30/05/2026
छत्रेश्वरी गाउँपालिका, वडा नं, ६ को लान्तीमा महिलाहरूका लागि १० दिने आधारभूत नौमती बाजा बजाउने तालिम आजदेखि सुरु भएको छ । परम्परागत रूपमा पुरुषहरूको बाहुल्य रहेको तथा लोपोन्मुख अवस्थामा पुगेको नौमती बाजा संरक्षण, संवर्द्धन र पुस्तान्तरण गर्ने उद्देश्यले सञ्चालन गरिएको तालिमको उद्घाटन गाउँपालिका उपाध्यक्ष श्री बुद्ध कुमारी खत्रीले गर्नुभयो । ६ नं वडा कार्यालयको आयोजनामा सुरु भएको तालिममा वडाका १० जना महिलाहरू सहभागी रहेका छन् ।
वडा अध्यक्ष श्री टिकाराम बुढाको अध्यक्षतामा भएको उद्घाटन कार्यक्रममा वडा सदस्य श्री खड्गनाथ योगीले स्वागत मन्तव्य राख्नुभएको थियो । तालिममार्फत सिन्दुली कला घरका दक्ष महिला प्रशिक्षकहरुले नै सहभागीहरूलाई सनई, नरसिंहा, कर्नाल, दमाहा, ट्याम्की, ढोलकी, झ्याली लगायत नौमती बाजासम्बन्धी सैद्धान्तिक तथा व्यवहारिक ज्ञान प्रदान गरिरहनुभएको छ ।
हराउँदै गएको मौलिक कला, संस्कृति र परम्पराको संरक्षणमा महिलाहरूलाई सक्रिय सहभागिता गराउने उद्देश्यले सञ्चालन गरिएको यस तालिमले स्थानीय स्तरमा नौमती बाजाको संरक्षण, सांस्कृतिक पहिचानको प्रवर्द्धन तथा महिलाहरूको क्षमता अभिवृद्धिमा महत्वपूर्ण योगदान पुग्ने विश्वास लिइएको छ।
कार्यक्रम सफलताको शुभकामना संगै तालिममा सहभागी सम्पूर्ण दिदीबहिनीहरूलाई हार्दिक बधाई तथा शुभेच्छा व्यक्त गर्दछौं ।
