐄𝐂𝐀𝐘𝐎 𝐋𝐀𝐁𝐀𝐍 𝐒𝐀 𝐏𝐀𝐒𝐈𝐒𝐌𝐎 𝐀𝐓 𝐓𝐄𝐑𝐎𝐑𝐈𝐒𝐌𝐎 𝐍𝐆 𝐄𝐒𝐓𝐀𝐃𝐎

MAINIT NA PAGSALUBONG ang paabot ng lumalabang mamamayan ng Batangas matapos ibasura na ng hukuman ang mga gawa-gawang kaso ng terorismo na isinampa ng 59th Infantry "Protector" Battalion, Philippine Army laban sa kabataang aktibista at Tanggol Batangan spokesperson na si Hailey Pecayo. Patunay ito sa patuloy na pagsusulong natin ng tunay na katarungan sa atin sa Batangas!

Matamis ang muling ibinunga nang walang kapaguran na panawagan at paniningil para sa katarungan matapos hatulan ng Sta. Rosa City Prosecutor na basura't walang batayan ang limang gawa-gawang kaso na ipinagpilitang idiin sa kanya nina Lt. Col. Ernesto Teneza, Jr., Sgt. Jean Claude Bajaro, CPL Ivan Neil Ogatis, at ng sunud-sunurang 59th IBPA, sa ilalim ng kriminal na Anti-Terror Law ng lumipas na rehimeng Duterte.

Matinding paniniktik, banta sa kaligtasan at seguridad, intimidasyon, at kasinungalingan ang paulit-ulit na ipinukol sa pangunguna ng Armed Forces of the Philippines laban kay Pecayo at sa lahat ng nakiisa sa kaniyang laban para sila'y mapatahimik, ngunit matapang nilang kinaharap lahat ng ito, lalo't naging mukha na rin ng pakikilaban para sa karapatang tao sa kanayunan si Pecayo.

Naunang kumilos si Pecayo bilang artista ng Panday Sining Batangas, hanggang kalauna'y tumutok na siya sa human rights work, lalo't matapos sunud-sunod na pineste ng kapulisan at militar ng mga atake sa kapayapaan ang lalawigan. Kasama si Pecayo sa pagsuong para sa hustisya matapos ang pamamaslang sa mag-asawang aktibista na sina Ariel at Chai Evangelista ng UMALPAS-KA; gayundin sa iligal na pagdampot sa mga lider-masa na sina Ernesto Baez ng Bagong Alyansang Makabayan - Batangas, at Willie Capareño ng Anakpawis Partylist Timog Katagalugan. Tumatayo rin siyang paralegal para sa laban sa panirikan at kabuhayan ng mga lokal ng Maligaya Homeowners Association, gayundin ng mga magtutubó at mga volunteer ng Sugarfolks' Unity for Genuine Agricultural Reform - Batangas. Kasama rin siya sa pangunguna sa mga fact-finding mission gaya ng sa ikinasang humanitarian quick response action matapos ang mga unang extra-judicial killings sa ilalim ni Bongbong Marcos, matapos patayin ng 59th IBPA si Kyllene Casao, 9 na taong batang babae mula sa Taysan; at si Maximino Digno, PWD at senior citizen mula sa Calaca City. Sa kaniyang matapang na paglubog sa mga mamamayan ng Taysan na lumalaban sa pamumupog ng militarisasyon ng 59th IBPA, idinikit si Pecayo ng kasundaluhan sa gawaing terorismo at pinagbintangang lumalabag siya umano sa international humanitarian laws.

Nasasaksihan ng Batangas ngayon ang hagupit na pambabastos ng rehimeng US-Marcos-Duterte maging sa mga batayang karapatang pantao natin. Pinag-eeksperementuhan ang mga lumalaban nating aktibista at lider-masa ng kasuklam-suklam na Anti-Terror Law, at idinadamay ang mga sibilyan sa mapaminsalang gyera kontra-insurhensya ng Malacañang, na sa desperasyon nilang maipanalo at maipagyabang ay ipinapataw na rin nila labas pa man sa mga kalahok ng armadong tunggalian. Nambubusal sila at pumapatay habang bulag, p**i, at bingi sa tumitinding panawagan para sa katarungang panlipunan at usapang pangkapayapaan.

