30/05/2026
गल्तीभन्दा ठूलो कुरा, सुधार गर्ने क्षमता हो
लोकतान्त्रिक प्रक्रियाबाट निर्वाचित सरकार सफल होस् भन्ने चाहना हरेक नागरिकको हुन्छ। सरकार सफल हुँदा देश सफल हुन्छ, जनता लाभान्वित हुन्छन्।
नयाँ नेतृत्व आउँदा केही गल्ती हुनु अस्वाभाविक होइन। हामी सबै जीवनमा गल्ती गर्छौं। महत्वपूर्ण कुरा गल्ती हुनु होइन, गल्तीबाट सिक्नु र समयमै सुधार गर्नु हो।
जनताले पनि नयाँ आशा र विश्वासका साथ नेतृत्वलाई अवसर दिएका हुन्। त्यसैले जनताले पूर्णता खोजेका होइनन्, जिम्मेवारी, संवेदनशीलता र सुधारको क्षमता खोजेका हुन्।
तर जब निर्णयहरू बिना पर्याप्त तयारी, बिना पर्याप्त परामर्श र जनताको दैनिक जीवनमा पर्ने असरको मूल्याङ्कन नगरी गरिन्छन्, तब प्रश्न उठ्नु स्वाभाविक हुन्छ। प्रश्न उठाउनु विरोध होइन, सुधारको अपेक्षा हो।
विशेषगरी सीमावर्ती जिल्ला बारा र पर्साका नागरिकहरूको जीवनशैली फरक यथार्थसँग जोडिएको छ। नेपाल–भारत खुला सीमा केवल दुई देशबीचको व्यवस्था मात्र होइन, यहाँका हजारौं परिवारको दैनिक जीवनको हिस्सा हो। कसैको खेतीपाती सीमापार छ, कसैको व्यापार, कसैको रोजगारी, कसैको पढाइ, त कसैको पारिवारिक सम्बन्ध। यस्ता क्षेत्रको वास्तविकता नबुझी गरिएका निर्णयहरूले सर्वसाधारणलाई अनावश्यक दुःख दिन सक्छन्।
हालै प्रस्तुत बजेट हेर्दा पनि बारा र पर्साका दीर्घकालीन आवश्यकता र सम्भावनाहरूले अपेक्षित प्राथमिकता पाएको महसुस हुन सकेन। औद्योगिक विकास, पूर्वाधार, कृषि, शिक्षा, स्वास्थ्य तथा सीमावर्ती क्षेत्रका विशेष आवश्यकताहरूलाई अझ स्पष्ट रूपमा सम्बोधन गरिएको देख्न चाहन्थ्यौं।
यसले अर्को महत्वपूर्ण प्रश्न उठाउँछ, हामीले निर्वाचित गरेका सांसदहरूको भूमिका के हो?
सांसदहरू केवल पार्टीको निर्णयको समर्थन गर्नका लागि मात्र निर्वाचित भएका होइनन्। उनीहरू आफ्नो क्षेत्रका नागरिकको आवाज संघीय संसदसम्म पुर्याउन, विकासका योजना ल्याउन र जनताको आवश्यकता सरकारसमक्ष बलियो रूपमा राख्न निर्वाचित भएका हुन्। बारा र पर्साका जनप्रतिनिधिहरूले पार्टीभन्दा माथि उठेर आफ्नो क्षेत्रको हक, अधिकार र विकासका लागि अझ सशक्त रूपमा आवाज उठाउनुपर्ने आवश्यकता देखिएको छ।
आलोचनाको उद्देश्य कसैलाई कमजोर बनाउनु होइन, राम्रो शासनका लागि सचेत गराउनु हो। जनताले गल्ती नगर्ने नेता खोजेका छैनन्। जनताले गल्ती स्वीकार गर्न सक्ने, त्यसबाट सिक्न सक्ने र जनताको पक्षमा उभिन सक्ने नेतृत्व खोजिरहेका छन्।
मेरो आग्रह सरल छ, जनताको आवाज सुनौं, स्थानीय यथार्थ बुझौं, आवश्यक परे निर्णयहरू पुनर्विचार गरौं, र बारा–पर्साका नागरिकको अपेक्षाअनुसार विकास र अवसर सुनिश्चित गरौं। राजनीति भन्दा ठूलो कुरा जनता हुन्, र जनताको विश्वास भन्दा ठूलो कुनै उपलब्धि हुँदैन।
#बजेट२०८३
#सुशासन
#बारा
#पर्सा
