22/09/2019
सुनिल बहादुर थापा ,पूर्वमन्त्री
० यहाँ राप्रपा संयुक्तको नेता हुनुहुन्छ । पार्टीका गतिविधि कसरी अगाडी बढाईरहनु भएको छ ?
पार्टीले मलाई प्रदेश एकको संयोजक तोकेको छ । सोही अनुरुप म एक नम्बर प्रदेशको संगठन निर्माणमा जुटिरहेको छु । अधिकांश जिल्लामा एकता प्रकृया पनि सकिसकेको छ । भने सिंगो पार्टी पनि एकता प्रकृयालाई पुर्णता दिन नै सक्रिय छ ।
० राप्रपाका विभिन्न घटक बिच एउटाले अर्को पार्टीको नेता कार्यकर्ता आफूतर्फ तान्ने प्रतिस्पर्धा जस्तो देखिन्छ । सिंगै पार्टी एकता नगरेर किन व्यक्ति तान्न लाग्नु भएको ?
तपाईले गर्नु भएको प्रश्न सही छ । पार्टी बलियो बनाउन व्यक्ति भन्दा समूह,समूह भन्दा पार्टी नै मिल्नु पर्ने कुरा सही हो । म व्यक्तिगत रुपमा भन्नु हुन्छ भने यताका मान्छे उता तान्ने उताका मान्छे यता तान्ने प्रवृतिको पक्षमा छैन । तर कुनै व्यक्ति पार्टीमा आउँछु भन्नेलाई नआउ भन्न मिल्दैन । सबैका आ—आफ्ना ईतिहास र क्षमता हुन्छन् । त्यसलाई सम्मान गर्नै पर्दछ । तैपनि हाम्रो जोड पार्टी एकतामै हुनु पर्दछ । किनकी पार्टी एकता हुँदा हामीले प्रधानमन्त्री पाएका छौ । देशको तेस्रो ठुलो शक्ति भएका छौं । उन्नाइस जनासम्म मन्त्री भएका छौं । त्यसैले जति बेला पार्टी एक भएको हुन्छ । त्यसबेला हाम्रो उपस्थिति दह्रो हुन्छ । दोस्रो संविधान सभामै पनि हाम्रो राम्रो उपस्थिति थियो । तेह्र जना सांसद थियौं । म आफै संविधान जारी गर्ने बेलामा मन्त्री थिए । त्यसैले हाम्रो जोड त पार्टी एकता हुनु पर्छ भन्ने मै छ ।
० कतिपयले त तपाई लगायत केही नेताहरु गणतन्त्रको पक्षमा उभिने कमल थापाहरु राजतन्त्र भन्ने यस्ले पनि पार्टी एकतामा बाधा पारेको छ भन्छन् नि ?
त्यस्तो केही छैन । पार्टी भित्र आ—आफ्ना दृष्टिकोण हुनसक्छन् । तर हामी सबै राप्रपाले अहिलेको संविधान मानेरै अगाडी बढेका छौं ।
० भनेपछि सबै राप्रपा गणतन्त्रवादी ?
त्यसो भनेको पनि होइन, आ आफ्ना मुल्य मान्यता र दृष्टिकोण हुन सक्छन्, र छन् । पञ्चायतमा पनि सबै पञ्चहरुको समान दृष्टिकोण थिएन । अहिले यही दृष्टिकोण फरक भएका कारणले पार्टी एकता भएन भन्ने मलाई लाग्दैन ।
० एकताको घोषणा गर्ने भनेर विगतमा हलनै बुक गरे पछि केले रोक्यो ?
त्यसबेला पर्याप्त गृहकार्य नपुगेकोले रोकिएको हो । त्यसअघि पनि एकता गर्दा गृहकार्य नपुगेकोले एकता लगत्तै फुट्यो । तर त्यसअघि राजपा र जनशक्ति पार्टी बीच एकता हुँदा गाउँदेखि एकता हुँदै आएकोले त्यो टिकाउ भयो । एकता भनेको दुई नेताले अंगालो मार्दैमा हुने होइन । त्यसको निम्ती भावना,बिचार,प्रकृया सबै मिल्नु पर्छ । यी मिलाउन पर्याप्त समय र गृहकार्य चाहिन्छ । त्यही नपुगेकोले बिगतमा रोकिएको हो ।
० यहाँ त पार्टीको विदेश विभाग प्रमुख पनि हुनुहुन्छ । नेपालको राजनीतिमा भारतको विशेष प्रभाव रहन्छ । भारतमा हिन्दुत्वको नारा उठाउने नरेन्द्र मोदी दोस्रो कार्यकाल प्रधानमन्त्री निर्वाचित भएर आएपछि यहाँ पनि पुनः हिन्दुराज्य हुन्छ । राजा फर्कन्छन् भन्ने हल्ला पनि छ नि ?
