27/05/2026
तिलाठी मे विकास कार्य ठप्प: ६ उपभोक्ता समिति मध्ये मात्र एकटा गठित, १५ गते धरिक अन्तिम समयसीमा!
- पिछला किछु समयसँ तिलाठी क्षेत्र अंतर्गत चारिटा महत्वपूर्ण सडक आ दू टा मन्दिर निर्माण कार्यकें गति देबाक लेल कुल ६ टा उपभोक्ता समिति गठन करवाक कसरत भ' रहल अछि। मुदा, प्रशासनिक उदासीनता आ स्थानीय विवादक कारणे अखन धरिकेँ विवरण अनुसार मात्र एकटा समितिक गठन विधिवत रूप सँ भ' सकल अछि। आए १३ गते अछि आ नियमानुसार जँ आगामी दू दिनमेँ, अर्थात १५ गते धरि बाँकी समितिसभक गठन नै भ' सकल, त' सरकारी प्राविधिक प्रक्रियाक कारणे कोनो भी विकास निर्माणक काज अगाड़ि नै बढ़ि सकतै आ बजट फ्रिज होएबाक पूर्ण आशंका अछि।
आखिर कियाक भ' रहल अछि उपभोक्ता समिति गठन मे ढिलासुस्ती?
वर्तमान समय मे विभिन्न नीतिगत आ व्यावहारिक जटिलताक कारणे कोनो भी स्थानीय नागरिक उपभोक्ता समिति मे बैसबाक लेल आ जिम्मेदारी लेबाक लेल उत्सुक नै भ' रहल छथि। एकर पाछू निम्नलिखित चारिटा मुख्य कारण देखल जा रहल अछि:
१. युवा वर्गक तार्किक अडान (बिना नाला सडक अमान्य):
बिटु मिश्र वत्स सहितक स्थानीय सचेत युवा लोकनीक दृढ़ आ जायज अडान छनि जे बिना नाला केँ सडक निर्माण कएनाइ सरकारी राशिक दुरुपयोग अछि। बिना पानी निकासक व्यवस्था कएने जँ सडक बनिते, त' ओ बहुत जल्दी नष्ट भ' जाएत। एहि लेल पहिने नाला आ तकर बाद सडकक काज शुरू कएल जाए।
२. अपूर्ण बजट आ टुकड़ा-टुकड़ा योजना:
कोनो भी सडकक दीर्घकालीन निर्माणक लेल पर्याप्त आ पूर्ण बजटक व्यवस्था नै कएल गेल अछि। कहबाक तात्पर्य ई जे, एकटा पैघ आ एकीकृत योजना बनेबाक स्थान पर, राजनीतिक वा प्रशासनिक स्वार्थवश बजट केँ छोट-छोट टुकड़ा मे बांटि देल गेल अछि, जाहि सँ टिकाउ काज होनाइ असम्भव अछि।
३. उपभोक्ता सभ मे उदासीनता आ अरुचि:
योजना सभक अहि प्रकारें टुकड़ा-टुकड़ा भेलाक कारणे, समिति मे रहि क' काज करवाक लेल इच्छुक आ प्रतिष्ठित लोक सभक कमी भ' गेल अछि। कम बजट आ बेसी झंझटक कारणे कियो एकर नेतृत्व लेबाक लेल तैयार नै छथि।
४. वडा कार्यालय द्वारा सडकक सीमांकन मे विफलता:
सडक निर्माणक लेल आवश्यक बजट त' वडा मे आबिगेल अछि, मुदा वडा कार्यालय द्वारा अखन धरि सडकक वास्तविक चौड़ाइ आ सीमाक निर्धारण (सीमांकन) नै कएल जा सकल अछि। बिना सडकक सही नापी-जोखी आ सीमांकन कएने, वर्तमान संकीर्ण सडक पर मात्र ढलान (आरसीसी/पीसीसी) क' देनाइ समस्याक स्थायी समाधान कतहु सँ नै भ' सकैत अछि।
५. आवश्यक सामग्री, सिमेन्ट, रड, ईँटा सभक सरकारी रेट कम भेलाक चलतबे सेहो लोकक उदासीनता चलिरहल छै। तहन, जँ वडा कार्यालय आ सरोकारवाला निकाय समय रहिते अहि गतिरोध सभकें दूर नै करतै, त' तिलाठीक विकास काज आगाँ नए बढब निश्चित अछि।
क्रमशः...