Ngunit dahil sa pag-angat ng hatol ngayon, inaasahan na rin na sunod nang malilinis mula sa mapanakal na kasinungalingan ng 59th IBPA ang iba pang mga aktibista ng lalawigan at rehiyon na pilit din nilang isinasabit sa gawa-gawang terorismo, kabilang na sina Rev. Edwin Egar ng Karapatan Southern Tagalog, John Peter Garcia ng YAPJUST - Youth Advocates for Peace with Justice, Kenneth Rementilla ng Anakbayan Southern Tagalog, at Jasmin Rubia ng Mothers and Children for the Protection of Human Rights - MCPHR.

Napakalinaw na nireresiklo na lamang ng estado, pulis, at militar ang pudpod nang taktika mula pa man noong diktadurya ng pinatalsik na tiraniyang Marcos, Sr.: ang buhusan ng sunud-sunod na imbentong kasinungalingan at gawa-gawang kaso ang mga aktibista at lider-masa para lunurin ang katotohanan, at patayin ang silab ng katarungan. Ngunit hindi nila tayo napatahimik noon, at lalong hindi tayo magpapasiil ngayon!

Kaya't kung gusto man ni Bongbong Marcos na mapaiksi pang lalo ang kapit niya sa Malacañang, nandito tayo para ilantad at ipagpatuloy ang paghahatid ng katarungan para sa lumalabang masa ng Batangas!

20/10/2023

𝐋𝐨𝐤𝐚𝐥 𝐧𝐚 𝐩𝐫𝐨𝐝𝐮𝐤𝐬𝐲𝐨𝐧, 𝐡𝐢𝐧𝐝𝐢 𝐢𝐦𝐩𝐨𝐫𝐭𝐚𝐬𝐲𝐨𝐧!

Tagumpay na isinara ang pagkilos ng mga magbubukid ngayong araw sa Kamaynilaan para sa pag-alala sa 'Buwan ng Mga Pesante' ngayong taong 2023!

Dumadagundong nating inirehistro sa tarangkahan ng Malacañang ang nagngangalit na paglaban natin sa kainutilan at kapabayaan ni Bongbong Marcos sa agrikultura ng bansa! Kagutuman at kawalang-kapayapaan ang tanging inaabot natin habang tila inuulit ni Marcos, Jr. ang krimen ng kanyang amang diktador, na hinatulan at pinalayas na noon ng taumbayan.

Dala-dala natin ang laban ng mga magtutubó para sa pananagutan at ikasasalba ng lokal na idustriya ng tubó at asukal, dahil nananatiling hikahos at walang katiyakan sa pagkakakitaan ang mga manggagawang-bukid dahil sa kulang na ayuda, kawalang-subsidyo, at pananatiling sarado ng Central Azucarera de Don Pedro, Inc. (CADPI).

Gayundin, isinama natin sa mga panawagan ang hustisya para sa mga pambabalahura ng kapulisan at ng 59th Infantry "Protector" Battalion, Philippine Army sa ating mga organisasyong masa, lider-lokal, kasapian, boluntir, at mga baranggay na ating tinutungo, kinakapulong, at tinitipon para sa kanilang kabuhayan at karapatan. Hangga't nagmamatigas sila sa kanilang mga paglabag at kasinungalingan, asahan din nilang patuloy ang pagsisikap nating makasama sa hanay ng nagkakaisang Pilipino para sa pagpapatibay ng ating paglaban.

19/10/2023

SUBAYBAYAN: Nagkakatipon ngayon sa labas ng Department of Agrarian Reform, Philippines ang nagkakaisang hanay ng mga magbubukid at mga kasama nilang progresibo, mula sa iba't-ibang rehiyon ng bansa, para ipahayag ang kawalan ng tunay na pag-usad sa agrikultura't ekonomiya ng bansa.