मलाई औपचारिक रुपमा विदेश विभाग प्रमुख भन्दा पनि दुई जना अध्यक्षले विदेश मामिला हेर्ने भन्नु भएको हो । जहाँसम्म भारतमा नरेन्द्र मोदी दोहोरिएर प्रम बन्नु भयो त्यो नेपालको निम्ती राम्रै कुरा हुन्छ । किनकी भारतमा स्थिर सरकार बन्यो भने त्यसको सकारात्मक फाईदा नेपाललाई पनि हुन्छ । नेपालमा पनि दुई तिहाईको स्थिर सरकार छ । भारतमा पनि स्थिर सरकार भएपछि त्यो दुबै देशको निम्ती हितकर हुन्छ । जहाँसम्म भारतमा भाजपा आएपछि नेपालमा हिन्दुराज्य हुन्छ । राजा आउँछन् भन्ने कुरा सोम शर्माको सातुको कथा जस्तै हो । यहाँ जे जस्ता परिवर्तन गर्छन नेपाली जनताले नै गर्दछन् । यस्मा अरुले गरिदिन्छन् भन्ने होइन । नेपाली जनता आफै पढे लेखेका शिक्षित छन् । उनीहरुले आफ्ना देशमा के गर्ने भन्ने आफै निर्णय गर्दछन् ।
० प्रधानमन्त्री केपी ओलीले सर्वदलिय बैठक नै राखेर अहिलेको प्रणालीमा खतरा छ भन्नु भयो । सत्तारुढ पार्टीका अर्का अध्यक्ष प्रचण्डले पनि राजतन्त्रवादी चलखेल गरे भन्नु हुन्छ । के प्रतिगमनको खतरा हो ?
यो त आफूले राम्रो काम गर्न नसकेपछि जनताको ध्यान अर्कोतर्फ मोड्ने चाला हो । यहाँ त्यस्तो खतरा देखिदैन । कुनै राम्रा काम गर्न नसकेर जनताको अगाडी अनुहार देखाउन नसकेपछि जनताको ध्यान अनेत्र मोड्न र आफ्ना कमजोरी ढाकछोप गर्न यस्तो अभिव्यक्ति दिने गर्नु भएको हो । आफूले राम्रो नगर्ने अनि दोष अर्काको थाप्लोमा राख्ने प्रवृत्ति राम्रो होइन ।
० वर्तमान सरकार बनेको डेढ वर्ष भन्दा बढि भयो, यस्को समिक्षा कसरी गर्नु हुन्छ ?
अहिलेको सरकार दुई तिहाईको सरकार हो । यो सरकारले संमृद्ध नेपाल सुखी नेपाली भन्ने नारा पनि दिएको थियो । त्यसैले नेपाली जनता मात्र होइन,विदेशी मित्रहरुले समेत नेपालमा दुई तिहाईको कम्युनिष्ट सरकारले राम्रै गर्ला भन्ने ठानेका थिए । तर दुखका साथ भन्नु पर्छ,यो सरकारले कुनै पनि राम्रो काम गर्न सकेन । पहिलो आर्थिक वर्षमा विकास खर्च बीस बाईस प्रतिशत मात्र भयो । यसबाटै प्रष्ट हुन्छ सरकारले अपेक्षा गरेअनुरुप काम गर्न सकेन । अहिले सडक हेर्नुस स्वास्थ्थ सेवा हेर्नुस ,विकास निर्माण हेर्नुस सब लथालिङग छन् । सरकारले कर बढाएको छ । महंगी बढेको छ । असुरक्षा बढेको छ । प्रेसमाथि अंकुश लगाउने काम गरेको छ । त्यसैले यो सरकारको प्रशंसा गर्न लायक खासै काम छैन । एउटा राम्रो काम भनेको मैले चार वर्ष अगाडी मेरै पालामा सुरु गरेको रक्सौल अम्लेखगञ्ज पेट्रोलियम पाईप निर्माण कार्य सम्पन्न ग¥यो । त्यही एउटा राम्रो काम हो । नत्र अहिलेका प्रमले घरघरमा ग्याँस लाईन भन्नु भयो । त्यो कहाँ भयो ? पानी जहाज कहाँ चल्यो ? चाईनाबाट रेल कहाँ आयो ? एउटा देखाउने काम भनेको त्यही पाईप लाईन हो त्यो मेरै पालामा सुरु भएको हो ।
० भनेपछि पाईप लाईन निर्माणमा काम गर्ने हनुमान पगरी गुथ्ने ढेडु भने जस्तै भयो त ?
