14/05/2025
Magandang umaga po sa lahat ng Bacoeños,
Ako po ay taos-pusong nagpapasalamat sa lahat ng naniwala, sumuporta, nakiisa, at nagpaabot ng mensahe ng pagtitiwala mula nang matapos ang halalan. Lubos pong nagagalak ang aking puso dahil kahit hindi tayo pinalad na manalo bilang Konsehal, nangingibabaw pa rin ang diwa ng pagkakaisa at malasakit ng Samahang Barangay sa buong Baco.
Sa aking mga kabarangay sa Mangangan 1, sa aking mga kamag-anak, kaibigan, kakilala, sa aking pamilya at higit sa lahat sa team I Love Baco sa pamumuno ng aming Mayor Reynaldo A. Marco — salamat po sa inyong matatag na suporta. Hindi po naging madali ang aking pagtakbo, ngunit hindi ninyo ako iniwan hanggang sa dulo. Kayo po ang naging sandigan ko sa bawat hakbang ng ating paglalakbay.
Sa 6,643 na Bacoeños na nagtiwala sa akin, ramdam ko po ang inyong buong pusong suporta. Hinding-hindi ko po sasayangin ang tiwalang iyon. Bagamat hindi ko maipagpapatuloy ang aking layunin mula sa loob ng konseho, patuloy ko pa rin pong ipaaabot ang aking adbokasiya at maglilingkod sa abot ng aking makakaya — sa sarili kong munting paraan.
Sa mga bagong halal na opisyal ng ating bayan, nawa’y gabayan kayo ng Panginoon sa bawat desisyon at hakbang para sa ikauunlad ng Baco at ikagiginhawa ng mga Bacoeños.
Muli, ako po si Kap Jun Torreliza — babangon muli, magpapatuloy sa paglilingkod, at mananatiling kasama ninyo.
Maraming salamat po. Hanggang sa muli.