26/09/2023

𝐈𝐍𝐔𝐓𝐈𝐋 𝐍𝐀 𝐀𝐓𝐀𝐊𝐄 𝐒𝐀 𝐌𝐆𝐀 𝐀𝐊𝐓𝐈𝐁𝐈𝐒𝐓𝐀, 𝐃𝐄 𝐅𝐀𝐂𝐓𝐎 𝐌𝐀𝐑𝐓𝐈𝐀𝐋 𝐋𝐀𝐖 𝐍𝐈 𝐆𝐔𝐁𝐘𝐄𝐑𝐍𝐎𝐍𝐆 𝐌𝐀𝐑𝐂𝐎𝐒, 𝐉𝐑. 𝐒𝐀 𝐌𝐀𝐒𝐀

Hindi man nakapailalim ang bansa sa isang deklaradong Batas Militar, hindi naman maikakailang hindi malayo, at baka mas mahigpit pa nga, ang inuulit ni Bongbong Marcos na malawakan, sunud-sunod, at malagim na atake sa sibilyang Pilipino, lalo sa karapatan natin sa kritisismo sa pamahalaan, sa pagpapahayag, hanggang sa mga pagtitipon para rito.

Ngayong araw, kasama sa Quezon City para magsusumite ng letter of complaint sa Commission on Human Rights of the Philippines si Jayssie Balugna, provincial coordinator ng Kaisahan ng mga Manggagawang Bukid sa Tubuhan (KAISAHAN) at tagapagsalita mula sa Sugarfolks' Unity for Genuine Agricultural Reform - Batangas, sa layuning ipawalang-bisa ang inutil na sampang reklamo ng Quezon City Police District sa kaniya at sa 13 iba pang aktibista't lider-masa mula sa Timog Katagalugan, na kasama niya sa tinaguriang .

Sa nasabing reklamo, ipinagpupumilitan ng Philippine National Police na lumabag anya sa Batas Pambansa (BP) no. 880, o 'An Act Ensuring the Free Exercise by the People of their Right Peacably to Assemble and Petition the Government for Other Purposes,' ang mga nasa delegasyon ng rehiyon natin sa matagumpay nating mapayapang kilos-protesta nitong nagdaang ' ng Taumbayan.'

Ngunit kahihiyan man sa kanila, malinaw na paghahabol na lamang nila itong magambala ang umiigting nating pakikilaban. Taliwas sa bintang nila, may permit mula sa Quezon City ang ating kilos-protesta. Natapos ang ating pagkilos nang mapayapa't matagumpay, habang sila pa ngang mga kapulisan ang sa katunaya'y nagwalang-hiya at nambastos sa araw na iyon nang sabayan nila ang ating programa ng basag-tainga at paglulustay-sa-pondo na 'karaoke session,' na wala ni isa ang nakinabang o natuwa. Naiakyat pa nga ng taumbayan hanggang sa kaalaman ng mayora ng Quezon City na si Mayor Joy Belmonte ang ginawang pambubulabog ng kapulisan, at naipahayag sa social media.

Sa pagtingin ni Balugna, sadyang walang mali sa naging protesta, dahil "nagugutom na tayo sa Batangas" at iyon lamang ang dala-dala nila sa pakikipanawagan. "Hindi ga't kung hindi naman kami sisigaw, hindi naman makakapakinig at kikilos ang mga iyan? Mamamatay na kami sa gutom," pagsasara niya.

Patuloy ang panawagan natin sa mas malawak na pakikiisa para sa paglaban natin sa mga mapambusal na mga ganitong atake at pakana ng estado sa atin. Hindi tayo mabubuwag o maililihis nito, kung hindi idaragdag lamang natin ito sa papahaba nating listahan ng mga dahilan kung bakit kailangang bantayan at kuwestyunin ang Malacañang; kung bakit inutil at pagpapatuloy lamang ng Martial Law ng ama niyang pinatalsik na ang kriminal na pagpapatakbo ni Marcos, Jr. sa bansa ngayon; at kung bakit mananatili ang paglaban sa bawat isa sa atin, at lalawak lamang ang ating pagkilos, dahil sa mga tulad nilang naniniil sa atin.