लगभग त्यस्तै हो । सन् २०१५ को अगस्ट २४ तारिखमा मैले र भारतका पेट्रोलियम मन्त्री धमेन्द्र प्रधानले संयुक्त मेमोरेण्डम अफ अण्डरस्ट्याण्डिङ ग¥यौं । त्यसको भोलीपल्ट भारतीय आयल निगम (आईओसी) र नेपाल आयल निगम (एनओसिी) बीच पेट्रोलियम पदार्थको डेलिभरी सम्बन्धि सम्झौता भयो । त्यो सम्झौतामा १८ महिनामा पेट्रोलियम पाईप लाईन बनाउने सहमति भयो । यो पाईप लाईन सन् २०१७ मै बन्नु पर्ने थियो । दुई वर्ष ढिलो गरी सम्पन्न भएको छ । ढिलै भएपनि निर्माण सम्पन्न भयो । तर यसको सुरुवात प्रधानमन्त्री शुशील कोईराला र म आपूर्तिमन्त्री हुँदा भएको हो । फलको बिरुवा एउटाले रोप्यो फल अर्कैले खाए जस्तै हो ।
० आफूले सुरु गरेको कामले पुर्णता पाउँदा खुशी हुनुहुन्छ होइन त ?
अवश्य पनि म मन्त्री हुँदा दुईटा गर्व गर्न लायक काम भए । एउटा त तत्कालिन समयमा राप्रपाका अध्यक्ष मेरा स्वर्गीय पिता पूर्व प्रधानमन्त्री सूर्यबहादुर थापाले मलाई पार्टीबाट मन्त्रीमा सिफारिस गरेर संविधान निर्माण गर्ने सरकारमा पठाउनु भयो । मैले चुनाव लड्दा पनि संविधान दिने वाचा गरेको थिए । तत्कालिन प्रधानमन्त्री स्वर्गीय शुशील कोईरालाको नेतृत्वमा म समेत सहभागि मन्त्री परिषदको सक्रियता अनि म समेत सांसद रहेको संविधान सभाले संविधान जारी ग¥यो । आज संविधान दिवस हो । यो संम्झिदा मलाई गर्व लाग्छ । अर्को पाईप लाईन बनाउने सम्झोता मेरै पालामा गरिएको हो । त्यसले पुर्णता पायो । त्यसमा पनि मलाई अत्यन्त खुशी र गर्व लागेको छ । तीस वर्षसम्म बन्न नसकेको पाईप लाईन बन्यो । बि.स. २०१५ सालदेखि उठाउँदै आएको संविधान सभावाट संविधान बनाउने बचन पुरा भयो । यो खुशीको कुरा हो ।
० सरकारले सोचे जस्तो काम गर्न सकेन भन्नु भयो । तर प्रतिपक्षि दलसँग पनि जनताको विस्वास छैन । जनता त नेतृत्व नपाएर विभिन्न व्यक्तिका पछि लागेको देखिन्छ ?
प्रतिपक्षीले पनि सोचे जस्तो काम गर्न नसकेको सत्य हो । प्रतिपक्ष दह्रो बन्न प्रजातान्त्रिक शक्ति बलियो बन्नु पर्छ । जुन कुरा बिगतमा सूर्य बहादुर थापाले उठाउँदै आउनु भएको थियो । वृहत्तर प्रजातान्त्रिक गठबन्धन भएन भने कम्युनिष्टले मुलुक खान्छन् । देशमा राजनीतिक सन्तुलन हुन्न भन्नु भएको थियो । अहिले त्यस्तै देखिएको छ । त्यसैले नेपाली काँग्रेस जुन प्रमुख प्रतिपक्षी छ उस्ले सम्पूर्ण प्रजातान्त्रिक शक्तिलाई एकजुट बनाएर अगाडी बढ्नु पर्छ । अन्यथा कम्युनिष्टहरुको अधिनायकवादतर्फ मुलुक जान सक्छ । जस्ले मुलुकलाई हानी पु¥याउँछ । अहिले तपाईले प्रश्न गर्नु भए जस्तै व्यक्तिका पछि जसरी जनता लागेका छन् । यो त सबै राजनीतिक दललाई खबरदारी हो । तिमीहरु हाम्रा मुद्दा उठाउ भन्ने चेतावनी हो ।
० तपाई आफै इन्चार्ज रहनु भएको एक नम्बर प्रदेशमा कसरी काम गर्नु भएको छ, र धनुकटामा केछ ?
सबैतिर राम्रैसँग दुईपार्टी बीचको एकता भयो । एकाध ठाउँमा केही साथीहरु असन्तुष्ट हुन सक्छन्,काम गर्दा कहिले काँही त्यस्तो हुन्छ । सबैलाई सन्तुष्ट पार्न सकिदैन । तर सबैतिर झगडा नभई सोहार्दपुर्ण तरिकाले पार्टी एकता भयो,धनकुटामा पनि तीनटा नगरपालिका र चारवटा गाउँपालिका छन् । केही दिन अगाडी धनुकटा गएर सबै साथीहरुलाई भेटेर आए । बृहत्तर छलफल गरी आगामी कार्यक्रम बनाएर आए, धनकुटामा राप्रपा अहिले पनि एउटा शक्ति हो भन्ने सबै कार्यकर्तामा छ । त्यही अनुरुप साथीहरु अगाडी बढिरहनु भएको छ ।
Courtesy: http://nepalipatraonline.com/पेट्रोलियम-पाईप-लाईन-निर/
