15/05/2025
Lawa at Binhi Project
Sa pangunguna ng DSWD–CALABARZON, katuwang ang Pamahalaang Panlalawigan ng Batangas sa pamamagitan ng PGENRO-Batangas, OPA-Batangas, at PSWDO-Batangas, ay iginawad sa Bayan ng Balayan ang Project LAWA at BINHI (Local Adaptation to Water Access and Breaking Insufficiency through Nutritious Harvest for the Impoverished).
Ang Project LAWA at BINHI ay bahagi ng Risk Resiliency Program – Climate Change Adaptation and Mitigation ng DSWD. Layunin ng programang ito na palakasin ang kakayahan ng mga pamilyang Pilipino na makaangkop sa epekto ng pagbabago ng klima, habang tinutugunan ang mga pangunahing isyu gaya ng kakulangan sa sapat at masustansyang pagkain at mapagkakakitaang kabuhayan.
Sa kasalukuyan, ang proyekto ay isinasagawa sa bayan ng Balayan sa pamamagitan ng pagtutulungan ng Agriculture Office, MENRO, at MSWDO. Isang daang (100) benepisyaryo, na binubuo ng mga magsasaka, mangingisda, at iba’t ibang miyembro ng sektor tulad ng mga Persons with Disabilities (PWD) MULA SA Barangay Caloocan, Carenahan, at Navotas, ang aktibong kalahok sa proyekto.
Ang mga benepisyaryo ay sasailalim sa 20-araw na programa na nakatuon sa mga gawaing may kinalaman sa pagbubukid at pangingisda, tulad ng pagsasaayos ng mga sakahan, pagtatanim ng mga halamang pagkain, paghahanda ng mga fish ponds, at iba pang gawaing magpapalakas sa seguridad sa pagkain at kabuhayan ng kanilang komunidad.
